Չի կարող որևէ մեկը ճչոցով այլ իրավիճակ ստեղծել, մոլորեցնել մարդկանց. Դավիթ Սանասարյանը՝ ԵՊՀ ռեկտորին

Պետական վերահսկողական ծառայության պետ Դավիթ Սանասարյանն այսօր հրավիրված ասուլիսի ժամանակ պատասխանել է ԵՊՀ ռեկտոր Արամ Սիմոնյանի հնչեցրած մեղադրանքներին:

«Սիմոնայնը մանիպուլացնող, իրականությունից կտրված, մեր ասածի հետ կապ չունեցող հայտարարություններ է անում: Ամենամեծ մանիպուլյացիան հետևյալն է, նա ասում է 9 միլիարդից ավելի գնումներ ենք ստուգել: Սո´ւտ է: Մենք ստուգել ենք 2.5 մլրդ-ի գնումներ, բացի այդ, հազար անգամ ասել ենք, մենք ստուգող չենք, ստուգումների մասին օրենքով չենք առաջնորդվում, իսկ մեզ ասում են ստուգման մասին օրենքով այս կարելի է, այն չի կարելի: Մենք ուսումնասիրություն ենք իրականացնում մեր օրենքով»,- ասաց Դավիթ Սանասարյանը:

Նա նշեց, որ ուսումնասիրությունները իրականացվել են ոչ թե օգոստոս ամսից, այլ հոկտեմբերից, քանի որ աշխատակիցները արձակուրդում են եղել, մինչդեռ Արամ Սիմոնյանը նշում էր, որ հուլիսի 30-ից սկսած 6 ամիս լայնամասշտաբ, նախատիպը չունեցող ստուգումներ են իրականացվում համալսարանում, մինչդեռ ստուգումների ժամկետները սահմանափակ պետք է լինեն:

«Եթե պետական վերահսկողական ծառայության ղեկավարը հարկ է համարում ուսումնասիրություն իրականացնել նույնիսկ տարին 12 ամիս, ապա 12 ամիս պարտավոր ենք ուսումնասիրել և մեզ վրա չի տարածվում ստուգումների մասին օրենքը», – պարզաբանեց ՊՎԾ սոցիալական ոլորտի վերահսկողության վարչության պետի պաշտոնակատար Դավիթ Այդյանը:

Դավիթ Սանասարյանը վստահեցրեց, որ եթե այդ ուսումնասիրությունները երկար տևեին, ապա այդ թվերը բազմապատկվելու էին: Չի ուսումնասիրվել Իջևանի մասնաճյուղը, պանսիոնատները, ուսումնասիրություններ չեն իրականացվել նաև եկամտային մնացած մասերում: Պատճառը ժամանակի ու ռեսուրսի սղությունն է: Եթե ԵՊՀ-ում ուսումնասիրություն իրականացվեր ողջ ծավալով, այլ հաստատաություններում չէին կարող ուսումնասիրություններ իրականացնել:

«Ներկա ու նախկին բոլոր պաշտոնյաներին խորհուրդ չեմ տալիս Արամ Սիմոնյանի օրինակին հետևեն ու միանգամից որակեն, որ սա քաղաքական հետապնդում է: Եթե Սիմոնյանը ենթադրում է, որ ինքը ՀՀԿ-ից և դրա համար է սա արվում, ուրեմն ասեմ, որ կլինեն ՀՀԿ-ից, ՔՊ-ից, թե որևէ այլ կուսակցությունից, միևնույնն է: Բոլոր պաշտոնյաները օրենքի առաջ հավասար են ու պետք է պատասխան տան: Չի կարող որևէ մեկը ճչոցով այլ իրավիճակ ստեղծել, մոլորեցնել մարդկանց, որ ահա մեր հետևից ընկած են, որովհետև մենք ՀՀԿ անդամ ենք: Շատ բան չենք մանրամասնի, բայց վստահեցնում ենք, որ խայտառակ փաստեր կան, իրավապահ մարմիններն իրենց գործողությունների արդյունքում կներկայացնեն հանրությանը, թե ինչի մասին է խոսքը», – ասասց Դավիթ Սանասարյանը:

 

ՊՎԾ սոցիալական ոլորտի վերահսկողության բաժնի պետի պաշտոնակատար Դավիթ Այդյանն էլ ներկայացրեց Արամ Սիմոնյանի կողմից հրավիրված ասուլիսի ժամանակ հնչած մեղադրանքներն ու դրանց հակափաստարկները: Մանրամասները՝ տեսանյութում:

Հիշեցնենք, որ Պետական վերահսկողական ծառայության պետը ԵՊՀ-ում կատարված  ուսումնասիրություններից հետո հայտարարել էր, որ հիմնադրամին հասցվել է ավելի քան 800 միլիոն դրամի վնաս, իսկ  ուսումնասիրության արդյունքներն ուղարկվել են դատախազություն: ԵՊՀ ռեկտոր Արամ Սիմոնյանն էլ հայտարարել էր, որ Պետական վերահսկողական ծառայության պետ Դավիթ Սանասարյանն օրենք է խախտել: Ռեկտորը համաձայն չի եղել նաև մեղադրանքների մեծ մասի հետ՝  որակելով դրանք փիլիսոփայական ու դեկլարատիվ։