Փոխվարչապետի ու առողջապահության նախարարի երկար հարցուպատասխանը կառավարության նիստի ժամանակ

Այսօր, երբ կառավարությունը որոշում է ընդունել հատուկ սոցիալական խմբերին անվճար բուժօգնություն տրամադրելու վերաբերյալ, փոխվարչապետ Մհեր Գրիգորյանը ՀՀ առողջապահության նախարար Արսեն Թորոսյանին այսպիսի հարց է ուղղել.

«Թրաֆիքինգի ենթարկված անձը ո՞վ է հիմնավորում, ո՞նց է հիմնավորում ու ո՞ւմ է  հիմնավորում, որ ինքը թրաֆիքինգի ենթարկված անձ է ու պետք  է օգտվի էս արտոնությունից»,- հարցրել է Գրիգորյանը:

«Դա ոստիկանության կողմից տրված տեղեկանքի հիման վրա է, ինչքան գիտեմ, մենք նման դեպքեր պրակտիկորեն չենք ունենում, բայց սա մեր միջազգային ստանձնած պարտավորությունների լույսի ներքո է ներառված, որ եթե էդպիսի դեպքեր լինեն, ապա պետությունը ստանձնի այդ անձանց բուժօգնությունը»,- եղել է Թորոսյանի պատասխանը:

Գրիգորյանը նկատել է, որ շատ դեպքերում ընթացակարգը շատ ավելի կարևոր է, քան նպատակը: Նա հարցրել է, թե արդյոք մարդիկ տեղեկանքներ են բերելու, որ իրենք, օրինակ՝ Չեռնոբիլի ատոմակայանի վթարի վերացման աշխատանքներին մասնակցել են:

«Այո՛»,- արձագանքել է առողջապահության նախարարը, որից հետո նախարարի ու փոխվարչապետի միջև այսպիսի հարց ու պատասխան է սկսել.

«Ումի՞ց»,- հարցրել է Մհեր Գրիգորյանը:

«Համապատասխան մարմիններից»,- արձագանքել է Արսեն Թորոսյանը:

«Ումի՞ց, ուզում եմ հասկանալ, որովհետև հակառակ դեպքում կոռուպցիոն ռիսկերը կմեծանան: Բոլորը կսարքեն ինչ-որ տեղեկանքներ, և կսկսվի անվճար բուժման ընթացակարգ»,- շարունակել է փոխվարչապետը:

«Նույն սկզբունքով 30 և ավելի բալ ունեցող քաղաքացիներն էլ են ներկայացնում սոցիալական ծառայության տեղեկանք, կամ Հայրենական պատերազմի մասնակիցներն իրենց համապատասխան տեղեկանքները: Բոլոր դեպքերում իրենց կարգավիճակը հաստատվում է որևէ փաստաթղթով: Ապագայում, կարծում եմ, որ կլինի էլեկտրոնային հարցում այդ բազաներին, հիմա բազաները կապված չեն, հիմա մենք ունենք կապ միայն անձնագրերի բազայի հետ, երբ ստուգում ենք անձնական տվյալները, իսկ համապատասխան կարգավիճակը հաստատվում է փաստաթղթով՝ ամեն կոնկրետ դեպքի համար»,- ասել է Արսեն Թորոսյանը:

Գրիգորյանն առաջարկել է ընթացքը կանոնակարգելու հանձնարարական տալ:

«Պարոն Գրիգորյանի մտահոգությունները, կարծում եմ, տեղին են, և հստակ ընթացակարգը մենք պետք է սահմանենք էս փուլում, քանի դեռ էլեկտրոնային տվյալների բազային բոլորը չեն տիրապետում»,- խոսակցությանը միջամտել է փոխվարչապետ Տիգրան Ավինյանը:

ՀՀ աշխատանքի և սոցիալական հարցերի նախարար Զարուհի Բաթոյանն էլ նշել է, որ բոլոր  ընթացակարգերը կան, բայց եթե հավելյալ տեղեկատվության կարիք կա, իրենք կարող են հավելյալ տեղեկատվություն տրամադրել: Արդարադատության նախարար Արտակ Զեյնալյանն հավելել է, որ կատեգորիաները, որի մասին խոսվեց, ունեն իրավական կարգավիճակներ: Մասնավորապես, Չեռնոբիլի վթարի աշխատանքներին մասնակցած անձինք հայտնի են՝ նրանց թիվը սպառիչ է:

«Ինչ վերաբերում է թրաֆիքինգի զոհերին, ապա նախաքննության մարմնի իրավական ակտով այդ ողջամիտ կասկածը հաստատված է կամ այն հաստատված է օրինական ուժի մեջ մտած դատական ակտով: Այդ խնդիրը լուծված է այլ ընթացակարգերի շրջանակներում»,- ասել է Արտակ Զեյնալյանը՝ հորդորելով առողջապահության նախարարին մասնավորեցնել, թե ինչպես են այդ ծառայություններից օգտվելու կալանավորվածներն ու դատապարտվածները:

«Նման անձինք պետական պատվերի շրջանակում մինչ այդ էլ օգտվում էին անվճար ծառայություններից՝ որոշ բացառություններով, պարզապես բացառություններ իրենց համար չեն լինի: Այսինքն՝ փաթեթը հասանելի կլինի կալանավորված և ձերբակալված անձանց, այդ թվում՝ սրտի վիրահատությունները: Դրանք, մոտավորապես, տարեկան 100 դեպք են, և մեր բյուջետային միջոցները թույլ են տալիս նաև նրանց ներառել այս ծրագրի մեջ»,- ասել է Արսեն Թորոսյանը:

Ի վերջո, առաջարկն ընդունվել է միաձայն: