Թավշյա հեղափոխության հաջողության գրավականը, ըստ Նիկոլ Փաշինյանի, տեխնոլոգիաներն են

ՀՀ վարչապետ Նիկոլ Փաշինյանը փետրվարի 12-ին խորհրդարանում կառավարության ծրագրի ներկայացման ժամանակ անդրադարձավ բռնությունը մերժելու կարևորությանը և 2018թ. ապրիլ-մայիսին կատարված քաղաքական իրադարձությունների հաջողությունը երաշխավորող գործոններին:

«Մենք ասում էինք, որ մերժում ենք բռնությունը որպես ներհայաստանյան որևէ, այդ թվում՝ քաղաքական հարցի լուծման միջոց, ցանկացած ամենակոռումպացված պաշտոնյայի, իշխանության դեմ չենք պատրաստվում բռնություն գործադրել: 2013 թ.-ից ի վեր հավատարիմ մնացինք մեր գծին, միլիմետր անգամ չշեղվեցինք մեր սկզբունքներից՝ այդ ընթացքում արժանանալով ամենանվաստացուցիչ մեղադրանքների: Մեզ մեղադրում էին կոմֆորմիզմի, կեղծ ընդդիմություն լինելու, ծախվածության մեջ, մենք ամուր կանգնեցինք մեր ոտքերի վրա և ՀՀ քաղաքացուն մեկ բան էինք ասում՝ ուզում ես փոփոխություն, ի ցույց դիր քո կամքը, մենք կերաշխավորենք քո կամքի հաղթանակը»,- ասաց նա:

Փաշինյանը շեշտեց՝ իրենք ապացուցեցին իրենց հասցեագրված մեղադրանքների սնանկ լինելը, 2018 թ. ապրիլ-մայիսին կարողացան կատարել իրենց խոստումը և դառնալ ՀՀ հպարտ և արժանապատիվ քաղաքացու կամքի և հաղթանակի երաշխավորը, և դրա համար որևէ մեկի վրա զինված հարձակում գործելու և բռնություն ենթարկելու անհրաժեշտություն չեղավ: Նա նշեց՝ ՀՀ քաղաքացիները կարողացան հաղթել մտքի գործադրմամբ, նրանք հավատ ձեռք բերեցին իրենց ուժերի նկատմամբ:

Վարչապետը խոսեց այն գործոնների մասին, որոնք թավշյա հեղափոխության հաջողության երաշխիքը դարձան:

Նա նշեց՝ մի պահ բոլորը հասկացան, որ անհնար է բռնություն գործադրել այն մարդկանց նկատմամբ, ովքեր ի ցույց են դնում իրենց վեր պարզած ձեռքերը և չեն պատրաստվում բռնությանը բռնությամբ պատասխանել:

Հաջորդ տեխնոլոգիան, ըստ Փաշինյանի, օնլայն դրամական միջոցների փոխանցման հարթակն է, որի միջոցով իրենք ֆինանսական աջակցություն ստացան, քանի որ հեղափոխությունը սկսելու պահին ֆինանսական խնդիրներ կային ու անորոշություններ:

«Մենք կարողացանք համախմբել և իրականացնել մարդկության պատմության ամենից ոչ ծախսատար հեղափոխությունը` ի հեճուկս այն կարծիքի, որ հարկավոր են միլիոնավոր դոլարներ, դաբրոներ: Մեր հեղափոխությունը բացառիկ դարձավ ևս մեկ պատճառով՝ մեր քաղաքական թիմը և ես անձամբ հեղափոխության արդյունքներով չունենք քաղաքական, ֆինանսական, տնտեսական պարտավորություն որևէ անհատի, որևէ շրջանակի առաջ՝ լինի դա Հայաստանում, թե Հայաստանից դուրս, սա ինքնիշխանությունն ապահովող կարևոր գործոն է»,- ասաց նա՝ ընդգծելով, որ իրենց ունեցած միակ պարտավորվածությունը ՀՀ ժողովրդի առաջ է:

Հաջորդ պայմանական տեխնոլոգիան, վարչապետի խոսքով, ապակենտրոնացվածությունն էր, երբ իրենք հայտարարեցին, որ հեղափոխությունը չունի առաջնորդ, կենտրոնացված կառավարում, յուրաքանչյուր քաղաքացի ինքն է հեղափոխության առաջնորդը: Նրա գնահատմամբ՝  Հայաստանը դարձավ բոլորովին նոր մակարդակի երկիր, ձեռք բերեց ազատ, ժողովրդավարական երկրի ճանաչում: