Ջահել զինվորները քաղաքական տարաձայնությունները չպետք է իրենց հետ տանեն բանակ. Արկադի Տեր-Թադևոսյան

«Ինչ կառավարություն էլ լինի, մենք իր կողքը պետք է լինենք, որովհետև մենք զինվորների հետ գործ ունենք, ինչ էլ ասեն, մենք պետք է ասենք՝ այո´, ու ծափ տանք մեր կառավարոթյանը: Դու չես կարող զինվոր պատրաստել ու քննադատել կառավարությունը»,- SHANTNEWS.am-ի հետ զրույցում, խոսելով Հայաստանի նոր կառավարության քաղաքականության մասին, հայտարարեց Արցախյան ազատամարտի հերոս, գեներալ-մայոր Արկադի Տեր-Թադևոսյանը:

Կոմանդոսը վստահ է, որ ոչ միայն ինքը, այլև իրենց ամբողջ կազմը, որ զինվորներ է պատրաստում հայոց բանակի համար, պետք է զերծ մնա քաղաքականությունից՝ այդ զինվորներին ևս հեռու պահելով: Ասում է.

«Ջահել զինվորները պետք է գնան, առաջին գծում կանգնեն ու պաշտպանեն մեր երկիրը: Ամեն պետության մեջ կան մեծ ու փոքր պրոբլեմներ, հեռու ենք դրանից: Մեր նպատակը, որ զինվորները քաղաքականության մեջ չմտնեն, որևէ մի կուսակցության ո´չ կողմ, ո´չ դեմ չլինեն, մենք պետության կողմն ենք, մեր հրամանատարը Փաշինյանն է, ինչ իրենցից ստանում ենք, պետք է այդ բանը մատուցենք զինվորներին, 1000 հոգի սովորում են ու գնում բանակ, այդ ջահելները էդ տարաձայնությունները չպետք է իրենց հետ տանեն»,-կարծում է հրամանատարը:

Նախարարներն ու ղեկավարները գալիս-գնում են, զինվորից է կախված երկրի ամուր վիճակը, ասում է Կոմանդոսը, իսկ զինվորը կարողանում է կատարել իր առջև դրված պարտականությունը: Որքան էլ թշնամին վերազինի իր բանակը, հայ բանակի հզորությունը չի կարող ունենալ.

«Մեր բանակը կայացած է, պետք է հանգիստ լինենք, պետք է բանակի վրա վստահ լինենք: Մի քանի նախարար փոխվեց մի քանի տարում, պիտի ասենք` նախարարի՞ց է կախված, նախարա՞րն արեց, նորությո՞ւն բերեց, շենքը ազատամարտիկների վրա է հիմնվել: Ժողովուրդը թող հասկանա, որ մենք ունենք բանակ, մեր բանակն անհաղթ է, թշնամին ունի զենք-զինամթերք, բայց բանակ չունի, իրենց զինվորների մեջ թշնամական հարաբերություններ են, մեր զինվորների մեջ չկա նման հարաբերություն, կարանք մի քիչ էլ իրար նեղացնենք, բայց բոլորս հայ ենք, մի կրոն ու լեզու ունենք, բայց իրենք իրենց անցյալը ջնջել են, դարձրել են մեկ ազգ»:

Հետևաբար, Արկադի Տեր-Թադևոսյանը վստահ է, որ Ադրբեջանը երկար կյանք չունի:

«Ադրբեջանի ապագան կփլուզվի 10 կամ 100 տարի հետո, ապագա չունի, ինչպես Խորհրդային Միությունը:  Մեզ մոտ տարաձայություններ կան, դրանք նորմալ են:  Դժվար պահերին բոլորը միասնական են, բայց իրենք թողնում ու փախչում են»,- կարծում է Կոմանդոսը:

Ադրբեջանի ու Թուրքիայի խոսքերն ու գործողություններն անհասկանալի է համարում, ասում է.

«Մի բան ասում են, մի բան` անում, չես կարող իրենց քայլերը հասկանալ, բայց լավ մտածում են ու ամեն ինչ խառնում. մի օրինակ բերեմ. մեզ վրա կրակեցին, մենք էլ պատասխանեցինք, մի երեխա վիրավորվեց, տեսնեիք՝ ինչ աղմուկ բարձրացրին, կարծես մարդասպան էինք, մեր միջազգային դիվանագիտությունը պետք է ուժեղացնենք»,- կարծում է հայ ռազմական գործիչը: