Ի՞նչ մակարդակի է այսօր հայատյացությունը. Եվրախորհրդարանում անցկացվելիք համաժողովը փաստերով կներկայացնի երևույթները

Մարտի 6-ին Եվրախորհրդարանի սրահներից մեկում տեղի կունենա «Հայատյացություն. պատմական և արդի դրսևորումները» խորագրով համաժողով, որի կազմակերպիչները ՀՅԴ Եվրոպայի Հայ դատի գրասենյակը և «Թուֆենկյան» հիմնադրամն են: SHANTNEWS.am-ի հետ զրույցում ՀՅԴ Հայ դատի Եվրոպայի գրասենյակի հաղորդակցության պատասխանատու Հարութ Շիրինյանը մանրամասներ ներկայացրեց համաժողովից:

Նա հայտնեց, որ գիտաժողովը հյուրընկալելու է Եվրախորհրդարանի պատգամավոր, Եվրամիություն-Հայաստան բարեկամական խմբի ղեկավար Էլենի Թեոխարիուսը: Բանախոսներն են Թուրքիայում թուրք պատմաբան, ակտիվիստ, մարդու իրավունքների պաշտպան, Հայոց ցեղասպանության մասին բարձրաձայնելու պատճառով թուրքական իշխանությունների կողմից հալածված Ռագըփ Զարաքօլուն, լեհ հայագետ, Կրակովի Յագելոնյան համալսարանի պրոֆեսոր, պատմաբան Յակուբ Օշիեցկին, ռուս-իսրայելցի բլոգեր Ալեքսանդր Լապշինը, որ Արցախ այցելության պատճառով ձերբակալվել էր Ադրբեջանի իշխանությունների կողմից, Արցախի ՄԻՊ Արտակ Բեգլարյանը, Արցախի նախկին ՄԻՊ, իրավաբան Ռուբեն Մելիքյանը:

Շիրինյանի խոսքով՝ ամեն մեկը պիտի բանախոսի այն նյութի շուրջ, որի համար հրավիրված է: Զարաքօլուն կխոսի Թուրքիայում հայատյացության մասին, Օշիեցկին պատմական տեղեկություններ կփոխանցի, թե որքանով է հայատյացությունը զարգացած, և որքան ժամանակից է սկսվել, ինչ պատճառներով, այսօր ինչ ձևերով է այն շարունակվում՝ լինի Թուրքիայում, թե Ադրբեջանում, ու նաև այն բոլոր գաղութներում կամ համայնքներում, ուր հայկական սփյուռք գոյություն ունի: Արտակ Բեգլարյանը և Ռուբեն Մելիքյանը, լինելով Արցախի մարդու իրավունքների ներկա և նախկին պաշտպաններ, պիտի խոսեն 2018-ին հրապարակված հայատյացության վերաբերյալ զեկույցի մասին, նաև Ադրբեջանում կրթական ոլորտի մասին, թե ինչպես է հայատյացություն սերմանվում Ադրբեջանի քաղաքացու մեջ՝ փոքր տարիքից ի վեր, նաև պատերազմական մթնոլորտը վառ պահելու մեջ և բանակցությունների վրա դրա հետևանքների մասին: Շիրինյանն ասաց՝ Լապշինն էլ ներկա կլինի արդեն իբրև անձ, որն իրականում այդ ամենը զգացել է իր մաշկի վրա, պիտի ներկայացնի իր անձնական փորձառությունը և տեղեկացնի՝ ինչ պայմաններում է պահվել այն ժամանակահատվածում, երբ Ադրբեջանում ձերբակալված էր:

«Մեր նպատակն է փաստերով ներկայացնել այն երևույթները, որ մենք համարում ենք հայատյաց, նաև զգուշացնել՝ միջազգային կազմակերպությունների, այս դեպքում՝ Եվրախորհրդարանի պատգամավորների և տարբեր հասարակական կազմակերպությունների ներկայացուցիչների մասնակցությամբ, զգուշացնել՝ ի՞նչ մակարդակում է այսօր հայատյացությունը և ի՞նչ ազդեցություն է ունենում հայ ժողովրդի արդի համազգային խնդիրների զարգացման վրա»,- ասաց նա:

Հարցին՝ արդյո՞ք արդեն իսկ արձագանքներ եղել են թուրքական կամ ադրբեջանական համայնքներից, Շիրինյանը նկատեց՝ միշտ փետրվարի վերջի և մարտի սկզբի ժամանակահատվածները խնդրահարույց են, քանի որ, ինչպես տեսանք արդեն, այս շրջանում եվրոպական բոլոր երկրներում, ու հատկապես Ֆրանսիայում, տեղի ունեցան իրենց, այսպես կոչված, «Խոջալուի ջարդերի հավաքները». Ֆրանսիայում հայ երիտասարդներ կարողացան հակազդել ու կասեցնել այդ ոգեկոչումը:

«Մեր փորձառությամբ տեղյակ ենք, որ անցյալ տարի, երբ փետրվարի վերջին Եվրախորհրդարանում կազմակերպել էինք Արցախի ազատ ինքնորոշման իրավունքի մասին միջոցառում, Ադրբեջանի մի շարք ներկայացուցիչներ էին եկել և փորձել խանգարել մեր միջոցառումը ԵԽ սրահների ներսում: Մենք պետք է միշտ պատրաստ լինենք այդպիսի դեպքերի և հակառակը, քանի որ Եվրախորհրդարանը ԵՄ ամենաբարձր ժողովրդավար ատյանն է, մենք այդ մարդկանց կարող ենք հնարավորություն տալ խորհրդաժողովից հետո հարցեր ուղղել մեր բանախոսներին և պատասխան ստանալ, բայց ոչ ժողովրդավար պահվածքը, մեր միջոցառումը խանգարելն անընդունելի և դատապարտելի կլինի»,- նշեց նա: