Թուրքիայում կձերբակալեն Էրդողանին քննադատող զբոսաշրջիկներին

Թուրքիայի ներքին գործերի նախարար Սուլեյման Սոյլուն հայտարարել է, որ օդանավակայաններում կձերբակալվեն Թուրքիա այցելող բոլոր այն զբոսաշրջիկները, ովքեր վերջին ամիսներին քննադատական խոսք են հնչեցրել Էրդողանի հասցեին կամ ինչ-որ կերպ պաշտպանել են քրդական շարժումը: Սա լրջորեն անհանգստացրել է հատկապես եվրոպական երկրներին:

Գերմանիան, Ֆրանսիան և մի շարք այլ պետություններ իրենց քաղաքացիներին կոչ են արել զերծ մնալ Էրդողանի հասցեին հրապարակային քննադատություն հնչեցնելուց կամ ընդհանրապես չայցելել Թուրքիա: Գերմանական լրատվամիջոցներն էլ հետ են կանչում Թուրքիա գործուղված իրենց թղթակիցներին:

Թեմայի վերաբերյալ Shantnews.am-ին մանրամասներ է ներկայացրել քուրդ լրագրող, Վանի քաղաքապետ Բեքիր Քայայի օգնական Ադնան Բիլենը:

«Որքան ընտրությունները մոտենում են, այնքան լարվածությունը մեծանում է Թուրքիայում: Օրերս Գերմանիայից արգելեցին լրագրողների մուտքը: Ընդհանրապես, թուրքական իշխանությունը համարում է, որ եվրոպացի լրագրողների աշխատանքը Թուրքիայում վնասում է երկրին: Նրանք կարծում են, որ նորությունները պետք է լինեն միայն դրական լույսի ներքո, իսկ այն, ինչը քննադատում է, բացասական երևույթների մասին է, ապա պատվիրված է և համագործակցում է այլ ուժերի հետ: Արտասահմանցի գործիչները հաճախ անդրադառնում են Թուրքիայում ժողովրդավարական գործընթացներին, դրանց պակասին, տնտեսության վատ վիճակին, այն բանին, թե ինչպես են ճնշվում ազգային փոքրամասնությունները: Այդ հայտարարությունները, որ կատարվեցին, թե կձերբակալվեն իշխանության դեմ քննադատություն հնչեցնող կամ քրդական շարժմանն աջակցող մարդիկ, թեկուզ զբոսաշրջիկները, նախ և առաջ ներքին լսարանին ուղղված քարոզչություն են, իբրև թե իշխանությունն ուժեղ է և աշխատում է ամբողջ հզորությամբ: Նրանք բազմաթիվ բռնաճնշումներ են անում, հեռուստաընկերություններ, թերթեր փակեցին՝ ահաբեկիչներին օգնելու պատրվակով: Այսօր ժողովրդադեմոկրատական կուսակցության նկատմամբ է իշխանությունը հաճախ հալածանքներ անում, քանի որ հասարակությունը հիմնականում հենց այս կուսակցությանն է աջակցում: Առաջիկայում էլ ընտրություն է լինելու, և մենք հասկանում ենք, որ պետք է գործի դրվեն բոլոր միջոցները՝ ճնշելու հասարակությանը, հալածելու ընդդիմադիր ուժերին և խանգարելու արտաքին աշխարհին, որպեսզի հնարավոր չլինի տեսնել ու ներկայացնել իրական Թուրքիան»,- ասել է քուրդ լրագրողը: