Ի՞նչ գաղափարներով է Երևան գալիս Ադրբեջանի հետ բիզնես կապեր ունեցող ԵԱՀԿ սլովակ նախագահը

ԵԱՀԿ նախագահ Միրոսլավ Լայչակը մարտի 12-ին ժամանում է Հայաստան: Տարածաշրջանային այցի շրջանակում ԵԱՀԿ նորընտիր սլովակ նախագահը, սակայն, առաջինը Բաքու այցելեց: Վերլուծաբաններն ասում են՝ դա պատահական չէ: Սլովակիայի ներկա կառավարությունը վերջին տարիներին սերտ կապեր ունի Ադրբեջանի հետ, զենքի առևտուր են անում, իսկ Միրոսլավ Լայչակը ԵԱՀԿ նախագահից բացի, զբաղեցնում է նաև Սլովակիայի ԱԳ նախարարի պաշտոնը:

Մարտի 5-ին Բաքվում Լայչակը հանդիպել է Ադրբեջանի նախագահի և ԱԳ նախարարի հետ: Իլհամ Ալիևն ու Էլմար Մամեդյարովը նրան խնդրել են հայկական կողմին փոխանցել իրենց դժգոհությունն ու դիրքորոշումը:

«Լեռնային Ղարաբաղի հակամարտության կարգավորման գործում ամենաշահագրգիռ կողմն Ադրբեջանն է, քանի որ Ադրբեջանի տարածքներն օկուպացված են, և ավելի քան մեկ միլիոն ադրբեջանցիներ փախստական և հարկադիր տեղահանված են դարձել: Երևանը լուրջ ցանկություն չի ցուցաբերում առարկայական բանակցություններ վարելու և ամեն կերպ փորձում է խոչընդոտել կարգավորմանը: Շատ կարևոր է, որ միջազգային հանրությունը լուրջ ճնշում գործադրի Երևանի վրա՝ բանակցային գործընթացում առաջընթաց արձանագրելու և Ադրբեջանի օկուպացված տարածքներից Հայաստանի զինված ուժերը դուրս բերելու համար»,- ասել է Իլհամ Ալիևը:

Նույն բնույթի էր նաև արտգործնախարար Էլմար Մամեդյարովի հայտարարությունը: Նա Լայչակին խնդրել է Երևան ժամանելիս հարցնել՝ Հայաստանի իշխանությունը ժողովրդին խաղաղությա՞ն է նախապատրաստում, թե՞ այլ ճանապարհ է ընտրել:

«Հայաստանի ղեկավարության վերջին հայտարարությունները նպատակաուղղված չեն խաղաղությանը, օրինակ՝ Ազգային անվտանգության ծառայության ղեկավարի հայտարարությունը: Այդ հարցով այսօր հեռախոսազրույց եմ ունեցել ԵԱՀԿ Մինսկի խմբում Ռուսաստանի համանախագահ Իգոր Պոպովի հետ»,- նշել էր Մամեդյարովը:

Հայաստանի ԱԱԾ տնօրենն Արցախում փետրվարի վերջին հայտարարել էր, թե հայկական կողմը ոչ մի թիզ հող հանձնելու նպատակ չունի, հակառակը՝ մեր հողերում պետք է ապրեն մեր հայրենակիցները: Միրոսլավ Լայչակն այս հայտարարությանը չի արձագանքել, սակայն ասել է, որ ԵԱՀԿ Մինսկի խումբը հակամարտության լուծման միակ ձևաչափն է, և դրա միակողմանի փոփոխությունները ցանկալի չեն.

«Բաքվում կայացած բանակցությունները ես կառուցողական եմ համարում: Ադրբեջանի նախագահի և արտգործնախարարի հետ քննարկեցի հակամարտության կարգավորման ուղիները: Պնդում եմ, որ բանակցությունների համար ԵԱՀԿ Մինսկի խումբը միակ ձևաչափն է, և այդ ձևաչափի ցանկացած փոփոխություն պետք է համաձայնեցվի հակառակ կողմի հետ: Երևանում ևս կշարունակենք քննարկումները: Մի շարք գաղափարներ կան, որոնք ես կտանեմ Երևան»:

Թե կոնկրետ ինչ գաղափարներ է Լայչակը բերում Երևան, լայն հանրությանը պարզ կդառնա հանդիպումներին հաջորդող պաշտոնական հայտարարություններից: Հայաստանի կառավարությունը վերջին մեկ տարում պարբերաբար շեշտում է, որ արցախյան բանակցային գործընթացում պետք է ընդգրկել պաշտոնական Ստեփանակերտը, քանի որ Երևանը լիազորված չէ բանակցություն վարել Արցախի անունից: Այս թեզը դեռևս հավանություն չի ստացել ոչ միայն ԵԱՀԿ ՄԽ համանախագահների, այլև հենց ԵԱՀԿ նախագահի կողմից: Ի դեպ, միջազգային մամուլում տեղեկություններ են տարածվել, որ Սլովակիայի իշխանությունը, այդ թվում Միրոսլավ Լայչակը, բիզնես շահեր ունի Ադրբեջանում: Նախորդ տարի Սլովակիայի և Ադրբեջանի միջև տեղի ունեցավ զենքի վաճառքի սկանդալային բացահայտումը: Աղմուկ բարձրացրեց նաև սլովակ բարձրաստիճան պաշտոնյաների ներգրավվածությունը զենքի տեղափոխման ստվերային գործարքներում: ԵԱՀԿ սլովակ նախագահի տարածաշրջանային այցի ֆոնին Ադրբեջանը մարտի 11-ից լայնամասշտաբ հարձակողական զորավարժություններ է իրականացնում Արցախի սահմանին՝ կիրառելով նաև Սլովակիայից գնված խոշոր տրամաչափի զինատեսակներ: Արցախյան հակամարտության խաղաղ լուծման առաքելություն ստանձնած ԵԱՀԿ-ի սլովակ նախագահին Երևանում այս առումով բազմաթիվ հարցադրումներ են սպասվում: