Արցախի հարցի հետ կապված ՀՀ-ում կա հստակ կոնսենսուս և աջակցություն օրվա իշխանությանը. Մարուքյան

«Արցախում անվտանգության խորհրդի նիստ անցկացնելն ուղերձ է և շատ կարևոր ուղերձ համանախագահների հայտարարությունից հետո, Փաշինյանի ելույթը համապարփակ էր, ու կարևորում եմ, որ գրված էր, այսինքն՝ մտածված, շեշտադրված ու երևի առաջին անգամ համակարգված ձևով ՀՀ իշխանությունը Արցախի հարցում ուղերձ հղեց»,- այսպիսի կարծիք հայտնեց այսօր ԱԺ-ում «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով երեկ Արցախում տեղի ունեցած անվտանգության խորհրդի նիստին ու Նիկոլ Փաշինյանի ելույթին:

Նա շեշտեց, որ սա ուղերձ էր՝ ուղղված միջազգային հանրությանն ու Ադրբեջանին, ոչ թե ներքին օգտագործման: Ըստ նրա՝ պետք է սպասել բանակցությունների, որոնց հետ, սակայն, մեծ ակնկալիքներ կապելը դժվար է:

«Մենք աջակցում ենք այդ հարցով ՀՀ իշխանությանը, այս հարցում կա կոնսենսուս, ինչ վերաբերում է  բանակցություններին, մեծ ակնկալիքներ չէի փորձի ձևավորել, հարցեր բարձրացվեցին՝ կապված սկզբունքների հետ, և դրանք պետք է մեկնաբանվեն ոչ թե Հայաստանի կամ Արցախի սրտով, այլ միջազգային հանրության կողմից, միջազգային ստանդարտները պետք է հստակեցնենք»:

Հարցին, թե մինչև օրս հստակ չե՞ն եղել այդ սկզբունքները, Մարուքյանը նշեց, որ նոր կողմեր են ի հայտ եկել, և մինչ առաջին հանդիպումը այսօրվա իշխանությունը ցանկություն ունի հստակեցնել:

Իսկ ինչպես Արցախի հիմնախնդիրը, այնպես էլ բանակցությունների  ֆորմատը սպեցիֆիկ է, չկա երկրորդ նման  ֆորմատ, որտեղ ՄԱԿ անվտանգության խորհրդի երեք մշտական անդամ երկրներ բանակցային երկրներ են, կարևորում է ԼՀԿ ղեկավարը, ապա ավելացնում.

«Այս մասով մենք շատ լավ ենք նայում Անվտանգության խորհրդի նիստի կազմակերպմանը Արցախում, երկրորդ մասով ուղերձը համապարփակ էր, դա էլ ենք նորմալ գնահատում»:

Մարուքյանը կարծում է, որ հիմա հայկական կողմը լուրջ անելիք ունի բոլոր միջազգային ատյաններում` խոսելու Հայաստանի ու Արցախի դիրքորոշման մասին, բարձրաձայնելու, որ Արցախը պետք է բանակցային սեղան վերադառնա:

«Մենք չպետք է սպասենք, որ Ալիևն ասի, որ ասում եք, թող գան բանակցեն, այլ պետք է միջազգային հանրության հետ աշխատանք տանենք, մեր դեսպանատները, խորհրդարանական դիվանագիտական հարթակներն օգտագործենք աշխարհի բոլոր մայրաքաղաքներում, միջազգային հարթակներում, սկսենք պարզաբանում առ այն, որ առանց Արցախի մասնակցության չեն կարող լինել լիարժեք բանակցություններ»:

Նա կարծում է, որ եթե միջազգային հանրությունը Արցախի բանակցային կողմ դառնալու վերաբերյալ միակարծիք լինի, Ադրբեջանին այլ բան չի մնա, եթե ոչ համաձայնել:

«Կարևոր հանգամանք է նաև այն, որ միայն Արցախի ներկայացուցչի մասնակցությամբ չենք կարող ասել, որ լիարժեք խնդիր ենք լուծում, պետք է բոլոր կողմերը համաձայն լինեն»,- ընդգծեց Մարուքյանը: