Բարդուխ Գաբրիելյանը՝ Հայաստանի ջրի ամենամեծ պաշարի խնդիրների մասին

SHANTNEWS.am-ն արդեն հայտնել է, որ այսօր, Ջրի համաշխարհային օրվան նվիրված միջոցառման ժամանակ, ՀՀ բնապահպանության նախարար Էրիկ Գրիգորյանն անդրադարձել է Սևանից բաց թողնվող ջրի խնդրին.

«Այս ամառ այն 170 միլիոնը (խորանարդ մետր ջուրը), որն օրենքով նախատեսված է, նախանշան չկա, որ դրանից ավելի պետք է վերցնենք։ Կախված է նրանից, թե ջրային համակարգն ինչպիսի ջրապահանջարկ կներկայացնի»,- ասել է նախարարը։

Ինչպես հայտնի է, վերջին տարիներին, ոռոգման սեզոնի խնդիրներով պայմանավորված, Սևանա լճից 170 մլն խմ-ից ավելի ջուր է բաց թողնվում: SHANTNEWS.am-ի հետ զրույցում Հայաստանի ԳԱԱ կենդանաբանության և հիդրոէկոլոգիայի գիտական կենտրոնի տնօրեն Բարդուխ Գաբրիելյանը խոսել է այն մասին, թե որքան կարևոր է օրենքով սահմանված այդ չափը պահպանելը.

«170 մլն խմ-ն օդից վերցրած թիվ չի: Երկարատև վերլուծության արդյունքում է հաստատվել, որ այդքան ջրառի դեպքում մենք չենք ունենա իջեցում: Սևանի մակարդակը չպետք է իջնի: Ինչո՞ւ, որովհետև եթե մենք ունենք բարձրացում, պարզ է, որ նոր ափամերձ գոտիներ են լվացվում, նոր կենսածին և սնուցող նյութեր են ավելանում ջրի մեջ: Եթե մենք ունենանք նույն մակարդակը կամ ավելի վատ՝ իջեցում, ապա ստացվում է, որ մենք ավելի վատ վիճակի ենք հասել»,- ասել է Հայաստանի ԳԱԱ կենդանաբանության և հիդրոէկոլոգիայի գիտական կենտրոնի տնօրենը՝ հավելելով, որ շարունակական բարձրացումն ուղղակի անհրաժեշտություն է:

Բարդուխ Գաբրիելյանը հիշեցրել է, որ ջրի որակն ու մակարդակն ուղիղ ազդեցություն ունեն նաև ձկան ու խեցգետնի պաշարների հարցում: Ունենում ենք օրգանական նյութի ավելցուկ, ի դեմս՝ ֆոսֆորի, որը հանդիսանում է սահմանափակող գործոն Սևանա լճի համար: Գաբրիելյանը նաև նշել է, որ անցյալ տարվա մասշտաբային ծաղկումը հենց այդ ավելցուկի մասին էր վկայում:

Ըստ Գաբրիելյանի՝ դրանից խուսափելու համար պետք է շարունակել աշխատել 3 ուղղությամբ՝ բարձրացնել լճի մակարդակը՝ ապահովելով սնուցող նյութերի նոսրացումն ու լճի ծավալի մեծացումը, ապահովել ջրահավաք ավազանի մաքրությունը, ունենալ ձկան ու խեցգետնի պաշարների ավելացում։

«Այդ ջրիմուռներով սնվում են այն կենդանիները, որոնցով սնվում են այդ ձկները: Այսինքն՝ եթե մենք ձուկը նորմալ չափով ունենանք և արտահանենք լճից, դրանով իսկ մենք արտահանում ենք օրգանական նյութի ավելցուկը լճից և ապահովում ենք ջրի որակի բարելավում»,- հավելել է Գաբրիելյանը: