Վաղը մեկը կարող է ասել՝ նախարարը թվերին չի տիրապետում. Նիկոլ Փաշինյանը՝ Գաբրիել Ղազարյանին

ՀՀ կառավարությունը մարտի 25-ի արտահերթ նիստում որոշում կայացրեց «1148 Արտադպրոցական դաստիարակության» ծրագրի «11006 Արտադպրոցական դաստիարակություն հասարակական կազմակերպությունների կողմից» միջոցառման իրականացման համար 2019 թվականի պետական բյուջեից 626,311,000 ՀՀ դրամի չափով ֆինանսական հատկացում անել դրամաշնորհային մրցույթի արդյունքում հաղթող ճանաչված կազմակերպություններին:

Զեկուցող, ՀՀ սպորտի և երիտասարդության հարցերի նախարարի պարտականությունները կատարող Գաբրիել Ղազարյանին դիմելով՝ ՀՀ վարչապետ Նիկոլ Փաշինյանը նշեց՝ Հայաստանում կան մարզադպրոցներ, մարզական կրթության համակարգ, ընդ որում՝ կան սպորտդպրոցներ, որոնք ԿԳ նախարարության համակարգում են, կան նաև այնպիսիք, որ Սպորտի նախարարության համակարգում են, ինչպես նաև մարզադպրոցներ կան, որ համայնքապետարանների ենթակայության կամ մարզական միությունների ենթակայության ներքո են:

«Մենք ունենք մարմնակրթական չորս ուղղություն, երեքն այսպես թե այնպես պետական են, սպորտդպրոցներն ինչո՞վ են տարբերվում մեկը մյուսից»,- հարց ուղղեց նա:

Ղազարյանը նշեց, որ իրականում չեն տարբերվում, քանի որ նույն գործունեությունն են ծավալում այդ մարզադպրոցները, նկատեց՝ սա ավանդույթ է, վաղուց՝ Խորհրդային միությունից եկած, երբ յուրաքանչյուր մարզական միություն ուներ իր ուղղվածությունը: Նա ասաց, որ դա հաճախ համայնքային սեփականությունն է, որ օգտագործում են որպես մարզադպրոց, ապա տեղեկացրեց, որ վարչապետի հանձնարարականով այժմ ծրագիր են մշակում մարզադպրոցների՝ միասնական, աշխատանքային քարտեզ գծելու:

«Դրա գլոբալ ուսումնասիրությունները կավարտենք և արդյունքի կհասնենք 3-4 ամսվա ընթացքում»,- ասաց նա:

Վարչապետն արձագանքեց՝ հարցեր են լինում, որոնց պատասխանը միանշանակ չի լինում, օրինակ՝ քանի՞ երեխա է զբաղվում ըմբշամարտով:

«Մենք չունենք աշխատելու պարամետրեր, չգիտենք՝ ի՞նչ կարիքներ ունենք, ո՞նց կառավարենք դրանք, ի՞նչ սպորտդպրոցների անհրաժեշտություն ունենք: Մեր երկրում որևէ տվյալ վերցնելիս անպայման կպարզվի, որ դու որպես նախարար, վարչապետ կամ պատգամավոր ինչ-որ թվի չես տիրապետում»,- նշեց Փաշինյանը:

Ղազարյանը հայտնեց, որ կան 174 մանկապատանեկան մարզադպրոցներ, 2-ը՝ ԿԳՆ ենթակայության տակ, 24-ը՝ սպորտի և երիտասարդության նախարարության, մնացածը` համայնքային ենթակայության տակ:

«Հիմա այդ 170-ի մեջ մարզական միությունները մտնո՞ւմ են»,- հետաքրքրվեց վարչապետը, ինչին Ղազարյանը բացասական պատասխան տվեց:

«Տեսա՞ք: Ներողություն եմ խնդրում, բայց մեկը վաղը կարող է ասել՝ նախարարը չի տիրապետում թվին, բա «Սևան» մարզական միությո՞ւնը, բա «Հայաստան» միությո՞ւնը, բա «Դինամո» մարզական միությո՞ւնը… հենց տեղում այդ պրոբլեմի հետ բախվեցինք»,- ասաց Փաշինյանը:

Կառավարության ղեկավարը նաև կոչ արեց «թեթև տանել», որ ինչքան հարցերի մեջ խորանում են, այնքան բարդությունների մեծ փունջ է բացվում:

«Սա մեր աշխատանքն է, և այն պետք է համբերատար իրականացնենք»,- ասաց նա: