Արշալույսի գյուղապետի հարցի լուծումը կարող է լինել մարզում համայնքների խոշորացման ծրագիրը. Արմավիրի մարզպետ

Արշալույս գյուղի բնակիչներն այսօր կրկին բողոքի ակցիա են անցկացնում՝ փակելով Արմավիր-Երևան ճանապարհահատվածը: Ակցիան հաջողվել է դադարեցնել միայն մարզպետի միջամտությունից ու հորդորներից հետո:

Գյուղացիները, որոնց պահանջով ու քրեական գործերի հիմքով դադարեցվեցին նախկին գյուղապետ Զարզանդ Գրիգորյանի լիազորությունները, այս անգամ պահանջում են արտահերթ ընտրություններ անցկացնել՝  նշելով, որ տեղակալը ևս ապօրինություններ է թույլ տալիս:

Թե ինչ է տեղի ունեցել համայնքում, ինչ է պայմանավորվել մարզպետը գյուղացիների հետ ու ինչպես է պատկերացնում Արշալույսի հարցի լուծումը, այս մասին SHANTNEWS.am-ը զրուցել է Արմավիրի մարզպետ Համբարձում Մաթևոսյանի հետ:

Նա, ներկայացնելով նախապատմությունը, ասաց, որ բազմաթիվ քրեական գործեր են հարուցված Զարզանդ Գրիգորյանի նկատմամբ, նրա լիազորությունները դադարեցված են, իսկ տեղակալին` որպես ժամանակավոր պաշտոնակատար, ոչ թե ինքն է նշանակել, այլ օրենքի պահանջն է այդպիսին:

«Այս մասով կար թյուրըմբռնում, որ ես եմ նշանակել ժամանակավոր պաշտոնակատար: Ես չեմ նշանակել, դա օրենքի պահանջն է, երբ դադարեցվում են համայնքապետի լիազորությունները, ժամանակավոր պաշտոնակատարի լիազորությունները ստանձնում է տեղակալը»:

Սակայն հիմա գյուղացիները վիճարկում են ոչ թե հարցը, թե ով է նշանակել, այլ այն, որ տեղակալը ևս ապօրինություններ է թույլ տալիս: Համբարձում Մաթևոսյանը նշում է.

«Իհարկե, իրենք դժգոհություն ունեն, եթե համայնքապետից դժգոհում են, պետք է դժգոհեն նաև տեղակալից, տեղակալը հայեցողական հաստիք է, և նույն համայնքապետն է նշանակել տեղակալին: Բայց ժամանակավոր պաշտոնակատար մենք չենք նշանակել»:

Արմավիրի մարզպետը շեշտում է` ինքը, առանց չափազանցության, գյուղացիների ու կազմակերպիչների հետ հանդիպել է ոչ թե առաջին, այլ 10 անգամ:

«Ամեն անգամ շատ մանրամասն ներկայացրել ենք օրենքի պահանջներն ու օրինական լուծումները, հորդորել եմ, որպեսզի տանք խաղաղ լուծման ճանապարհ, միջպետական ճանապարհ փակելով հարցը չեն լուծում, քանի որ կա հստակ ընթացակարգ: Համայնքապետարանն աշխատելու է, այսօրվանից սկսել է, մնացածը ժամանակը ցույց կտա, քանի որ իրավունք չունեմ քննարկելու իրավապահ մարմինների լիազորությունների մեջ գտնվող գործընթացը»,- ասաց Մաթևոսյանը:

Նշեց, որ այսօր ակցիան իր հորդորով դադարեցվել է, իսկ թե ինչ հետագա քայլեր են պետք գյուղացիների պահանջը բավարարելու և նման իրավիճակներից զերծ մնալու համար, մարզպետը մեկ լուծում է տեսնում` դա, հավանաբար, կլինի համայնքների խոշորացումը, որն առաջին տարին է լինելու Արմավիրում և որի մաս կկազմի նաև Արշալույս գյուղը:

«Որպեսզի համայնքում լինեն արտահերթ ընտրություններ, նախ` պետք է քրեական գործերն ավարտվեն, որոնցով զբաղվում են իրավապահները, մենք նախատեսում ենք ամեն դեպքում, որ խոշորացման գործընթացը կսկսվի այս տարի, ու ամենայն հավանականությամբ, համայնքը միացման պրոցես կգնա: Դա այն ճանապարհն է, որով գնում է մարզպետարանը»,- ասաց նա:

Իսկ Զարզանդ Գրիգորյանն այլևս լիազորություններ չունի, այսինքն՝ գյուղացիները, ըստ մարզպետի, շահարկելու որևէ պատճառ չունեն, իսկ եթե համայնքապետի լիազորություններից դուրս ապօրինություններ է թույլ տալիս, իրավապահ մարմինները զբաղվում են դրանցով:

«Երբ կլինեն լիազորություններ արտահերթ ընտրությունների, նոր այդ ժամանակ իմ հայեցողությամբ կնշանակեմ ու կգնան արտահերթ ընտրությունների հունիսի 9-ին, եթե չեն գնում ընտրությունների, ուրեմն գնում ենք խոշորացման և համայնքների միացման ուղիով, քանի որ կարծում ենք, որ դա ամենաճիշտ ճանապարհ  է»,- վստահեցրեց նա: