Ինչպե՞ս ենք պատկերացնում, որ կարող ենք ԼՂ հարցը կարգավորել առանց Լեռնային Ղարաբաղի. Փաշինյան

ԵԽԽՎ-ում Թուրքիայի պատվիրակության անդամ Քամիլ Այդընը, դիմելով ՀՀ վարչապետ Նիկոլ Փաշինյանին, նախ` ընդգծեց՝ նրա ընտրությունից հետո մեծ հույսեր ունեին ԼՂ հակամարտության կարգավորման առումով, ապա հետաքրքրվեց բանակցային ձևաչափի փոփոխության մասին:

«Ես արդեն իսկ հարցրի ասել, որ մենք բացարձակապես բանակցային ֆորմատի փոփոխություն ո´չ ակնկալում ենք, ո´չ պահանջում, ո´չ էլ դա համապատասխանում է մեր ցանկություններին և տրամաբանությանը: Այդ ֆորմատը, որի շրջանակներում տեղի են ունենում ԼՂ հարցի խաղաղ կարգավորման քննարկումները, ԵԱՀԿ ՄԽ համանախագահությունն է: Երբ մենք հիմա վերցնենք և նայենք պատմությունը, թե ինչ է ԵԱՀԿ ՄԽ համանախագահությունը, ինչպես է այն ստեղծվել, կտեսնենք, որ ենթադրվել է ԼՂ ներկայացուցիչների մասնակցությունը գործընթացին, ոչ միայն ենթադրվել է, այլև ես քիչ առաջ ասացի. թվականը, ցավոք, չեմ կարող կոնկրետ հիշել, ենթադրում եմ՝ 94-95-96թթ., տեղի է ունեցել Ադրբեջանի նախագահ Հելդար Ալիևի հանդիպումը ԼՂ նախագահ Ռոբերտ Քոչարյանի հետ: Հանդիպումը տեղի է ունեցել Մոսկվայում, մեր ձեռքի տակ կան փաստաթղթեր, երբ այս կոմունիկացիան արվում է»,- ասաց նա:

Փաշինյանը նշեց, որ ԵԱՀԿ ՄԽ շրջանակներում ոչ միայն համանախագահներն են երեքը եղել, այլև եռակողմ ձևաչափով մասնակցություն են ունեցել Ադրբեջանի, Հայաստանի և ԼՂ ներկայացուցիչները: ՀՀ վարչապետն ընդգծեց՝ բացարձակապես բանակցային ձևաչափի փոփոխության հարց չի դրվում, այլ դրվում է բանակցային նույն ձևաչափում քննարկումը շարունակելու հարցը: ՀՀ կառավարության ղեկավարը շեշտեց՝ կա պարզ խնդիր, և սա մեզ համար բացարձակապես նախապայման չէ, քմահաճույք չէ, ոմանք նույնիսկ սկզբից սա փորձեցին որակել որպես ապակառուցողական դիրքորոշում, բայց ուղիղ հակառակն է:

«Մենք ասում ենք՝ ուզո՞ւմ ենք հարցը կարգավորել, թե՞ չենք ուզում: Եթե ուզում ենք, ինչպե՞ս ենք պատկերացնում, որ կարող ենք ԼՂ հարցը կարգավորել առանց Լեռնային Ղարաբաղի: Հաճախ օգտագործվում է «օկուպացիա» բառը, բայց այն մարդիկ, որ այսօր ապրում են Ղարաբաղում, նրանք ծնվել են Ղարաբաղում, ապրել են Ղարաբաղում, նրանց պապերն են ապրել Ղարաբաղում, նրանց պապերի պապերն են ապրել Ղարաբաղում, պապերի պապերի պապերը: Ինչպե՞ս կարող է մարդ օկուպացնել այն տարածքը, որտեղ ինքը ծնվել է, որտեղ իր երեխաներն են ծնվել, որտեղ ծնվել, ապրել են և հուղարկավորված են իր նախնիները: Ամեն կոնֆլիկտ, ամեն իրավիճակ պետք է նայել իր էության մեջ:

Հասկանալի է, որ այստեղ կան բազմաթիվ նրբություններ, մեր առաջարկն է նստել սեղանի շուրջ՝ կոնֆլիկտի բոլոր կողմերով, քննարկել բոլոր նրբությունները, համաձայնել, որ մենք խոսում ենք ոչ թե հարցի չկարգավորման, այլ կարգավորման մասին, որ մեր օրակարգը ոչ թե իրար ոչնչացնելու, այլ հարցերը կարգավորելու օրակարգ է, այնպես, ինչպես հարիր է 21-րդ դարի մարդկանց, ԵԽ անդամ երկու երկրների, պետություններին ժողովուրդների»,- նշեց վարչապետը:

Փաշինյանը հայտնեց՝ հենց այս տրամաբանությամբ է Հայաստանն առաջնորդվում, ասաց՝ ինքը վերջերս նույնիսկ հանդես է եկել գուցե շատ տարօրինակ թվացող նախաձեռնություններով, ասուլիսում հռետորական հարց է տվել հրապարակային՝ արդյո՞ք, օրինակ, Ադրբեջանի նախագահը կամ ղեկավարությունը ոչինչ չունի ասելու ԼՂ և Հայաստանի ժողովրդին:

«Ես կուզեի ունենալ հնարավորություն՝ դիմել Ադրբեջանի ժողովրդին և խոսել նրանց հետ, հիմա էլ կարող եմ, բայց չեմ ուզում՝ դա լինի միակողմանի և հանկարծ որևէ կերպ չընկալվի որպես սադրիչ քայլ: Ես ուզում եմ՝ այս խոսակցությունը կառավարությունների, ժողովուրդների, հանրության, երիտասարդության միջև սկսվի և տեղի ունենա, քանի որ մեր օրակարգը խաղաղության օրակարգ է: Մենք ֆորմատի փոփոխության հարց չենք դնում»,- ասաց Փաշինյանը: