Վրաստանի Պանկիսի կիրճում իրավիճակը շարունակում է լարված մնալ

Վրաստանի Պանկիսի կիրճում, որտեղ ՀԷԿ կառուցելու պատճառով բախում էր տեղի ուենեցել ոստիկանության ու տեղացիների միջև, իրավիճակը շարունակում է մնալ լարված:

Վրացական իշխանությունները կիրճում ՀԷԿ-երի կառուցման անվտանգության ու օգուտների մասին բնակչությանը երկխոսության կոչ են արել: Տեղացիները պատրաստ են երկխոսության մեջ մտնել գյուղից բավական հեռու ծրագրված երկրորդ ՀԷԿ-ի շինարարության շուրջ՝ շարունակելով պնդել, որ իրենց գյուղի մոտակայքում ՀԷԿ-ի շինարարություն թույլ չեն տա իրականացնել:

Տեղացիներն իրենց բողոքը պատճառաբանում են տեղանքի սողանքային վիճակով, գյուղատնտեսական նպատակներով օգտագործվող Ալազան  գետի ջրի հնարավոր պակասումով, որի վրա մտադիր են կառուցել ՀԷԿ-ը, մտավախություն ունեն, որ կկրճատվեն արոտավայրերի տարածքները, և ի վերջո բնակչությունը ստիպված կլինի լքել հարազատ վայրերը:

Միևնույն ժամանակ, գյուղի բնակիչները` կին, թե տղամարդ, ովքեր միասին քարերով ու փայտերով էին դիմավորել գյուղ մտած, իրենց նկատմամբ արցունքաբեր գազ  և ռետինե փամփուշտներ կիրառած ոստիկանական ջոկատներին, խնդրի շուրջ զիջումներ մտադրություն չեն ցուցաբերում: Ավելին, արձագանքել են Վրաստանի ՆԳՆ հայտարարությանը`օրինախախտներին ձերբակալելու մասին և հայտարարել, որ ամբողջ գյուղը կկանգնի և թույլ չի տա որևէ մեկին ձերբակալել:

Հանգստյան օրերին Պանկիսի կիրճում տեղաբնակների ու ոստիկանների միջև տեղի ունեցած բախումների հետևանքով տուժել էր 55 մարդ, որոնցից 38-ը` ոստիկան: Վրաստանի ներքին գործերի  նախարար Գեորգի Գախարիան հայտարարել է, որ  նույնականացվելու է միջադեպի  յուրաքանչյուր մասնակից և ցանկացած ոք, որը համարձակվել է հարձակվել ոստիկանին, կստանա համապատասխան պատիժ:

Արդեն հարուցվել է քրեական գործ, ընթանում է հետաքննություն ոստիկաններին ծեծելու և ուրիշի գույքը (պետական և մասնավոր ընկերության) փչացնելու հոդվածով: Միջադեպի օրը կիրճում տեղաբնակների հետ հանդիպմանը Վրաստանի ՆԳՆ-ն խոստացել էր բնակիչներին, որ գյուղի մոտակայքում ՀԷԿ-ի շինարարությունը կվերսկսվի միայն  բնակչության 90 տոկոսի համաձայնության  դեպքում:

«Թող որևէ մեկին ձերբակալեն, հետո կտեսնեն, թե ինչ տեղի կունենա: Այդպես հեշտ պարտվողներ չենք: Չգիտե՞՛ն, որ մեծ ուժ կա մեր կողքին՝ մեր ժողովուրդը: Օգնողներ շատ ունենք»,- ասել է բնակիչներից մեկը:

Կիրիճի բնակիչները մոտ երկու դար առաջ այդ տարածքում վերաբնակեցված չեչեններ են, որոնց վրացիներն անվանում են քիստեր: Ժամանակ առ ժամանակ նրանց ու տեղացիների միջև տեղի են ունեցել բախումներ:

Թբիլիսիի քաղաքապետ, նախկինում էներգետիկայի նախարար Կախա Կալաձեն, կարևորելով երկրում էներգետիկ ռեսուրսների ճիշտ օգտագործումն ու դրա շահութաբերությունը երկրի տնտեսության համար, «թշնամի» է անվանել բոլոր նրանց, ովքեր դեմ են  երկրի էներգետիկայի զարգացմանն ու էներգետիկ անկախությանը:

Մինչդեռ Վրաստանի Սեյսմոլոգիայի ազգային կենտրոնի տնօրեն Թեա Գոդոլաձեն կարծում է, որ Վրաստանը թանկ կվճարի երկրի սեյսմիկ գոտիներում հիդրոէլեկտրակայաններ կառուցելու համար:

«Վրաստանում հիդրոէլեկտրակայանների կառուցման բոլոր նախագծերը պետք է վերանայվեն, քանի որ դրանք երբեմն ստեղծվում են սեյսմիկ ակտիվ գոտիներում: Գետերի հետ կապված բազաների տվյալ չունենք: ՀԷԿ-երը կառուցում են այնպես, կարծես թխվում են հացի փռերում: Դրանք կառուցվում են անգամ սեյսմիկ գոտիներում` առանց հաշվի առնելու համապատասխան վտանգները: Խնդիրն այն է, որ մենք չունենք ՀէԿ կառուցելու շինարարական նորմեր»,- ասել է Գոդոլաձեն: