«Բարև Ձեզ, Հայաստան». ՀՀ-ում ԱՄՆ դեսպանը սկսել է բլոգ վարել

ՀՀ-ում ԱՄՆ դեսպան Թրեյսին սկսել է բլոգ վարել, որը նրան թույլ կտա ուղիղ կապի մեջ լինել Հայաստանի քաղաքացիների հետ՝ անդրադարձ կատարելով տարաբնույթ հարցերի, այդ թվում՝ ավանդական դիվանագիտական տիրույթից դուրս: Իր բլոգի անդրանիկ թողարկման մեջ նա խոսում է հայաստանյան իր առաջին տպավորություններից և պատմում Օհայո նահանգում գտնվող իր հայրենի քաղաքի մասին:

Դեսպանը բլոգի առաջին հոդվածը վերնագրել է «Բարև Ձեզ, Հայաստան»: Ստորև ներկայացնում ենք Թրեյսիի առաջին բլոգը:

«Ուզում եմ այս հարթակն օգտագործել, որպեսզի մարդիկ ինձ ավելի լավ ճանաչեն ու իմանան իմ խոհերն ու մտորումները տարաբնույթ հարցերի շուրջ, որոնք երբեմն նաև ավանդական դիվանագիտության համատեքստից դուրս են: Հուսով եմ, որ իմ գրառումները կօգնեն նաև ավելին իմանալ Միացյալ Նահանգների մասին և չկարծեք թե խոսելու եմ միայն մեր կառավարության մասին. կխոսեմ նաև բիզնեսի և, անշուշտ, մեր ժողովրդի մասին: Ես նաև անդրադարձ կկատարեմ շրջակա միջավայրի պահպանության, մտավոր սեփականության, մշակութային և այլ հարցերի:

Նախ՝ խոսեմ իմ մասին: Իմ անցած մասնագիտական ճանապարհի մասին կարող եք կարդալ իմ կենսագրականում, բայց կուզենայի ձեզ որոշ բաներ պատմել, որոնք այդ պաշտոնական տվյալներում տեղ չեն գտել: Երևի արժե սկսել իմ ծննդավայրից. ես ծնվել ու հասակ եմ առել Օհայո նահանգի Բարբերտոն քաղաքում: Ինձ համար քաղաքի ամենասիրված վայրերից մեկը Լեյք Անա զբոսայգին էր: Հայերի նման մենք էլ կարևորում ենք կանաչ գոտիների առկայությունը մեր բնակավայրերում: Բարբերտոնի հենց սրտում էր գտնվում Լեյք Անա զբոսայգին, ուր մարդիկ գալիս էին մասնակցելու համայնքային տարբեր միջոցառումների կամ էլ պարզապես անշտապ ճեմելու համար, հատկապես այն ժամանակ, երբ ծաղկում էին բալենիները: Ահա մի լուսանկար իմ հայրենի քաղաքից, որը, կարծում եմ, համահունչ է երևանյան գեղեցիկ գարնան հետ:

Հայաստանն ինձ շատ է դուր գալիս: Անցյալ շաբաթ հանգստյան օրերին դեսպանատան մի շարք գործընկերների հետ գինու համտեսի էինք գնացել: Ուրախալի էր իմանալ, թե հայկական գինիներն ինչպես են իրենց արժանի տեղը գտել տեղական ու միջազգային շուկաներում և, իհարկե, ճաշակել գինին՝ անձամբ համոզվելու թե ինչ է առաջարկում հայկական գինեգործությունը: Հաջորդը, թերևս, խորովածի համտեսն է:

ԱՄՆ պետքարտուղարությունն ունի մի ծառայություն, որը նորանշանակ դեսպանների համար պատրաստում է տեսանյութ, որով նրանք ներկայանում են դեսպանընկալ երկրի ժողովրդին: Գերազանց տեսանյութեր են պատրաստում, բայց ես նախընտրեցի հայ ժողովրդին ուղղված իմ տեսաուղերձը պատրաստել Հայաստանում: Անչափ շնորհակալ եմ հայաստանյան հեռուստաընկերությանը, որը պատրաստեց տեսահոլովակը՝ նկարահանումներ կատարելով Երևանի տարբեր վայրերում:

Հաճելի էր բացահայտել Երևանը՝ աշխատելով արհեստավարժ նկարահանող խմբի հետ: «Կադրից դուրս» որոշ դրվագներ եմ ուզում ներկայացնել, որպեսզի պարզ դառնա, թե ինչ հաճելի մթնոլորտ էր տիրում: Նկարահանման ժամանակ նաև շատ բան սովորեցի Հայաստանի պատմության և մշակույթի մասին:

Հուսով եմ՝ կհետևեք իմ բլոգին, որպեսզի ավելին իմանաք անձամբ իմ և Միացյալ Նահանգների մշակույթի ու արժեքների մասին: Մեր երկիրը շատ բազմազան է, և հուսով եմ, որ կկարողանամ դա ներկայացնել ձեզ: Եթե կան հարցեր կամ թեմաներ, որոնց կուզենայիք ես այստեղ անդրադառնայի, ապա ներկայացրեք ձեր առաջարկները մեկնաբանություններում»,- գրել է ՀՀ-ում ԱՄՆ դեսպանը: