ԱԱԾ գործողություններում ուղղորդում չեմ տեսնում. Արտակ Զեյնալյան

«Արմավիր» քրեակատարողական հիմնարկում օրեր առաջ ԱԱԾ մարմինների կատարած հետախուզական աշխատանքներին այսօր լրագրողների հետ զրույցում անդրադարձավ ՀՀ արդարադատության նախարար Արտակ Զեյնալյանը.

«Եթե օդափոխության համակարգ չկա քրեակատարողական հիմնարկներում, ջերմաստիճանը բարձր է, ապա առանց որևէ խտրականության, որևէ կոռուպցիոն դրսևորման, խցերի կերակրապատուհանները միշտ բաց են լինում: Իսկ եթե խցում չկա բանտարկյալ, դրա բաց ու փակ լինելը նշանակություն չունի: Դրա համար այդ օրը եղել են նաև փակ կերակրադռնակներ»:

Նախախարը նշեց, որ արդեն 1 տարի է` քրեակատարողական հիմնարկները գերբեռնված չեն, և ավելացրեց.

«Խցերի դռնակները բացվում են նաև, եթե որպես բողոք` ներսում հրդեհ են կազմակերպում, որպեսզի օդափոխություն լինի: Տեսագրության մեջ երևում է` խցերի մի մասում մարդ չկա, մյուսներն էլ բացվել են հրդեհի համար և որ հնարավոր լիներ դադարեցնել բողոքը»:

Իսկ ինչ վերաբերում է դատապարտյալների կողմից միմյանց իրեր փոխանցելուն՝ նախարարը նշեց, որ օրենքով նման արգելք չկա:

«Մենք քրեակատարողական ծառայակիցներին արգելել ենք միջնորդ հանդիսանալ այդ փոխանցման ժամանակ, և միևնույն ժամանակ ճաղավանդակները մեծացվել են՝ համապատասխան միջազգային չափանիշներին, քանի որ դրանք մեզ մոտ փոքր էին, և դա իրավունքների խախտում էր դիտվում: Մենք նաև չունենք զրահապատ ապակիներ, քանի որ նախապես կառուցման պլանին համապատասխան չի կառուցվել: Արդյունքում բանտարկյալներն այդ ճանապարհով փոխանցում են չարգելված իրեր: Այս հարցը կանոնակարգելու համար  կամ պետք է թույլ տալ, որ կրկին  աշխատակիցները դա անեն, կամ պետք է ներդրում անել՝ զրահապատ պատուհաններն ու կենտրոնացված օդափոխության համակարգը կյանքի կոչելու համար»:

Ի դեպ, այս ուղղությամբ ծրագիր արդեն գրվել է՝ ժամանակակից քրեակատարողական հիմնարկներն իրականություն դարձնելու համար անհրաժեշտ է 100 մլն եվրո:

Նախարարը նշեց, որ ԱԱԾ գործողություններում ուղղորդում չի տեսնում, մյուս բոլոր հարցերն իրավական դաշտում կկարգավորվեն.

«Դրանք իրականում ուղղակի կադրեր էին, իսկ թե ինչ է կատարվել, մենք կբացահայտենք ու կտեղեկացնենք, հատկապես այն, թե թաքստոցներում ինչ է եղել: Աշխարհի բոլոր բանտերում բջջային հեռախոսներ, սարքեր հայտնաբերվում են: Մենք գնում ենք այն ուղղությամբ, որ պարզապես այդ տարածքում որևէ բջջային հեռախոս չկարողանա աշխատել: Կոռուպցիոն ռիսկը բավական մեծ է այս համակարգում, քանի որ աշխատակցի աշխատավարձը ցածր է, և 3-4 հեռախոս ներս տանելով՝ նա մեկ ամսվա աշխատավարձի չափով գումար է «վաստակում»: Մենք ամեն օր շատ ավելի շատ սարքեր ենք հայտնաբերում, քան էդ օրը, որ արձանագրվել է: Եվ էն թաքստոցը, որի միջից, որ հայտնաբերվել է այդ սարքավորումը, հնարավոր է եղել բացահայտել միայն հատուկ տեխնիկայի ներգրավմամբ»:

Իսկ արդյո՞ք օրինական են ԱԱԾ գործողությունները հարցին` արդարադատության նախարարը հրաժարվեց իրավական գնահատական տալ: Նաև նշեց այն քրեական մշակույթը, որ կա մեր բանտերում, սնուցվում է դրսից:

«Մենք հիմա էլ օրենսդրական փոփոխություններ ենք անում, որ բանտից դուրս գտնվող քրեական մշակույթը, որը նաև ուղղորդում է բանտի ներսի գործողությունները, դադարի ուղղորդել»:

Լրագրողները մեջբերեցին նաև վարչապետի այն դիտարկումը, որ բանտերում կան արտոնյալներ: Նախարարը կրկին հայտարարեց՝ չկան.

«Որևէ խուց չկա, որ չի խուզարկվում, որևէ արտոնյալ չկա: «Զոն նայողների» արտոնությունները վերացված են, չկա անձ, ում մոտից ապօրինի իրերը չեն բռնագրավվում, ներսում գումարի շարժը վերացրել ենք: Սեղանի խաղեր կարող են խաղալ, բայց այդ խաղերով էլ են ղումար խաղում, ոչ թե առձեռն, այլ դրսի հետ կապ պահելով: Կամ պետք է զրահապատ ապակիներ կառուցենք, որն օդափոխման համակարգի հետ կարժենա 800 մլն դրամ, կամ աշխատակիցներ ավելացնենք: Այսօրվա աշխատակազմով վերահսկել հնարավոր չէ»:

Ի դեպ, օպտիմալացման շրջանակում նախատեսվում է «Դատապարտյալների հիվանդանոցի» և «Հրազդան» քրեակատարողական հիմնարկի օպտիմալացում: Նախարարը վստահեցրեց՝ կրճատումներ չեն լինելու, քանի որ աշխատակիցների դեֆիցիտ կա: Աշխատակիցներն ընդամենը վերապրոֆիլավորվելու են:

«Արմավիր» քրեակատարողական հիմնարկի ղեկավարն էլ սեփական կամքով հեռացման դիմում է գրել.

«Այսօր պետք է մուտքագրվի արդարադատության նախարարություն: Դա իր որոշումն է եղել»: