Շատ կուզեի ասել, թե իմ կյանքում ոչինչ չի փոխվել, բայց դա այդպես չէ. Մարիամ Փաշինյան

ՀՀ վարչապետ Նիկոլ Փաշինյանի դուստր՝ Մարիամ Փաշինյանը հարցազրույց է տվել Wnews.am կայքին: Հարցին, թե ինչով սովորաբար օրվա ընթացքում զբաղվում Մարիամ Փաշինյանը, նա պատասխանել է, որ շաբաթվա երեք օրը սկսում է մարզասրահ այցելելով:

«Ստաբիլ մարզվելը լավ է ոչ միայն մարմնի, այլև մտքի առողջության համար, երբեմն մարդիկ մտածում են, թե գնում ես մարզասրահ միայն նիհարելու համար, բայց ես, օրինակ, գնում եմ ինձ առողջ, ուժեղ զգալու և միտքս անընդհատ թարմ պահելու համար: Սովորաբար առավոտներս սկսվում են սուրճով, ես այն մարդկանցից եմ, ում օրը սկսելու, ժպտալու, գործելու համար անպայման սուրճ է հարկավոր: Շատ եմ սիրում վաղ արթնանալ, օրվա իմ ամենասիրելի հատվածը հենց առավոտն է, բայց ստեղծագործական մտքերը, գաղափարները գալիս են գիշերը: Ավելի լավ եմ գիշերը մտածում, աշխատում: Օրս սիրում եմ հագեցնել լավ գրքերով, լավ մարդկանցով: Լավ մարդիկ ամենակարևոր նախապայմանն են, օրը լավը դարձնելու համար: Բոլորս էլ օրվա ընթացքում կարող ենք ինչ-որ խնդիրների բախվել, բայց մեզ շրջապատող մարդիկ օգնում են դրանք հաղթահարել և թեթև նայել իրավիճակին: Ես սիրում եմ շատ ծիծաղել ու անգամ դժվար իրավիճակների դեպքում հաճախ ծիծաղում եմ և առաջ անցնում»:

Լրագրողը նաև Մարիամ Փաշինյանից հետաքրքրվել է, թե արդյոք նա ունի նախընտրելի հայ դիզայներ և իր մայրիկի` Աննա Հակոբյանի նման, սատարո՞ւմ է հայ դիզայներներին:

«Կարծում եմ՝ շատ կարևոր է այն, ինչ իմ մայրն անում է հայ դիզայներների հետ աշխատելու շրջանակներում: Նա նախ` մրցակցություն է բերում հայ դիզայների մեջ, իսկ մրցակցությունը առաջին նախապայմանն է հաջողության հասնելու համար ցանկացած ոլորտում, նաև ներկայացնում է տեղական արտադրանքը և հասարակությունը ծանոթանում է դրան, հնարավորություն ունենում գնահատել ու քննադատել, ինչն էլի կարևոր նախապայման է հաջողության` տվյալ ոլորտում: Այս ոլորտում էլ շատ մեծ պոտենցիալ ունի Հայաստանը, ես դիզայներների հետ շփվել եմ ու տեսել, թե ինչ հրաշալի աշխատանքներ ունեն նրանք»,- պատասխանել է Մարիամ Փաշինյանը:

Մեկ այլ հարցի, թե արդյոք Մարիամ Փաշինյանին դո՞ւր է գալիս հայտնի լինել, թե՞ ոչ, աղջիկը պատասխանել է, որ երբ խոսքն իր մտքերի, գաղափարների, կարծիքների մասին է, իրեն դուր է գալիս, որ մարդիկ նկատում են, քննարկում, քննադատում են, բայց երբ քննարկում են, թե ինչ հագուստ է կրում, ինչպես է նախաճաշում կամ հյութ խմում, տհաճ է.

«Ինձ համար կարևոր է, որ իմ մասին հասարակությունն իմանա իրականությունը: Դժվար եմ համակերպվում, երբ իմ մասին պտտվում են իրականությանը չհամապատասխանող լուրեր: Օրինակ` խոսում են, որ ես գոռոզ եմ, եթե ես իրոք այդպիսին լինեի, իսկապես չէի նեղվի, բայց սա բացարձակ հեռու է իրականությունից: Ինձ համար կարևոր չէ` ինձ կհամարեն լա՞վը, թե՞ վատը, բայց կարևոր է, որ ես իրական լինեմ: Մեծ հաշվով, մարդկանց կարծիքը այն մասին, թե ես ինչպիսին եմ այս կարգավիճակում, ամբողջովին արտացոլում է իրենց տեսակը, թե իրենք ինչպես կլինեին, ինչպես կվարվեին, ինչպիսի կեցվածք կունենային, եթե լինեին իմ փոխարեն: Սա ամենամեծ բացահայտումն էր ինձ համար, որը թույլ տվեց տեսնել շատերի իրական տեսակը»:

Ամբողջական հարցազրույցը կարող եք կարդալ սկզբնաղբյուր կայքում: