Որ ոլորտում մոնիթորինգ է արվում, հայտնաբերվում է խախտում. Բաբկեն Պիպոյան

Ինչպես արդեն հայտնել ենք, քաղաքացու ահազանգի հիման վրա՝ ՀՀ ԿԵ սննդամթերքի անվտանգության տեսչական մարմինը վերահսկողական գործողություններ է իրականացրել Իրանի Իսլամական Հանրապետությունից աղ ներկրող «Սոլտեքս» ՍՊԸ-ում՝ «Եռակի մաքրազտված աղ» անվանմամբ աղի մեջ կալիումի և նատրիումի ֆերոցիանիդ ցուցանիշները ստուգելու նպատակով:

Փորձաքննության արդյունքներով պարզվել է, որ 22.02.2019թ. և 25.04.2019թ. արտադրության 100 գրամանոց փաթեթավորմամբ աղի խմբաքանակների մեջ կալիումի և նատրիումի ֆերոցիանիդ ցուցանիշը գերազանցել է սահմանված նորմը:

Շուկայում առկա անհայտ ծագման մթերքների և դրանց մոնիթորինգային գործիքակազմի մասին SHANTNEWS.am-ը զրուցել է «Իրազեկ և պաշտպանված սպառող» ՀԿ նախագահ Բաբկեն Պիպոյանի հետ:

Անդրադառնալով վերը նշված դեպքին՝ Պիպոյանը հայտնել է, որ այս դեպքը հերթական անգամ ապացուցում է, որ ոլորտային ուսումնասիրությունները հայտնաբերում են խնդիրներ:

«Պետք է մշակել համապատասխան ձևաչափեր, որոնք հնարավորություն կտան լրացուցիչ խոչընդոտ չդառնալ բիզնեսի համար, սակայն մյուս կողմից սահմանային հսկողություն իրականացնել այնպես, որ շուկա հանվող ապրանքը, մեղմ ասած, նախնական երաշխավորություն անցած լինի»,- ասել է  նա:

Բաբկեն Պիպոյանի խոսքով՝ երբ կատարվում են ստուգումներ և ոչ մի բան չի հայտնաբերվում, ստացվում է, որ ստուգումը լրացուցիչ խոչընդոտ է, սակայն, երբ ստուգման ընթացքում խնդիր է հայտնաբերվում, այն դառնում է հիմնավոր:

Այսպիսով՝ Բաբկեն Պիպոյանը կարծում է, որ հարկավոր է գտնել այն մեխանիզմները, որոնք կարող են քիչ ստուգմամբ շատ բան հայտնաբերել:

Փորձագետի խոսքով՝ այս դեպքում նա գնահատում է անկեղծությունն առ այն, որ մոնիթորինգներ այս ոլորտում չեն արվել, և նոր է պլանավորվում պետական բյուջեից դրանք անցկացնել.

«Փորձը ցույց է տալիս, որ հանրային վերահսկողության արդյունքում որ ոլորտում մոնիթորինգ է արվում, հայտնաբերվում է խախտում: Որպեսզի խուճապ չառաջանա, պետք է ուշադիր լինենք պահպանման և տեղափոխման պայմաններին համապատասխան ապրանք ձեռք բերելու հարցում»:

Բաբկեն Պիպոյանը նշեց, որ այս պահին կաթնամթերքի շուկայում է իրականացվում մոնիթորիգ, որի մասին տվյալները հասանելի կլինեն 10 օր անց:

Մեր այն հարցին, թե այս դեպքում ինչպե՞ս է կարգավորվում աղտոտված պոչամբարներից օգտագործվող մթերքի խնդիրը, Բաբկեն Պիպոյանը նշեց, որ այստեղ կան սնուցման սպեցիֆիկաների հետ կապված խնդիրներ, որոնցով զբաղվում են հատուկ մասնագիտացված կենտրոններ: