Լրջանալու և օգնության կարիք ունեն բոլոր այդպիսի կոչեր հնչեցնողները. Արփինե Դավոյանը՝ ՀՅԴ-ի կոչի մասին

«Ցավում եմ Դաշնակցության այսօրվա հանրահավաքում հնչեցրած այս շատ լրջագույն կոչի համար, որովհետև նման ավանդական կուսակցությունը, նման արժեքներ կրող կուսակցությունը, ավելի քան 100 տարվա պատմություն ունեցող կուսակցությունը, որ այսօր զբաղվում է այսպիսի մանր-մունր ցույցերով, փորձում է խորհուրդ տալ իշխանությանը, այն իշխանությանը մաս կազմող մի մասը, որը մասնակցել է ՀՀ-ում տեղի ունեցած թալանին, տեղի ունեցած հանցագործությունների պարտակմանը և միշտ արդարացրել է ՀՀ-ում իշխող ուժ ՀՀԿ-ին: Նման կուսակցությունն այսօր ունի նման համարձակություն օգտագործել նման հռետորաբանություն և մեղադրել ՀՀ ներկա իշխանությանը որևէ բանում, ուղղակի ծիծաղելի է»,- այսպես է արձագանքում ՀՀ ԱԺ «Իմ քայլը» խմբակցության և ՔՊ անդամ Արփինե Դավոյանը Ազատության հրապարակում ՀՅԴ-ի հանրահավաքի ժամանակ իշխանությանն ուղղված կոչերին:

Հիշեցնենք, որ ՀՅԴ-ն Ազատության հրապարակում հանրահավաք էր հրավիրել «Լրջացե՛ք» խորագրով, որի ընթացքում հայտարարվեց, որ դեղին քարտ են ցույց տալիս ներկայիս իշխանությանը և հորդորում լրջանալ՝ շեշտելով, որ այս մեկ տարվա ընթացքում Հայաստանում շատացել են ջրբաժանները:

ՀՅԴ Հայաստանի ԳՄ ներկայացուցիչ Իշխան Սաղաթելյանի այն հայտարարությանը, թե իշխանությունը զարգացման ծրագիր և պրոֆեսիոնալ թիմ չունի, աշխատում և շնչում է անցյալով, որովհետև դա հեշտ է և անպատասխանատու, պատգամավորն այսպես է պատասխանում.

«Ցավում եմ իրենց համար: Սրանով էլի իրենք իրենց են հիշեցնում, որովհետև այդ անցյալը կերտողները իրենք են եղել: Իրենք զգում են, որ այդ անցյալի մեղավորության մի բաժինը իրենք ունեն և խղճի խայթ են զգում, թեև կասկածում եմ դրանում: Ես կարծում եմ, որ դաշնակներն ընդհանրապես պետք է նույնիսկ չսկսեին նման ձևով մեղադրանքներ հնչեցնել իշխանությունների հասցեին, որովհետև կայծակնային արագությամբ Դաշնակցությունը դուրս եկավ կոալիցիոն կառավարությունից և ապահովագրեց իրեն: Երբ որ իրենք կոալիցիայից դուրս եկան և հայտարարեցին, որ իրենք չեն ուզում կազմել ՀՀԿ-ի իշխանության մաս և այլն, և այլն, իրենք դա չարեցին ինչ-որ արդար մղումներից դրդված՝ հաշվի առնելով թե ինչպիսի քաղաքական հետագիծ ունեն նրանք ՀՀ-ում: Դա նրանք արեցին նրա համար, որ կարողանում են ինչպես միշտ կողմնորոշվել, փորձում են շատ արագ տեղավորվել: Շատ արագ հասկացան, որ կարող են նոր կառավարության կազմում տեղ գտնել»:

Իշխան Սաղաթելյանն իր ելույթում նշել էր նաև, որ ՀՅԴ-ն պատրաստ է օգնել իշխանությանը առանց աշխատավարձի ու պարգևավճարի, հանուն երկրի: Արփի Դավոյանի խոսքով՝ ՀՅԴ-ն կարող է ապրել առանց իշխանության կից լինելու: Ըստ նրա՝ այդ քաղաքական ուժը սովոր չէ ապրել առանց իշխանության:

ՀՅԴ Հայաստանի ԳՄ ներկայացուցիչը, ամբիոնից դիմելով իշխանություններին, հայտարարեց, թե պահանջում են դուրս գալ պոպուլիզմի թաքստոցից, զիջումների ճանապարհը կործանարար է ՀՀ-ի և ԼՂՀ-ի համար: Սաղաթելյանը համախմբվելու կոչ արեց՝ հորդորելով իշխանությանը ազատվել մենիշխանության ձգտումից և չկրկնել նախկինի սխալները:

«Հայաստանը ու՞մ է ի՞նչ զիջում, որը կործանարար է ՀՀ-ի և ԼՂՀ-ի համար: Խնդրում եմ խոսել փաստերով և անուններով: Այստեղ տեսնում ենք, թե ո՞վ ի՞նչ պոպուլիստական հայտարարություններ է անում»,- ի պատասխան այդ պնդումների՝ ասաց Արփինե Դավոյանը:

Նրա խոսքով՝ լրջանալու և օգնության կարիք ունեն բոլոր այդպիսի կոչեր հնչեցնողները, որոնք այսօր հավաքվել են:

«Մենք տեսնում ենք, թե ովքեր են այսօր հավաքվել Ազատության հրապարակում, ովքեր են հնչեցնում լրջանալու կոչեր, այդ «ովքեր»-ը մի քանի օր առաջ որտեղ էին հավաքվել և ինչպիսի կոչեր էին հնչեցնում: Ես կարծում եմ, որ մարդիկ պետք է հաշվի առնեն, որ բոլորս ունենք լավ հիշողություն»,- հայտարարեց պատգամավորը: