Գյումրիում սարդոստայն հիշեցնող հաղորդալարերը փաթաթված են գազի խողովակներին, իսկ հենասյուները թեքված են առանձնատների վրա

Գյումրիի  բազմաթիվ  թաղամասերում էլեկտրաենթակայանները վթարային են, եղած մալուխները՝  մաշված: Հիմնականում սեփական տներով բնակեցված թաղամասերում հոսանքալարերն անցնում են անթույլատրելի հատվածներով, որոշ տեղերում՝ խիստ խճճված ու անկանոն դասավորությամբ:

Նման վիճակի պատճառով թաղամասերում դեռ հաճախակի են Էներգաանջատումները, հոսանքի տատանումները: Վթարային իրավիճակներից ու հոսանքահարումներից ապահովագրված չեն Գյումրիի Հնոցավան թաղամասի բնակիչները:

Հոսանքալարերով ծանրաբեռնված փայտյա հենասյունը սեփական տան դիմաց է, որի կողքով անցուդարձ են անում ամբողջ թաղամասի բնակիչները: Փտած հենասյունը մոտ կես մետր թեքվել է տանիքի վրա, որտեղով էլ անցնում են բոլոր առաբձնատների հոսանքալարերը: Քամիների ու անձրևների ժամանակ դրանք ավելի վտանգավոր են դառնում:

Հնոցավան թաղամասի երկու ենթակայաններում վթարները քիչ չեն,  հոսանքի տատանումները՝  հաճախակի: Տներ մտնող մալուխները որոշ հատվածներում բաց են ու կցոններով, որոնք ոչ միայն թեքված հենասյան վրա են, այլև փաթաթված են գազի խողովակներին կամ անձրևատար թիթեղներին:

Հաղորդալարերն անթույլատրելի ու վտանգավոր հատվածներում հայտնվել են դեռ 90-ականներին, երբ էլցանցը հաշվիչները  բնակարաններից տեղափոխելու աշխատանքներ սկսեց: Հենասյուների բացակայության պատճառով մալուխները ձգվում էին ինչպես ու որտեղ հարմար էր։

Բնակիչներն էլ իրենց հերթին անկանոն հոսանքալարեր են անցկացրել: 25 տարուց ավելի է՝ թաղամասում նման վիճակ է: Բնակիչները դիմել ու դիմումներ են գրել, բայց նորոգումների հերթը, ինչպես քաղաքի շատ թաղամասերին մինչ հիմա չի հասել:

Էլցանցի գլխավոր ճարտարագետը Հնոցավան թաղամասի ենթակայանների վիճակից տեղակացավ ցույց տված լուսանկարներով: Նման տեսարանները թեև միայն այս թաղամասում չեն: Ենթակայաններում վերանորոգումները հերթի են դրված:

Արդյո՞ք Հնոցավան թաղամասում հնարավոր է աշխատանքներ տարվեն արտահերթ, ճարտարագետը բնակիչներին խորհուրդ տվեց սպասել մեկ ամիս: Իսկ այդ ընթացքում փտած հենասյան հարցը կլուծեն:

Վթարային ենթակայաններն ու մալուխները ծայրամասային թաղամասի բնակիչների միակ մտահոգությունը չեն: Կոյուղատարի համար  ջրմուղը փոսեր է փորել, իսկ փողոցի վերանորոգումը թողել են բնակիչներին :Փողոցը 10-ը տարուց ավելի է՝ անանցանելի է:

Չոր եղանակներին փոշին է, իսկ անձրևների ժամանակ՝ ցեխը: Թաղամաս մտնելը ոչ միայն մարդկանց, այլև մեքենաների համար անհնար է։

Ծայրամասային թաղամասի ապրողների ձայնն ու բողոքն այսքան ժամանակ տեղ չի հասել: Իրենք իրենց ուժերով են փողոցը հարթեցրել: Գումար են հավաքել և ավազով ու քարերով փոսերը փակել: Բայց արած գործն էլ մի քանի ամսվա կյանք ունի:

Հնոցավանի բնակիչները հիմա չգիտեն էլ իրենց փողոցը երկրորդական, թե ուղղակի անտեսվածներից է: Կենտրոնական փողոցների վերանորոգման ժամանակ եղել է, որ դիմել են գոնե քանդած ասֆալտն իրենց տան, որով փողոցի փոսերը կփակեին,  բայց  մերժել  են:

700 մետր երկարության փողոցը գոնե անցանելի դարձնելու համար թաղամասի բնակիչներով ստորագրահավաք են արել:  Բոլորի անուն ազգանուններով ու ստորագրություններով դիմումը հանձնել են քաղաքաապետարան: Սպասում են պատասխանի, որից էլ  կախված է, թե  բնակիչները հետո ինչ կձեռարկեն: