Լուրջ պրոցես չկա, քաղաքական դաշտը լցվում է անիմաստ խոսակցություններով. Մանվել Սարգսյան

ՀՀ և Արցախի իշխանությունների միջև վերջին օրերին սկսված բանավեճն ու հակասությունները՝ բանակցային գործընթացի մանրամասներին Արցախին իրազեկելու և այլնի շուրջ, դավադիրների փնտրտուքը կարո՞ղ են արդյոք անկանխատեսելի հետևանքներ ունենալ: SHANTNEWS.am-ի հետ զրույցում հարցին՝ ո՞ւր կարող է տանել այս վիճակը, քաղաքագետ Մանվել Սարգսյանը պատասխանեց.

«Ոչ մի տեղ էլ չի կարող տանել: Ընդամենը ստեղծված ընդհանուր իրավիճակից է, որ Հայաստանում փոխվել է իշխանությունը, Արցախի իշխանություններն էլ հաճախ կապված էին հին իշխանությունների հետ: Բնական է, ինչ-որ ցիկլ պետք է անցնի այնտեղ էլ, և եթե քաղաքական փոփոխություններ կատարվեն, այդ խնդիրները չեն լինի: Մի քիչ ուռճացված է էդ ամեն ինչը, կոնյունկտուրային բաներ էլ շատ կան դրա մեջ, և իրականում որևէ բան չեմ տեսնում»:

Արդյո՞ք իրավիճակն իսկապես մտահոգիչ չէ: Այս հարցին պատասխանելով՝ Սարգսյանը նշեց.

«Ի՞նչ մտահոգիչ, ի՞նչ պիտի լինի: Կադրերի մեծ մասին, որ եղել են, հենց Բակո Սահակյանն ինքն է պաշտոններից հանել: Ասենք, եթե ինչ-որ դժգոհ մարդիկ կան, ինչպես այստեղ, իրենք էլ արդեն առանց պաշտոնների ուղղակի իրենց ապագայի մասին են մտածում»:

Քաղաքագետը չի կարծում, որ իրավիճակն ինչ-որ ուժի կողմից ուղղորդվում է կամ ինչ-որ ուժի ձեռնտու է:

«Ամեն մեկին էլ կարող է ձեռնտու լինել: Պետք է հետևել, ամեն ինչ սահուն տանել ավարտին: Դժգոհ մարդիկ շատ են լինելու, բայց բաներ հորինել, մի քիչ էլ կարծում եմ՝ իշխանություններն են ավելացնում եղած-չեղածի դոզաները, իրականում որևէ բան չկա: Խնդիրն ինչն է. քաղաքական մեծ վակուում կա, կուսակցական աշխույժ գործունեություն գոյություն չունի, այդ թոհուբոհը փաստորեն լցվում է մամուլը, սոցիալական ցանցերը: Մանր-մունր, անէական, որևէ նշանակություն չունեցող պրոցեսներ են կատարվում, որոնք ներկայացվում են իբրև «դարակազմիկ» իրադարձություն: Իրականում ի՞նչ է ստացվում. միայն ինֆորմացիոն դաշտում են ինչ-որ բաներ կատարվում, ուրիշ ոչ մի բան էլ չկա, Քոչարյանի հրեշացումը, էլի ինչ-որ կոնյունկտուրային չգիտեմ ինչի համար»,- ասաց նա:

Սարգսյանի կարծիքով՝ քանի որ լուրջ պրոցես չկա, քաղաքական դաշտը լցվում է անիմաստ խոսակցություններով, սակայն ամեն ինչին լրջագույն տեղ տալ պետք չէ: Նա ընդգծեց՝ անընդհատ խոսվում է ռևանշի, դավադրությունների մասին, սակայն խորհրդարանական ընտրություններն եկան, անցան, ցույց տվեցին, որ առանձնապես ոչ ոք չկա, ոչ մի քաղաքականություն էլ գոյություն չունի:

«Ընտրությունների լավը դա է, ոչ մեկիս չի հարցնում, ցույց է տալիս իրական վիճակը»,- նշեց նա:

Հարցին՝ կարո՞ղ է այս իրավիճակը խթան հանդիսանալ, որ Արցախը վերադառնա բանակցային սեղանի շուրջ, և ինչպե՞ս է իրավիճակն ընկալվում դրսից, նա պատասխանեց.

«Դրսի համար որևէ բան չկա, պետք է աշխատանք տանել, որի սկիզբը դրվել է, Արցախը ներգրավել բանակցություններին, սկզբունքայնորեն շարունակել դա: Ադրբեջանը բավական վատ վիճակում է, դիվանագիտական ջղաձիգ քայլեր է անում, չեն կարողանում հարցերին պատասխանել, այն պարզ հարցերին, որ բերվում են Հայաստանի կողմից, ոչ մի պատասխան չունեն, փաստորեն Հայաստանը թելադրեց նոր օրակարգ, իրենք էլ ոչ մի պատասխան չունեն, այսպիսին է իրավիճակը»: