Աշոտ Մելքոնյանը տարակուսանքի մեջ է․ ինչո՞ւ հայտնվեց Վրաստանի «սև ցուցակում»

Երեկ երեկոյան` «Կարծախի» անցակետով անցնելիս, ՀՀ ԳԱԱ պատմության ինստիտուտի տնօրեն Աշոտ Մելքոնյանին Վրաստանի սահմանային ծառայության աշխատակիցները թույլ չեն տվել մուտք գործել Վրաստան։ Աշոտ Մելքոնյանը, ով ծնունդով Ախալքալաքից է, խումբ է տարել Արևմտյան Հայաստան և վերադառնալիս երեկ երեկոյան՝ 22:00-ի սահմաններում, նրա մուտքը Վրաստան արգելվել է, տարբեր միջամտությունների արդյունքում կարողացել են նրան տրանզիտով Հայաստան հասցնել: Մելքոնյանին միայն ասել են, որ նպատակահարմար չէ նրա մուտքը Վրաստան, նման գրություն են տվել: Այվազյանը տեղեկացրեց, որ փորձում են վրացական իշխանություններից ճշտել պատճառները:

Աշոտ Մելքոնյանը SHANTNEWS.am-ի հետ զրույցում նշեց՝ իր մուտքն արգելելու ոչ մի պատճառ չի ասվում: Նա պատմեց, որ այս տարի հաճախակի է այցելել Վրաստան:

«Եղբայրս հիվանդ էր, ես էլ, բնականաբար, պիտի շուտ-շուտ գնայի: Շատ ծանր հիվանդ էր, անբուժելի, հիվանդությունը հայտնաբերվելուց հետո մեկուկես ամսվա ընթացքում եղբայրս մահացավ. փետրվարին սկսվեց հիվանդությունը, մարտի վերջին մահացավ: Ես էլ, հասկանալով՝ վախճանն ինչ պիտի լինի, հաճախակի այցելում էի՝ շաբաթ-կիրակի օրերին, ուրբաթ՝ աշխատանքից հետո, գնում էի, կիրակի վերադառնում: Դե, մահվանից հետո՝ թաղում, քառասունք, Զատիկ, իր ծնունդը՝ մայիսի 24-ը: Ըստ երևույթին, իմ այցելությունները դիտվեցին իբրև վտանգավոր քայլ»,- ասաց նա:

Մելքոնյանը նշեց՝ ինքը հայ-վրացական բարեկամության ընդգծված ջատագով է եղել միշտ, համոզված ջատագով, վրացի գործընկերների հետ վերջին շրջանում սերտ համագործակցություն են սկսել, միասին ժողովածու են պատրաստել՝ հայերեն ու վրացերեն, Ջավախքում սեպտեմբերին կազմակերպել են երկու հանրապետությունների հռչակման հարյուրամյակին նվիրված գիտաժողով, որը փառահեղ անցավ, Հայաստանում Վրաստանի դեսպանատունը ողջունեց այդ միջոցառումը, ու պիտի շարունակեին: Գիտնականը խոստովանեց՝ կատարվածն անակնկալ էր իր համար:

«Շվարած եմ, թե ինչի արդյունք կարող է լինել, մնում է հավատալ, որ թյուրիմացություն է: Ես քաղաքական որևէ հայտարարություն չեմ արել, հակավրացական գործունեություն չեմ ծավալել՝ միայն այն պատճառով, որ համոզված եմ՝ հայ-վրացական հարաբերությունների վատացումն անդառնալի, կորստաբեր ու աղետաբեր կլինի երկու ժողովուրդների համար, միայն բարեկամական մթնոլորտում կարող ենք այս բարդ աշխարհաքաղաքական տարածաշրջանում դիմակայել»,- նշեց նա:

Մելքոնյանը մաքսատան աշխատակցից հետաքրքրվել է՝ ի՞նչ հիմքով է արգելվում իր մուտքը, սակայն վերջինս ոչինչ չէր կարող ասել, ասել է, որ ինքը միայն հրաման կատարող է, հետո, երբ ԱԳՆ մակարդակով միջամտություն եղավ, գիտնականին թույլ տվեցին, որ գոնե տրանզիտի տարբերակով գա Հայաստան:

«Հակառակ դեպքում մնում էր Կարսով վերադառնալ կամ Անկարա, կամ Ստամբուլ, այնտեղից օդանավով՝ Մոսկվայով կամ Կիևով վերադառնալ Հայաստան, հասկանալի է՝ դա ֆինանսական առումով ինչ խնդիր էր, էլ հոգեբանական կողմը չեմ ասում»,- ասաց ինստիտուտի տնօրենը:

Գիտնականը նշեց՝ իր մուտքը Վրաստան արգելելու հիմքերի մասին տեղեկություն չունի և գուցե չունենա էլ, ամբողջ խնդիրն այն է, որ այդ հարցով Վրաստանի համապատասխան մարմիններին դիմելիս անձը կարող է և բացատրություն չստանալ, միջազգային կարգ է:

«Ես ո՞ւմ կարող եմ ասել, թեպետ ծնունդով Ջավախքից եմ, մանկությունս, պատանեկությունս այնտեղ է անցել, դպրոցն այնտեղ եմ ավարտել, ծնողներս, եղբայրս այնտեղ են ամփոփված, իմ ընկերներն են այնտեղ, հարազատությունը, բայց ո՞ւմ կարող եմ դիմել, ոչ մեկին: Անհասկանալի վիճակ է, հույս ունեմ, որ կկարգավորվի: Ըստ երևույթին, թյուրիմացության հետևանք է, իրական պատճառներ չեմ տեսնում: Ստացվում է, որ հայ-վրացական բարեկամության ջատագով լինելը նման արգելքի պատճառ կարող է հանդիսանալ, այդտեղ տրամաբանություն չկա»,- նշեց նա: