Կարեն Պետրոսյանը հերքել է իր՝ ՇՊՀ ռեկտոր դառնալու և մրցույթները միտումնավոր տապալելու լուրերը

Այսօր «Երկխոսության մեդիա կենտրոնում» քննարկման  թեման եղել է ՇՊՀ -ի հավանական լուծարման կամ միավորման հարցը: Խնդիրը ակտուալ դարձավ մի քանի օր առաջ Կրթության, գիտության, մշակույթի և սպորտի նախարար Արայիկ Հարությունյանի  հայտարարությունից հետո:

«Նախարարի արած հայտարարությունը ես մեկնաբանել չեմ ցանկանում, որովհետև մարդն արել է հայտարարություն, իսկ ես շատ ուշադիր եմ կարդացել  յուրաքանչյուր բառն ու տառը: Էնտեղ հնչում է «եթե» բառը, որը էս պարագայում շատ կարևոր է, էնտեղ հնչում է «ս» տառը՝ բոլորս, որը ևս շատ կարևոր է»,- ասել է ՇՊՀ ռեկտորի պաշտոնակատար Երվանդ Սերոբյանը:«Եղել է նախարարի էմոցիոնալ հայտարարությունը, որովհետև ՇՊՀ-ն այնտեղ չէ, ինչպես ներկայացնում է նախարարը, այնտեղ էլ չէ, ինչպես ներկայացնում են շատ դասախոսներ: Էն շեշտադրումները՝ 85 տարվա բուհը, շուտով 90-ը բոլորող բուհը, բաժակի վրա լավ արտահայտություններ են, իրականության մեջ բուհում առկա վիճակը էդ 85 տարեկանի հետ ինչ կապ ունի»,- մեկնաբանել է ՇՊՀ հոգաբարձուների խորհրդի անդամ Սեյրան Մարտիրոսյանը:

«Դուք չեք կարող լուծարել մեր բուհը, հենց այնպես խփել մեկ այլ բուհի հետ, որովհետև ամեն բուհ ունի իր մշակույթը, ունի իր տեսլականը և մենք պարտավոր ենք քննարկել, երկխոսել և մեկս մյուսիս հիմնավորել անհրաժեշտությունը միավորման, հակառակ դեպքում միավորման  անհրաժեշտությունը հենց այնպես մեկի ցանկությամբ չի լինում»,- իր կարծիքն է արտահայտել ՀՊՏՀ Գյումրու մասնաճյուղի տնօրենի պաշտոնակատար Կարեն Պետրոսյանը, որն իր այս տեսակետը պնդել է նաև նախկին նախարար Լևոն Մկրտչյանի պաշտոնավարման ժամանակ ևս:

Այսօրվա  քննարկման մասնակիցները  այս համատեքստում խոսել են բուհում տիրող վիճակի մասին և կարծիքներ  հայտնել ռեկտորի  պաշտոնի համար հայտարարված երկու մրցույթների չհաջողված ելքի մասին, որոնց արդյունքում այդպես էլ թեկնածուներից և ոչ մեկը ռեկտոր չընտրվեց:

Հենց այդ  ընթացքում էլ համացանցում քննարկվեց այն տարբերակը, որ հոգաբարձուները կանխամտածված ռեկտոր չեն ընտրում, որպեսզի  Գյումրիում բուհերի միավորման գործընթաց սկսվի, իսկ միավորված բուհի ռեկտոր կդառնա Արայիկ Հարությունյանի ընկեր Կարեն պետրոսյանը: SHANTNEWS-ի  հարցմանն ի պատասխան՝ Կարեն Պետրոսյանն այս խոսակցությունները համարել է անհիմն:

«Ես այդ պրոցեսում որևէ ակտիվ դերակատարում  չեմ ունեցել և այս պահին  էլ  չունեմ, և ես չգիտեմ, արդյոք նմանատիպ գործընթաց, ըստ էության, կա, թե չէ: Ես պաշտոնապես հայտարարում եմ, որ  ՀՊՏՀ Գյումրու մասնաճյուղի օրակարգում չկա հարց, որ ինքը դառնա առաջատարը բուհերի միավորման գործընթացում»,- ասել է Կարեն Պետրոսյանը:ՀՊՏՀ Գյումրու մասնաճյուղի տնօրենի պաշտոնակատարը  նշել է, որ այդ խոսակցությունները տարածողներին պատասխանատվության ենթարկելու ժամանակ չունի, իսկ ինքը ազդեցություն ունենալ չի կարող Հոգաբարձուների խորհրդի անդամների, պատգամավորների վրա, որ մրցույթների ժամանակ դիտավորյալ ռեկտոր չընտրեն ու իր համար ենթադրյալ  միավորված բուհերի ռեկտոր դառնալու հնարավորություն ստեղծեն: