Իրան-ԱՄՆ հակամարտությունը նոր ընթացք է ստացել. Իրանն ամերիկյան ԱԹՍ է խոցել

Հունիսի 20-ի վաղ առավոտյան Իրանը ԱՄՆ-ի ռազմածովային ուժերին պատկանող անօդաչու թռչող սարք է խոցել: Սակայն տեղի ունեցածի վերաբերյալ Վաշինգտոնի և Թեհրանի հայտարարությունները տարբերվում են: Իրանը հայտարարում է, որ դրոնը խոցել է իր երկրի օդային տարածքում, մինչդեռ ԱՄՆ-ի պնդմամբ՝ դրոնը թռչում էր միջազգային օդային տարածքում: Այս միջադեպը է’լ ավելի է սրել երկու երկրների միջև առանց այդ էլ լարված հարաբերությունները:

Իրանի կողմից խոցված MQ4C Triton կոչվող անօդաչու թռչող սարքը կարող է հետախուզական առաքելություն իրականացնել 24 ժամ շարունակ: ԱՄՆ ռազմածովային ուժերը պատվիրել է 68 նման ինքնաթիռ՝ գրեթե 13 մլրդ դոլար ընդհանուր արժողությամբ: Դրոնի խոցման մասին հայտարարություն է տարածել «Իրանի Իսլամական հեղափոխության պահապանների կորպուսը»:

«Հորմուզի նեղուցի արևմտյան հատված վերադառնալիս դրոնը խախտել է Իրանի օդային տարածքը և զբաղվել տեղեկատվության հավաքագրմամբ և լրտեսությամբ: Տեղի ժամանակով առավոտյան ժամը 4:05-ին, երբ ինքնաթիռը Իրանի երկնքում էր, «Իրանի Իսլամական հեղափոխության պահապանների կորպուսը» խոցել է այն», – նշված է հայտարարության մեջ:

Այնուհետև պահապանների կորպուսի ղեկավար, գեներալ-մայոր Հոսեին Սալամին հայտարարել է, որ այս քայլի միջոցով Իրանը նախազգուշական ուղերձ էր հղում ԱՄՆ-ին:

«Ամերիկյան դրոնի խոցումը բաց, պարզ և կտրուկ ուղերձ է, որը նշանակում է, որ Իրանի սահմանները պաշտպանողները վճռորոշ քայլեր կձեռնարկեն ցանկացած օտարերկրյա ագրեսորի դեմ: Մեր թշնամիները կարող են ապահով լինել միայն այն դեպքում, եթե հարգեն Իրանի ինքնիշխանությունը, ազգային անվտանգությունը և ազգային շահերը: Մենք մտադրություն չունենք կռվելու որևէ երկրի դեմ, սակայն լիովին պատրաստ ենք պատերազմի»,- ասել է Սալամին:

Վաշինգտոնը, սակայն, հերքում է, որ խախտել է Իրանի օդային տարածքը: CNN-ի փոխանցմամբ՝ ամերիկյան պաշտոնյաները հայտարարել են, որ անօդաչու թռչող սարքը խոցվել է միջազգային օդային տարածքում՝ Հորմուզի նեղուցի երկնքում:

Տեղի ունեցածի վերաբերյալ թվիթերյան իր միկրոբլոգում գրառում է կատարել ԱՄՆ նախագահ Դոնալդ Թրամփը:

«Իրանը շատ մեծ սխալ է գործել», – գրել է Սպիտակ տան ղեկավարը:

Iran made a very big mistake!

— Donald J. Trump (@realDonaldTrump) June 20, 2019

Սպիտակ տունը հանդիպում է անցկացրել՝ քննարկելու ստեղծված իրավիճակը: Հանդիպմանը մասնակցել է ԱՄՆ նախագահ Դոնալդ Թրամփը, ԱՄՆ պաշտպանության նախարարի պաշտոնակատար Պատրիկ Շանահանը, բանակի հարցերով նախարարի պաշտոնակատար Մարկ Էսփերը, ինչպես նաև ԱՄՆ պետքարտուղար Մայք Պոմպեոն:

Հիշեցնենք, որ ԱՄՆ-ի և Իրանի հարաբերությունները ավելի են սրվել անցյալ շաբաթ Օմանի ծոցում նավթակիր տանկերների վրա տեղի ունեցած պայթյուններից հետո: Վաշինգտոնը կատարվածի մեջ մեղադրում է Թեհրանին: Վերջինս կտրականապես հերքում է իր առնչությունը պայթյուններին:

Հունիսի 17-ին ԱՄՆ պաշտպանության նախարարությունը հայտարարել է, որ մերձավորարևելյան տարածաշրջանում 1000 հոգանոց լրացուցիչ զորախումբ է տեղակայելու՝ ի պատասխան Իրանի գործողությունների: Ամերիկյան զինուժն արդեն ավիակիր հարվածային խումբ և B-52 ռմբակոծիչներ է ուղարկել տարածաշրջան: