Գյումրու ավագանին «Ֆրանկ Մյուլլեր»-ից հետ վերցրեց հանրակացարանի շենքն ու հաստատեց փոխքաղաքապետի թեկնածուին

Այսօր Գյումրու ավագանին արտահերթ նիստ է հրավիրել՝ օրակարգում նախապես ունենալով 2 հարց՝ կադրային փոփոխության  անդրադարձով: Հետո օրակարգը դարձավ 5 հարցից բաղկացած: Հրատապ ու առավոտյան օրակարգ ընդգրկած հարցերն էլ առաջնահերթ քննարկվեցին, որոնց նախագծերը ավագանին, ինչպես միշտ, ընդունեց միաձայն:

Արտահերթ նիստ հրավիրելու բուն պատճառը քաղաքապետի տեղակալի թեկնածուի հարցի քննարկումն էր: Փոխքաղաքապետ Վաղարշակ Մխիթարյանի հրաժարականից հետո անմիջապես շրջանառվեց թեկնածուի անունը:

Քաղաքապետարանի կրթության բաժնի պետ Հայկ Սուլթանյանը միակն հավակնորդն էր։ Հենց նրա նշանակման հարցն էլ ավագանին քննարկեց: Իսկ քվեարկությունից առաջ նախ տեղի ունեցավ հարցուպատասխան։

«Ինչ պետք է ձեզ էս չարչարանքի մեջ մտնելը, բացատրեք էլի»,- թեկնածուին հարց է ուղղել ավագանու «Գալա» խմբակցության անդամ Լևոն Բարսեղյանը:«Էստեղ աշխատելն ավելի շատ պարտասխանատվություն է, քան թե այլ բան, եթե դուք նայեք աշխատավարձի տեսակետից էլ էական  տարբերություն չկա, ավելի շատ մեծ բեռ է և, եթե քաղաքապետը ներկայացրել է, գտել է, քննարկել է, որ ես օգտակար կարող եմ լինել, ուրեմն  ես չեմ կարող հրաժարվել»,- պատասխանել է փոխքաղաքապետի թեկնածու Հայկ Սուլթանյանը: Հարցուպատասխանն այսքանով ավարտվեց, նույնքան արագ էլ տեղի ունեցավ քվեարկությունը: Միաձայն ավագանին հաստատեց Հայկ Սուլթանյանին նոր պաշտոոնում, իսկ քաղաքապետարանի կրթության բաժնի պետի պաշտոնը մնաց թափուր:

Թե ով կնշանակվի ժամանակավոր պաշտոնակատար, Հայկ Սուլթանյանը չի հստակեցրել, փոխանցել է, որ կհայտարարվի մրցույթ: Հետո անցել են հապճեպ օրակարգ ընդգրկված հարցերի քննարկմանը: Ներկայացվել է նախագիծ, որով չեղարկվում էր «Ֆրանկ Մյուլլեր» ընկերության հետ կնքած պայմանագիրը:Ժամացույցի գործարան կառուցելու նպատակով շվեյցարահայ գործարար Վարդան Սրմաքեշին էր հատկացվել նախկին ռադիոգործարանի հանրակացարանային մասնաշենքերից մեկը: Հիմա նույն հասցեի արդեն երկու մասնաշենքերն այլ նշանակության օգտագործելու համար նախատեսվում է տրամադրել «Հայաստան» Համահայկական հիմնադրամին, երկու մասնաշենքերում էլ կկառուցվեն բնակարաններ:

Համահայկական հիմնադրամի Գյումրիում առաջնահերթ ծրագերից է սոցիալական բնակարանների կառուցումը: Նախագիծն ընդունվեց: Հաջորդ երկար քննարկվող հարցը դարձավ հաստատված մի ծրագիր, որով մոտ 250 միլիոն դրամ դրամաշնորհային գումարով նախատեսված  էր նոր 39 ավտոբուս ներկրել Գյումրի:

Այսօր ավագանին որոշեց հրաժարվել ավտոբուսներից, փոխարենը թարմացնել կոմունալ տնտեսության ավտոպարկը: Մինչդեռ  քաղաքապետարանը նշում էր, որ հունիսից տրանսպորտային պարկը թարմացվելու է: Իսկ արդյո՞ք եղել է համապատասխան կարիքների հստակ ուսումնասիրություն:

«Էն, որ մեքենաների կարիք կա, հասկանալի է, քաղաքապետարանն ու կոմունալ բաժինը լավ գիտեն, բայց թե քանի մեքենա պիտի լինեն,քանի մեքենա լինի, որ լավ լինի, էս ամենը հարկավոր է նախապես պատշաճ ուսումնասիրել, դա ծախս է, ջանք և ժամանակ է պահանջում»,- հանդիմանեց Լևոն Բարսեղյանը:«Մենք մտածեցինք, որ եթե բերենք հիմա կիսատ կմնա այս ամենը, դժգոհություններն ավելի կշատանան և որոշեցինք նույն ձևի յոլա գնալ և առաջարկել ենք էն տրանսպորտային միջոցները և այն կարևոր կոմունալ ծառայության համար համապատասխան գործիքները, որոնք հնարավորություն կտան ուղղակի վերջնականորեն ունենալ այդ բազան»,- պատասխանել է Գյումրու քաղաքապետ Սամվել Բալասանյանը:
Երկու ձեռնպահով ավագանին այս նախագիծն էլ հաստատեց: Օրակարգի հարցերը սպառելուց հետո ավագանու անդամներին տեղեկացրին  կառավարության մերժած սուբվենցիոն ծրագրի մասին, ըստ որի, քաղաաքապետարանն առաջարկ էր ներկայացրել Գյումրու Մադոյան փողոցը կառուցապատել տուֆ քարով, ինչը կառավարության հավանությանը չէր արժանացել: