Վարձատրվող հասարակական աշխատանքի ծրագրերից Գյումրին ու Ախուրյանի տարածաշրջանի համայնքները չեն շտապում օգտվել

2 տարվա դադարից հետո այս տարի պետբյուջեից ֆինանսավորում է եղել վարձատրվող հասարակական աշխատանքների ծրագրի համար: Այն հիմնականում նախատեսում է բարեկարգման աշխատանքների միջոցով ժամանակավոր զբաղվածության ապահովում գրանցված գործազուրկների համար:

Բայց պետական ծրագրում համայնքային բյուջեներից նվազագույնը 10 տոկոսի համաֆինանսավորում է անհրաժեշտ: Շիրակի մարզի համար 12 ծրագրի գումար է հատկացվել, իսկ համայնքներից մի քանիսը հրաժարվել է մասնակցել: Գյումրիում ներկայացված 4 ծրագրերից միայն մեկին է որոշվել ընթացք տալ: Մյուսների համար Գյումրիի ավելի քան 3 մլրդ դրամ կազմող համայնքային բյուջեում մի քանի հարյուր հազար դրամ չի գտնվել:

Գյումրիի Իսահակյան փողոցի պուրակն է, որը նախկինում երբևէ եղած վարձատրվող աշխատանք ծրագրերի ցանկում է եղել: Բայց նորից գործ կա անելու: Ու միակ տարածքն է քաղաքում, որտեղ պետական ծրագրով բարեկարգման աշխատանքներ են սկսվել, այն էլ ժամկետների ուշացումով: Այգում բանվորները անցուղիներ են կառուցում, հետագայում խճապատում են անելու: Իսկ աշխատուժը՝ այս 6 բանվորն է: Նրանք զբաղվածության կենտրոնի գործազուրկներ են, ընդամենը 2 ամիս են աշխատանք ունենալու:

1 ծրագրի համար առավելագույնը պետբյուջեից 1 ու կես մլն դրամ է հատկացվում, որի առավելագույն գումարը՝ մեկ մլն-ից ավելին վճարվում է աշխատավարձ, մնացածը շինանյութի ծախսն է: Օրինակ` այս մեկ ծրագրի համար ամենաքիչը 150.000 դրամ համաֆինանսավորում պահանջվում է տեղական բյուջեից: Բայց համայնքները շահագրգիռ չեն ներդրումներ անել այսպիսի ծրագրերի համար: Գյումրիում և Ախուրյանի տարածաշրջանում 11 ծրագրերից 5-ն է ի վերջո մեկնարկելու: Շիրակի մարզպետի տեղակալ Վարդան Գրիգորյանի խոսքերով` փոքր համայնքները հիմնականում ծրագրերից հրաժարվել են բյուջեներում այդ ծրագրի համար գումարներ չնախատեսելու պատճառով:

Օրական 5000 դրամ աշխատավարձ է հաշվարկված, թեև սա, այսպես ասած, կեղտոտ աշխատավարձն է: Կենսաթոշակային վճարը չհաշված, բանվորին օրական հասնում է մոտ 4 հազար դրամ գումար: Փոքր գյուղական համայնքների պատճառաբանությունից չի տարբերվել նաև Գյումրիինը: Քաղաքապետարանը հրաժարվել է 3 ծրագրերից՝ բյուջեում գումար չկա բացատրությամբ: Շիրակի մարզպետի տեղակալը բացատրությունը տարօրինակ է համարում, ասում է հրաժարվելուց հետո փորձել են իրենց նախաձեռնությամբ որոշ ծրագրեր առաջարկել Գյումրիի քաղաքապետարանին՝ մանկապարտեզների, թանգարանների բակերի վերանորոգում և այլն, բայց դարձյալ հրաժարվել են:

Իսկ հրաժարված 3 ծրագրերն էին Հաղթանակի պողոտայի այգու, Մայր Հայաստան հուշահամալիրի ճեմուղու, Մուշ և Անի թաղամասերի բակային հրապարակների բարեկարգումը: Ըստ Շիրակի մարզպետի տեղակալի` բյուջեում տեղավորվել հնարավոր էր, պարզապես ցանկություն է պետք, իսկ քաղաքում եթե շրջենք, մանր-մունր շատ գործեր կգտնվեն, որոնք որ այս ծրագրով կարելի էր իրականացնել: 500 մլն դրամ տարեկան բյուջե ունեցող Ախուրյանը ևս վարձատրվող աշխատանք ծրագրերից հրաժարվել է:

Անբարեկարգ մայթեր ու փողոցներ ունեցող Ախուրյանը ընդամենը մեկ ծրագիր էր ներկայացրել, այն էլ ձախողվել է: Ջրառատ գյուղի դպրոցի մասնաշենքին կից տարածքի բարեկարգում էր լինելու, բայց պարզվել է, մասնաշենքը համայնքինը չէ: Համայնքապետի տեղակալ Լիպարիտ Տիգրանյանի խոսքով` դիմել էին պետգույքի վարչություն, որպեսզի շենքը համայնքապետարանի հաշվեկշիռ տրամադրվի, բայց փաստաթղթային գործընթացների ձգձգման պատճառով ծրագրից հրաժարվել են:

Վարձատրվող հասարակական աշխատանքները սանիտարական մաքրում չեն նախատեսում: Ոռոգման ցանցերի նորոգմանը կամ կառուցմանը պետական ծրագրով առաջնահերթություն էր տրված, բայց համայնքներից նման հայտեր ներկայացնելու շահագրգռություն չի եղել, երբ ոռոգման սեզոնին ամենաշատը գյուղերի բնակիչները բողոքում են ցանցերի վատ վիճակից: