Ռուս հատուկջոկատայինի սպանության մեջ մեղադրվող հայ երիտասարդը պատրաստ է հանձնվել իրավապահներին

Ռուս նախկին հատուկջոկատային Նիկիտա Բելյանկինի սպանության մեջ կասկածվող, հետախուզման մեջ գտնվող Հովհաննես Հայրապետյանը դժբախտ դեպքից մեկ ամիս անց կապի է դուրս եկել:

«Հայրը տեսաուղերձով դիմել է որդուն այն բանից հետո, երբ տղան կապի է դուրս եկել: Ես կարողացել եմ նրա հետ զրուցել, մենք անգամ տեքստ պատրաստեցինք նրա համար, որպեսզի նա մեղայականով ներկայանա: Նա խոստովանեց, որ ինքն է դանակով մահացու հարվածը հասցրել Նիկիտային, ինչպես նաև խոցել է կռվի մեկ այլ մասնակցի: Սակայն նա նշում է, որ դանակը վերցրել է այն բանից հետո, երբ Նիկիտան սկսել է կրակել: Նա իսկապես վիրավոր է, վերքեր ունի: Ես դրանք իմ աչքով եմ տեսել: Առաջին փամփուշտը դիպչել է Հովհաննեսի ոտքին, երկրորդը՝ կրծքին, երրորդը՝ վզին: Բուժօգնություն ստանալու համար նա չի դիմել, բայց ոչ պաշտոնապես նա ստացել է բժշկական օգնություն»,- «Կոմսոմոլսկայա պրավդա» պարբերականին պատմել է Հայրապետյան ընտանիքի փաստաբանը՝ Կարեն Ներսիսյանը:

Հովհաննեսի փաստաբանը նաև նշել է, որ երիտասարդը պատրաստ է հանձնվել, սակայն միայն մի դեպքում՝ եթե իրավապահները բաց թողնեն քրգործով անցնող ու անազատության մեջ գտնվող անմեղ մարդկանց: Հովհաննես Հայրապետյանը թաքնվում է ՌԴ տարածքում, բայց կոնկրետ որտեղ՝ փաստաբանին հայտնի չէ:

Հիշեցնենք, որ 2019թ. հունիսին Պուտիլկովո գյուղում՝ փողոցում բռնկված կռվի ժամանակ, դանակահարվեց ՌԴ գլխավոր հետախուզական վարչության ծառայող 24-ամյա Նիկիտա Բելյանկինը, ով, ստանալով կյանքի հետ անհամատեղելի վնասվածքներ, մահացավ:

Դեպքը տեղի էր ունեցել հունիսի 1-ի երեկոյան, երբ Բելյանկինը զբոսնում էր ընկերուհու հետ: Նրանք տեսել են ագրեսիվ մի խմբի, որ ծեծում էին մի տղամարդու: Տղան որոշել էր պաշտպանել վերջինիս և մի քանի նախազգուշական կրակոց է արձակել օդում՝ գազային ատրճանակից:

Դա զայրացրել էր ագրեսիվ խմբին, նրանք հարձակվել էին տղայի վրա, նրան նետել ասֆալտին, իսկ նրանցից մեկը տղային խոցել էր դանակով: Սրտի շրջանում ստացած հարվածից Բելյանկինը տեղում մահացել էր՝ ընկերուհու աչքի առաջ:

Ռուս հատուկջոկատայինի սպանության մեջ կասկածվող երկու անձ ձերբակալվել է: ՌԴ քննչական կոմիտեի տվյալներով՝ սպանության մեջ կասկածվող անձանցից մեկը ձերբակալվել է Հայաստան ուղևորվող ինքնաթիռում:

Ռուսական լրատվամիջոցները հաղորդեցին Բելյանկինի սպանության մեջ մեղադրվող, ձերբակալված հայի անունը՝ Սերգեյ Խոջայան: Ավելի ուշ ռուսական լրատվամիջոցները հայտնեցին, որ ձերբակալվածները 3 հայեր են՝ Նարեկ Ստեփանյանը, մոսկվացի տնտեսագետ Սուրեն Մարկոսյանը և գործազուրկ Սերգեյ Խոջաևը:

Հունիսի 6-ին Մոսկվայի մարզի Կրասնոգորսկ քաղաքի դատարանը խափանման միջոց ընտրեց այս միջադեպի մասնակիցներից մեկի համար: Դատարանը որոշեց 2 ամսով կալանավորել Հայաստանի քաղաքացի Նարեկ Ստեփանյանին` մեղադրելով նրան խուլիգանության ու ծրագրված խմբակային հարձակման մեջ: 26-ամյա Նարեկը չի ընդունել իր մեղքը:

Հունիսի 19-ին տեղեկություն տարածվեց, որ Պուտիլկովո գյուղում տեղի ունեցած միջադեպի մասնակիցներից մեկն անհետ կորել է: Անհետացածը Հովհաննես Հայրապետյանն էր, որը կասկածվում է նախկին հատուկջոկատայինի սպանության մեջ և միջադեպի ժամանակ հրազենային վնասվածք է ստացել։