Գյումրիում փողոցաշինական մեծ ծրագիրը դանդաղում է, խնդիր է նաև շինկազմակերպությունների թերֆինանսավորումը

Ավելի քան 2 ամիս տևած պարապուրդից հետո, Գյումրիի փողոցաշինական աշխատանքներում որոշակի ակտիվություն է, այն էլ ոչ բոլոր հատվածներում: Պարզ է, որ հունիսի 30-ն այլևս աշխատանքների վերջնաժամկետը չէ, նորն էլ սահմանված չէ: Հետաձգումների կամ ժամկետների խախտման պատճառներին, որոնք ամեն անգամ շեշտվում էին, որ նախագծային թերությունների շտկումներն էին ու ստորգետնյա ենթակառուցվածքների անկանոն ցանցը, գումարվում է թերևս ամենակարևորը՝ ֆինանսավորումը: Շինարարն արդեն բարձրացնում է թերֆինանսավորման հարցը, համապատասխան կատարողականները ներկայացրել, բայց քիչ են ֆինանսավորվել։

Գյումրու Երևանյան խճուղում հիմնանորոգման աշխատանքները որոշ հատվածներում սկզբնական փուլում են դեռ: Փողոցի, մայթերի նորոգումից, ստորգետնյա կոմունիկացիաների անցկացումից բացի, կամրջին հարող հենապատն են կառուցում, իսկ վերևով անցնում է երկաթգիծը: Մոտ 80 մետրանոց հենապատը վտանգավոր էր անցորդների համար: Այն վթարային էր ու քանդվել, նորն է կառուցվում:

Վազգեն Սարգսյան փողոցի մի մայթին դեռ փորման, կոմունիկացիաների անցկացման աշխատանքներ են, մյուսին՝ ասֆալտ են լցնում: Գործը միայն մայթերին է ավարտական փուլին հասել։ Շինարարն էլ չի մոռանում հիշեցնել, որ այստեղ 30 տարի մայթերը բացակայել են:

Գյումրու 12 փողոցներում և 2 հրապարակներում շինարարությունն անցած տարվանից էր սկսվել ու բոլորի համար ավարտի 1 ժամկետ էր սահմանվել՝ հունիսի 30-ը, բայց բոլոր փողոցները կառուցման տարբեր փուլերում են, որոշներում նույնիսկ ստորգետնյա նոր մալուխներ են հայտնաբերում: Արդեն 10 ամիս շարունակվող փողոցաշինական աշխատանքների ընթացքում, բոլոր շինկազմակերպություններն ունեցել են ու հիմա էլ ունեն ֆինանսավորման խնդիր։

«ԱԱԲ պրոյեկտ» շինկազմակերպության պատասխանատու Կարեն Մարտիրոսյանի խոսքերով՝ շինարարության ընթացքը դանդաղ տեմպերով է, քանի որ ինչ աշխատում են, ոչ մի գումար ընկերությանը չի փոխանցվել, միայն կանխավճար են ստացել ու անցած տարվա օգոստոսին։ Դրանից հետո ոչ մի վճարում ընկերությանը չի եղել։

Այսինքն՝ նախագծային թերությունները, կոմունիկացիոն ցանցի խնդիրները, որոնք պատճառ էին բերվում աշխատանքների ձգձգումների, միակը չէին: 2 ամիս շինարարությունը պասիվ վիճակում էր։ Աշխատանքային տեմպերը հիմա էլ շինարարը լիարժեք չի համարում, ֆինանսավորում չլինելու պատճառով աշխատուժի և շինտեխնիկայի քանակ չեն կարող ավելացնել:

Ասում է՝ միայն կարողանում են ընկերության միջոցներից բանվորների աշխատավարձը վճարել: Պատվիրատուն՝ քաղաքապետարանը, որոշ ժամանակ առաջ չէր ընդունում շինարարների աշխատանքը, չէր ստորագրում կատարողականները, ինչն էլ հետաձգում էր ֆինանսավորումը։ Հիմա կատարողականների մի մասը ստորագրված է, բայց ֆինանսավորումը նորից ուշանում է:

Ըստ Գյումրու գլխավոր ճարտարապետ Հենրիկ Գասպարյանի՝ կատարողականներն իրենք լրիվ, ինչքան ընդունել են, ֆինանսավորել են: Ու եթե շինկազմակերպությունը գումար չի ստացել, գուցե դա բանկային խնդիր է:

«Սիսիան ԲՈԱՏ» ընկերության պատասխանատուն ևս հաստատեց, որ թերի են ֆինանսավորվել, ներկայացրած 3 կատարողականներից միայն 1-ի դիմաց, մյուսը պատվիրատուն ստորագրել է, բայց ֆինանսավորում դեռ չկա։ Խնդիրը շինարարները ներկայացրել են նաև քաղաքաշինական պետական կոմիտեի նախագահի տեղակալին։ Մի քանի փողոցում նաև պատվիրատուի պահանջով կրկնակի աշխատանքներ են կատարվում։ Հիմնականում մայթեզրերի քարերի անորակ շարվածքը քանդում են, նորից շարում։ Որոշ հատվածներում նոր անցկացրած խողովակները դարձյալ փոխելու գործեր կան: Երկու ամսում բաց մնացած փոսերում դրանք կոտրվել են:

Առնվազն 3 փողոցի ջրահեռացման ցանցերը փոխելու համար 40 տեղով փողոցները լայնությամբ քանդվելու են։ Մեծ ծավալի աշխատանքները դեռ առջևում են, շինարարության ավարտի նոր ժամկետներ էլ չկան։ Քաղաքի գլխավոր ճարտարապետը հավանական կամ մոտավոր ժամկետներ էլ չի նշում: Ժամկետ չի նշվում նաև ծրագրի 2-րդ փուլի մեկնարկի կամ լինել-չլինելու մասին։ Համենայնդեպս, փողոցաշինական ծրագրի 2-րդ փուլի համար մրցույթներ հայտարարելու խոսք դեռ չի գնում: