Շոգը «սպառնում» է շոկոլադին, սուրճին, ալկոհոլին, ձկնամթերքին

Կլիմայի գլոբալ տաքացումը ռեալ սպառնալիք է մի շարք մթերքների համար:

Շոկոլադ

Կլիմայի փոփոխությունը բացասաբար կանդրադառնա կակաոյի ծառերի վրա: Օվկիանոսային և մթնոլորտային հետազոտություններով զբաղվող մասնագետների կարծիքով՝ մինչև 2050 թվականը չոր ու երկարատև անապատային կլիման կարող է ոչնչացնել կակաոյի ծառերը: Չնայած դրանք աճում են երկրագնդի ամենաշոգ վայրերում, բայց շատ քմահաճ են՝ պահանջում են կայուն բարձր ջերմաստիճան և խոնավություն, առատ տեղումներ, քամուց պաշտպանվածություն և լավ լուսավորություն: Այդ ծառերը կարող են աճել միայն  հասարակածից 20 աստիճան հյուիս կամ հարավ: Այդ պատճառով կակաոյի արտադրությամբ զբաղվում են միայն Արևմտյան Աֆրիկայի երկու երկրները՝ Կոտ դ՝Իվուարը և Գանան: Կլիմայի գլոբալ տաքացման հետևանքով այդ երկրներում ջերմաստիճանը կբարձրանա մոտ 4 աստիճանով: Դեռ 2014 թվականին շոկոլադի արտադրությամբ զբաղվող շվեյցարացի Բարրի Քոլբոտը հայտնել էր, որ շոկոլադը քառորդ  անգամ թանկացել է երաշտի և ծառերի հիվանդության պատճառով:

Այդ քաղցրավենիքի նկատմամբ պահանջարկն անընդհատ աճում է: 2020 թվականին շոկոլադի դեֆիցիտը կարող է հասնել 1 մլն տոննայի, իսկ 2030 թվականին՝ մինչև 2 մլն տոննայի:

Սուրճ

Սուրճի պլանտացիաները ևս կտուժեն կիմայի գլոբալ տաքացումից: 21-րդ դարի վերջին երկրագնդի բնակիչները կհրաժարվեն նաև սուրճից, կարծում են Ավստալիայի կլիմայի հարցերով ինստիտուտի մասնագետները: Համաձայն հետազոտության արդյունքների՝ 2050 թվականին սուրճի պլանտացիաները կիսով չափ կնվազեն: Մոտավորապես 2080 թվականին դրանք գրեթե կվերանան:

Ջերմաստիճանի բարձրացումը կարող է սուրճի պլանտացիաներում սնկային հիվանդությունների տարածման պատճառ դառնալ: Այդ պայմաններում իրենց շատ «հարմարավետ» են զգում նաև վնասատու միջատները:

Կարտոֆիլ 

Անցյալ տարի Եվրոպային պատուհասած շոգի հետևանքով  կարտոֆիլի բերքատվությունը նկատելի պակասել էր, քանի որ կարտոֆիլն «իրեն լավ է զգում» զով ու մեղմ կլիմայի պայմաննեում: Օրինակ՝ Մեծ Բրիտանիայում 58 օր ընդհանրապես անձրև չեկավ, կարտոֆիլի բերքը նվազեց 25 տոկոսով:  Դա վերջին 60 տարվա ընթացքում բերքատվության ամենացածր ցուցանիշն էր:

Բրիտանիայում սպառվող կարտոֆիլի 80 տոկոսն աճեցվում է հենց այդ երկրում: Կլիմայի գլոբալ տաքացումը, մասնագետների կարծիքով, կարող է մինչև 2050 թվականը մոտ 4 անգամ նվազեցնել կարտոֆիլի բերքատվությունը:

«Կարող է անհեթեթ հնչել՝ սովորական կարտոֆիլը դելիկատես կհամարվի, եթե գլոբալ տաքացումը չկանխվի»,-  կարծում են Վայրի բնության համաշխարհային հիմնադրամի մասնագետները:

Ալկոհոլ

Արևելյան Անգլիայի, Չինաստանի, Մեքսիկայի և ԱՄՆ-ի գիտնականները հայտարարել են, որ ջերմաստիճանի բարձրացումը կկրճատի նաև գարու պլանտացիաները, գարին, հիշեցնենք, գարեջրի հիմքն է:

Ամենավատ կանխատեսումներով՝ առաջիկայում գարեջրի արտադրությունը կնվազի մոտ 16 տոկոսով կամ 29 մլրդ լիտրով։ Գինը կարող է  բարձրանալ, ինչից ամենաշատը կտխրեն Չինաստանի բնակիչները, չէ՞ որ հենց նրանք են համարվում գարեջրի ամենամեծ սիրահարները։

Մոտ 50 տարի անց կարող է վերանալ նաև կոնյակը: Եթե ամռան շոգերը երկարում են, խաղողը հասնում է ցածր թթվայնությամբ և այլևս պիտանի չի լինում կոնյակի արտադրության համար:

Այդ խմիչքի սիրահարներին վստահաբար դուր չի գա կոնյակի փոխված համը, ինչը կնվազեցնի պահանջարկը:

Կոնյակ արտադրողները կկրեն ավելի քան 3.5 մլրդ դոլարի վնաս:

Շոտլանդիայում քաղցրահամ ջրի պակասից կտուժի վիսկիի արտադրությունը:

Բելգիայում գարեջրի արտադրությունն աստճանաբար փոխարինում է գինուն: 2012 թվականին այնտեղ արտադրվել է 300 000 լիտր գինի, իսկ 2015-ին՝ արդեն 1 մլն լիտր:

Ձկնամթերք

Համաշխարհային օվկիանոսի ջերմաստիճանի բարձրացումը կարող նվազեցնել ջրում առկա թթվածնի քանակությունը։ Հատկապես խոշոր ձկների չափսերը կփոքրանան․ 2050 թվականին դրանց չափսերը մոտ 25 տոկոսով կկրճատվեն։

Կնվազի նաև որսի ծավալը։ Ձկան որսն, ի դեպ, ամբողջ աշխարհում արդեն 5 տոկոսով նվազել է։ Բացի այդ, օվկիանոսի ջուրն ակտիվորեն կլանում է ածխաթթու գազ և դառնում ավելի թթու, ինչն արգելակում է խեցգետինների ու կակղամորթների պատյանի ձևավորմանը: