Գյումրու թիվ 1 պոլիկլինիկան չի փակվի, բայց կշարունակի աշխատել ֆինանսական լուրջ խնդիրներով

Գյումրու ամենահին 2 պոլիկլինիկաների շենքերը կապիտալ վերանորոգման են սպասում: Շենքերը հին են, պատմական նշանակության ու մոտ մեկ դար միշտ ծառայել են որպես բուժմիավորումներ: 2-րդ պոլիկլինիկան, որն ամենամեծն է իր մասնաշենքերով ու սպասարկվող բնակչության թվով, վատ պայմանների պատճառով մասնաշենքերն ամբողջությամբ չի օգտագործում: Իսկ առաջին պոլիկլինիկայի համար այն սեփական մասնաշենք չէ, վարձակալությամբ են զբաղեցնում:

Մեկ տարի շարունակ շրջանառվում էր թիվ 1 պոլիկլինիկան փակելու հարցը: Հիմա, թեև խնդիրը լուծված է համարվում, բայց բուժհաստատությունը շարունակում է մնալ ֆինանսական լուրջ խնդիրներով: Առաջին պոլիկլինիկան տասնյակ տարիներ գործում է քաղաքի պատմական ու հին կառույցներից մեկում, որը Կումայրի արգելոցին է պատկանում: Ինչքան որ շենքի տարիքն է, այդքան էլ հին են ներսի կահավորանքը, շինության հատակն ու ամբողջ սանհանգույցը: 16.000 բնակիչ է սպասարկում, աշխատանքային պայմանները ընդամենը փորձել են հարմարեցնել բուժհաստատության պահանջներին:

Պոլիկլինիկայի տնօրեն Այվազ Սուքիասյանի խոսքերով` բուժհաստատության համար գերխնդիր է շենքի վերանորոգումն ու բուժսարքավորումներով հագեցվածությունը: Շենքի վարձակալության դիմաց ունեցած պարտքերի պահանջից հետո, Գյումրու քաղաքապետարանը պարտադրում էր շենքն ազատել:

Տնօրենին ասել էին, որ շենքով հետաքրքրվողներ կային: Այս ամենը, սակայն, եղել է բանավոր: Հիմա արդեն շենքն ազատելու պահանջից չեն խոսում ու շարունակում են շենքում վարձով մնալ: Բայց քանի շենքը բուժհաստատության սեփականությունը չէ, գլխավոր պատճառ է, որ ներդրումներ չեն կատարվում հիմնանորոգման համար: Իսկ միայն պետական ֆինանսավորմամբ կապիտալ շինարարություն պահանջող շենքում բուժհաստատությունը ոչինչ փոխել չի կարող:

Նախկինից եկած պարտքերն էլ չեն նվազում, պետության ֆինանսավորման 90 տոկոսն էլ աշխատավարձի ֆոնդին է բավականացնում: Ըստ տնօրենի՝ պարտքեր ունեն նաև էլեկտրաէներգիայի և դեղորայքի դիմաց: Տնօրինությունը բուժքույրերի աշխատավարձից 5, իսկ բժիշկների աշխատավարձից 10 տոկոս հետ էր պահում պոլիկլինիկայի ծախսերը հոգալու համար:

2018 թվականի աշխատավարձի բարձրացումից հետո կառավարությունը դա թույլ չի տալիս: Առողջապահության նախարարությունից կա խոստում, որ հաջորդ տարվանից պետբյուջեից գումարներ տրամադրելիս հաշվի են առնվելու նաև բուժհաստատությունների պահպանման ծախսերը:

Գործունեության մոտ 85 տարվա պատմության մյուս բուժհաստատությունն էլ թիվ 2 պոլիկլինիկան է, որը դարձյալ քաղաքի հին շենքերից մեկում է ու նորից համարվում է արգելոցի շինություն:

Վճարովի ծառայությունների ու խնայողությունների հաշվին մասնակի կամ կոսմետիկ վերանորոգումները, մեծ հաշվով, շենքային խնդիրները չեն լուծում: Ամենավատ վիճակում գտնվում է ռենտգենի կաբինետը:

Ռենտգենի այս նոր սարքավորումը նվեր են ստացել, որը տեղադրելու համար կաբինետն են վերանորոգում: Տարիներ առաջ այս պոլիկլինիկայի մասնաշենքերից մեկի հատակը փլուզվեց, որից հետո ներդրումների շնորհիվ այդ հատվածում վերանորոգում կատարվեց: Բայց 2005 թվականին վերանորոգված մասնաշենքը հանձնվեց Արյան բանկին: Իսկ պոլիկլինիկան, ըստ տնօրեն Սիրանույշ Ղուկասյանի, մնաց չվերանորոգված մասնաշենքերով:

Պոլիկլինիկայի շենքի քանդված հատվածներին վերանորոգման հերթ չի հասնում, դրանք չեն էլ օգտագործում: Տնօրենի սպասելիքները հրատապ խնդիրների լուծման ծրագրից են, պոլիկլինիկայի մի հատվածն այդ ծրագրով է վերանորոգվել: Այլ դոնոր կազմակերպությունների էլ են դիմել, բայց պատասխան չեն ստացել: