Կդառնա՞ Ադրբեջանը ՀԱՊԿ գործընկեր. Պուտինը վավերացրել է ՀԱՊԿ կանոնադրությունն ու իրավական կարգավիճակը

ՌԴ նախագահ Վլադիմիր Պուտինը վավերացրել է այն արձանագրությունները, որոնք փոխում են Հավաքական անվտանգության պայմանագրի կազմակերպության (ՀԱՊԿ) կանոնադրությունն ու իրավական կարգավիճակը: Արձանագրության համաձայն՝ պետությունները, որոնք ՀԱՊԿ-ի անդամ չեն հանդիսանում, կիսում են կառույցի սկզբունքներն ու նպատակները, ցանկանում են փոխշահավետ համագործակցություն զարգացնել կազմակերպության հետ, կարող են ստանալ գործընկերոջ կարգավիճակ:

Մեկ անգամ չէ, որ հայտարարվել է տարբեր հարթակներում, որ այս նախաձեռնության հիմնական «թիրախները» Ադրբեջանն ու Մոլդովան են։

Միջազգային և անվտանգության հարցերի հայկական ինստիտուտի հիմնադիր, քաղաքագետ Ստյոպա Սաֆարյանը կարծում է, որ Հայաստանի համար մտահոգիչ պետք է լինեն այս փոփոխությունները, որովհետև այս մտադրությունները, որոնք ի սկզբանե եղել են ոչ այնքան գործընկերոջ կարգավիճակի, որքան ՀԱՊԿ-ի լիարժեք անդամի մասով, սկսվել են 2014-2015 թվականներից, և պատահական չէր, որ մինչև վերջերս էլ Ադրբեջանում ժամանակ առ ժամանակ փորձում էին քննարկել ՀԱՊԿ-ի շրջանակներում որոշակի կարգավիճակ ստանալու հարցը, ընդ որում՝ դա անում էին նաև իշխանական պատգամավորները:

«Թերևս 2016 թվականի ապրիլյան պատերազմը, դրանից հետո հայկական կողմի դեմարշներն ինչ-որ ձևով պասիվացրին այս զրույցները, թեպետ անցած տարվա մայիսից դեռևս Յուրի Խաչատուրովի օրոք կարծեք թե սկսվեցին այս փաստաղթերի վրա աշխատանքները, և դա էլ ինչ-որ առումով կասեցվեց Յուրի Խաչատուրովին Հայաստանի կողմից ետ կանչելով: Այժմ տեսանելի է, որ Ռուսաստանը հաջորդ քայլն է կատարում, ըստ որում՝ բավական լուրջ մարտահրավեր ստեղծելով դաշնակցի՝ Հայաստանի համար»,- SHANTNEWS.am-ի հետ զրույցում ասաց Ստյոպա Սաֆարյանը:

Նրա խոսքով՝ Ադրբեջանի դեպքում դեռևս բարդ է ասելը, թե արդյո՞ք նրանք կդիմեն՝ թեկուզ գործընկերոջ կարգավիճակով, որովհետև դա բավական մարտահրավերներ կարող է պարունակել հենց իր համար: Ըստ քաղագետի՝ պետք է ի նկատի ունենալ, որ մոտ օրերս Միացյալ նահանգները և ՆԱՏՕ-ն նույնպես ճանաչեցին երկու երկրներին՝ որպես ոչ անդամ, բայց գործընկեր պետություններ, և թերևս Ռուսաստանը, որպես ՆԱՏՕ-ին հակակշիռ, ՀԱՊԿ-ի դեպքում է փորձում կառույցի ընդլայման խնդիրները լուծել:

«Իրականության մեջ նկատելի է, որ Ռուսաստանը 2-3 տարիների ընթացքում չկարողացավ որևէ այլ հետխորհրդային երկրի ընդգրկել ԵՏՄ և այդ նախագծում: Այս պահի դրությամբ՝ գոնե այն երկրներն են, որոնք միաժամանակ համարվում են ՀԱՊԿ անդամ պետություններ: Որպեսզի լուծի այդ խնդիրը, կարծում եմ՝ փորձում է, այսպես ասած, ՀԱՊԿ-ի ընդլայման հարցը լուծել, որովհետև հետխորհրդային երկրների համար թերևս անվտանգության խնդիրներն օբյեկտիվորեն ավելի առաջնային են, նույնիսկ քան տնտեսական զարգացման հարցերը: Ռուսաստանը փորձում է այդկերպ այլ պետությունների, հատկապես Ադրբեջանին, Մոլդովային ներգրավել նախ անվտանգության բլոկում, որից հետո արդեն նոր ԵՏՄ-ի մեջ»,- կարծում է Ստյոպա Սաֆարյանը:

Քաղաքագետի խոսքով՝ Հայաստանը չպետք է թույլ տա, որ Ադրբեջանն անդամակցի ՀԱՊԿ-ին և պետք է կիրառի վետոյի իր իրավունքը:

«Հայաստանի կողմից հնարավոր քայլերից մեկը, բացի վետո կիրառելը, նաև պետք է լինի առայժմ այս արձանագրությունների վավերացման ժամանակ ուղղակի վերապահում կատարելը ԱԺ-ի կողմից, որ գործըկերոջ կարգավիճակ չեն կարող ստանալ այն պետությունները, որոնք անդամ երկրների համար պատերազմի սպառնալիք են ստեղծում»,-ասում է Ստյոպա Սաֆարյանը:

Մանրամասները քիչ անց՝ տեսանյութում: