Շտապօգնության բրիգադը փախել է ՊՊԾ գնդից. մանրամասներ դատարանից

Պարեկապահակային ծառայության գնդի գրավման գործով դատաքննությունն այսօր ևս շարունակվել է վկաների հարցաքննությամբ: Դատարանը, ի թիվս այլ վկաների, լսել է նաև Շտապօգնություն ծառայության  տնօրեն Թագուհի Ստեփանյանին:

Վկա Ստեփանյանը պատմել է, որ գնդի տարածքում առաջին իսկ օրվանից հերթապահություն են կատարել: Շատ մանրամասներ չի հիշում: Եթե նախօրոք իմանար` ինչ հարցեր պետք է տային, կպատրաստվեր: Այդուհանդերձ, հիշում է, որ հեռախոսով հաճախ է  խոսել ՊՊԾ գնդի անդամներից Արայիկ Խանդոյանի հետ: Խոսել է այն մասին, որ շտապօգնության բրիգադի անդամներին դուրս թողնեն, և բժիշկները հերթապահեն գնդից դուրս` հարկ եղած դեպում ներս մտնելու պայմանով: Մանրամասնում է՝  խոսքը  շտապօգնության այն բրիգադի մասին է, որի անդամների անունները այդ օրերին շատ լավ հայտնի էին՝ Մարինա Մարգարյան, Հովհաննես Հովհաննիսյան, Նորայր Թևանյան:

«Նրանց՝ գնդի տարածքից դուրս գալը շատ հանկարծակի է եղել: Ինչպես իրենք են ներկայացրել, էնպես էր եղել, որ իրենց կողքինները քնել են, իրենք կարողացել են էդտեղից ուղղակի դուրս գալ, գիշերվա ժամը մեկի, երկուսի կողմերը»,- ասել է նա:

Պետական մեղադրող Պետրոս  Պետրոսյանը հիշեցնում է՝  բուժքույրը դատարանում ցուցմունք է տվել և ասել, որ իրեն ոչ ոք  հարկադրաբար գնդում չի պահել:  Թագուհի Ստեփանյանն ասել է՝ եթե իրեն չեն պահել, թող դուրս գար, գնար աղջկա ծնունդին:

Մեղադրողը կրկին հիշեցրել է բուժքրոջ  ցուցմունքը՝ Մարինա Մարգարյանն ասել է՝ ցանկություն չի ունեցել գնալու աղջկա ծնունդին: Ամբաստանյալները հարց  են ուղղել՝ ինչպե՞ս եղավ,  որ շտապօգնության բրիգադները դադարեցին օգնություն ցույց տալ գնդում գտնվողներին, ի՞նչ փոխվեց նրանց աշխատանքում: Թագուհի Ստեփանյանը պատասխանել է, որ իրենց աշխատանքում ոչ մի բան չի փոխվել, շարունակել են հերթապահել:

Եվս երկու վկա է ցուցմունք տվել: Նրանք շատ  բան չէին հիշում և էական մանրամասներ չպատմեցին: Դատավոր Մեսրոպ Մակյանը տեղեկացրել է, որ 4 վկա էլ Հայաստանում չէ: Հրապարակվել են նրանց նախաքննական ցուցմունքները: Քանի որ առանցքային բոլոր վկաներն արդեն խոսել են դատարանում, պետական մեղադրողը միջնորդում  է սահմանափակել վկաների հարցաքննությունը և անցնել  հաջորդ  փուլին՝ ամբաստանյալների հարցաքննությանը: Ամբաստանյալները դեմ են: Վարուժան Ավետիսյանի համոզմամբ՝  միտում կա դատաքննությունն արագ ավարտել:

Դատավորը պարզաբանում է ՝ վկաների մի խումբը պետք է ցուցմունք տար 2015 թվականի ապրիլի 24-ին՝ ենթադրաբար  նախատեսվող ապստամբության գործով:

Հիշեցնենք ՝ քրեական գործի վարույթը դադարեցվել է, և համաներում է կիրառվել այդ մասով Պավել Մանուկյանի և Վարուժան Ավետիսյանի նկատմամբ: Չկա քրեական գործ, չկան վկաներ, իսկ այս քրեական գործով ևս 3 տասնյակ վկա դեռ կա:

Այսպիսով, մինչ այս պահը դատարանը հետազոտել է քրեական գործի գրավոր և իրեղեն ապացույցները, տեսանյութերը և ձայնագրությունները, հարցաքննել է տուժողներին և վկաներին: Այժմ դադարեցնում  է վկաների հարցաքննությունը և անցնում  ամբաստանյալներին:

Հաջորդ  նիստին կլսեն քրեական գործի անջատված մասով ամբաստանյալներ Արմեն Լամբարյանին և Խաչատուր Գիչյանին:  Հետո  կանցնեն այս գործով անցնող ամբաստանյալների հարցաքննությանը: