Հայաստանի հավաքականի միակ աղջիկ ձյուդոիստը մասնակցելու է աշխարհի առաջնությանը

Ձյուդոյի Եվրոպայի պատանեկան առաջնության չեմպիոն, 15-ամյա Սուսաննա Ստեփանյանը պատրաստվում է աշխարհի առաջնությանը: Պատանեկան առաջնության ոսկին Սուսաննան նվաճել է երկու ամիս առաջ: Ամառային արձակուրդները մարզուհու համար հանգստի շրջան չեն եղել: Վերջին գոտեմարտի հաղթանակից հետո, հերթականին պատրաստվելու և լավագույն արդյունքն ունենալու համար մարզումները չի դադարեցրել: Սուսաննան Շիրակի մարզի Արևիկ գյուղից է: Ամեն օր ու մի քանի ժամ  մազադահլիճում լինելու համար նա գյուղից գալիս է Գյումրի:

15 -ամյա Եվրոպայի չեմպիոնը ձյուդոյի մարզումներին մասնակցող միակ աղջիկն է, ստիպված է մարզադահլիճում պարապմունքներին գոտեմարտել, ուժերը չափել տղաների հետ։ Հայաստանում աղջիկ ձյուդոիստներ քիչ կան, տարբեր առաջնություններում չեմպիոնները՝ առավել ևս: Բայց 15-ամյա չեմպիոն մարզուհին չի սիրում սպորտաձևերը բաժանել աջիկների ու տղաների: Ու դա ապացուցում է իր օրինակով: Եվրոպայի պատանիների առաջնությանը տղաներին հավասար պայքարել է, նույնիսկ ուժեղ գտնվել նրանցից ու հասնել չեմպիոնի կոչմանը:

15-ամյա աղջնակը 6 տարի է արդեն այս սպորտաձևում է: Բայց մինչ այդ, սերը դեպի ֆուտբոլն էլ պակաս չի եղել: Իրենց գյուղի դպրոցում բացված ձյուդոյի խմբակն ամեն ինչ փոխեց նախասիրություններում:

Սկսեց ձյուդոյի պարապմունքների գնալ, որին ծնողները դեմ չեղան: Այս համաձայնությունն ու Սուսաննայի ձգտումները նոր արդյունքներ էին գրանցում: Պետք էր արդեն պրոֆեսիոնալ մոտեցում, և  Սուսաննան որոշեց մարզումները տեղափոխել Գյումրի: 6 տարի շարունակ գյուղից քաղաք է հասնում անձնական մարզչի  հետ՝ լավագույն արդյունքներ ունենալու համար:

Մի քանի օրից Ղազախստանում  Սուսաննան կմասնակցի  աշխարհի  պատանեկան առաջնությանը: Ընդամենը 2 ամիս է անցել Եվրոպայի առաջնության մրցումներից, որտեղ և 15-ամյա մարզուհին վերադարձել էր ոսկե մեդալով: Եվրոպայի չեմպիոնը վստահ է, որ կգումարվի աշխարհի չեմպիոնի տիտղոսը: Շաբաթը 6 օր, օրական 3 ժամ անդադար պարապում է: Սա մարզումների այն ռեժիմն է, որ մարզիչը սահմանել է։

Մարզիչն  այս պահին էլ գնահատում է Սուսաննայի մարզավիճակը, մարզական պատրաստվածությունն ու հնարավորությունները: Եվրոպայի առաջնության հաղթանակից հետո աշխատել է ուղղել այն թերությունները, որոնք նկատել էր: Այժմ մարզուհին գերազանց մարզավիճակում է: Սա մարզումների վերջին շաբաթն է, որից հետո կմեկնեն Ղազախստան, որտեղ սեպտեմբերի 25-28-ը կկայանա  ձյուդոյի աշխարհի առաջնությունը: Այս պայքարում 15-ամյա մարզուհին միակ աղջիկ ձյուդոիստն է, որ Հայաստանից մասնակցելու է աշխարհի առաջնությանը: Այս մրցապայքարում ևս ոսկի նվաճելու արդյունքում Սուսաննան մտադիր է  Օլիմպիական խաղերի հավակնորդ  դառնալ: