Այս պահի դրությամբ մենք չունենք Ամուլսարի հանքի շահագործումն արգելելու որևէ իրավական հիմնավորում. Փաշինյան

ՀՀ վարչապետ  Նիկոլ Փաշինյանն ուղիղ եթեր է մտել Ամուլսարի թեմայով և հայտնել, որ ՀՀ պաշտոնյաները կարող են քայլեր իրականացնել միայն ՀՀ օրենսդրությամբ.

«Եթե արձանագրված խախտումները հնարավոր չէ վերացնել առանց նախագծի փոփոխման, ապա առաջանում է նոր նախագծի անհրաժեշտություն և շրջակա միջավայրի ազդեցության գնահատում»:

Նիկոլ Փաշինյանի խոսքով՝ ՇՄԱԳ փաստաթղթով հանքարդյունաբերողն արձանագրում է իր պարտավորությունները հանրության և կառավարության առաջ:

Վարչապետը հիշատակեց «Էլարդ»-ի ներկայացուցիչների խոսքը, ովքեր ասել էին, որ պատասխանատվությունը կրում է «Լիդիան» ընկերությունը:

«Վերջին օրերին մենք քննարկումներ ենք ունեցել, որոնք տեսաձայնագրվել են և կհրապարակվեն: «Լիդիանն» ասում է, որ ինչպես ՇՄԱԳ-ում գրել է, պարտավորվում է հանքը 100 տոկոս անվտանգ շահագործել»,- ասաց վարչապետը:

Նիկոլ Փաշինյանը նշեց, որ 100 տոկոս անվտանգ շահագործումը ենթադրում է, որ ոչ մի լիտր ջուր չպիտի աղտոտվի, ոչ մի թիզ հող չպիտի աղտոտվի, անգամ անասունների արտերի վրա չպիտի փոշի նստի:

Վարչապետը նշեց, որ հիմա «Լիդիան»-ն ամենաբարձր մակարդակով ասում է, որ կստանձնի հանքի անվնաս շահագործումը:

«Շեղումների պարագայում տրվում է 90 օր ժամանակ, եթե շեղումը չի ուղղվում, ապա հանքը փակվում է: Այս ամենի արդյունքում իմ արձանագրումը հետևյալն է՝ այս պահի դրությամբ մենք չունենք Ամուլսարի հանքի շահագործումն արգելելու որևէ իրավական հիմնավորում, բայց մենք չենք կարող հաշվի չառնել մեր հանրության շրջանում առկա անհանգստությունները: Մեկ այլ կողմից մենք չենք կարող հաշվի չնստել տնտեսական հանրության անհանգստության հետ»:

Վարչապետը նշեց, որ «Մուդիս» ընկերությունը վերջերս բարձրացրել է Հայաստանի վարկանիշը։ Վարչապետի խոսքով՝ եթե այս իրավիճակը ճիշտ լուծում չստանա, ապա դա կարող է հանգեցնել Հայաստանի վարկանիշի վատթարացման:

«Եթե մենք ուղղակի ասում ենք, որ Ամուլսարի հանքը թույլ չենք տալիս շահագործվի՝ բնապահպանական մտավախություններից ելնելով, ապա ինչո՞ւ ենք թույլ տալիս, որ Թեղուտի հանքը կամ Զանգեզուրի պղնձամոլիբդենային կոմբինատը շահագործվի: Այդ դեպքում կարող է ստացվել, որ մենք ցուցաբերում ենք խտրական մոտեցումներ: Դրանից բացի, մենք չենք կարող արհամարհել մեր երկրի արտաքին անվտանգության խնդիրները, որոնք ևս ուղղակի կարևորություն ունեն այս հարցը քննարկելիս»:

Վարչապետը նշեց, որ չի կարող փակագծերը բացել, սակայն յուրաքանչյուր մարդ անձնական վերլուծություն կատարելու դեպքում կարող է հասկանալ, թե ինչու է վարչապետն այս պարագայում հիշատակում անվտանգության հարցը:

Նիկոլ Փաշինայնը ներկայացրել է առաջարկներ՝ ուզում է ջերմուկցիներին խնդրել, որ նրանք ապաշրջափակեն Ամուլսարի հանք տանող ճանապարհները:

Երկրորդ՝ վարչապետը հանձնարարական է տվել Բնապահպանական տեսչական մարմնին Ամուլսարում ստուգումներ սկսել։

Վարչապետը կարծում է, որ այդ ստուգումների արդյունքում կարող են ի հայտ գալ անճշտություններ, որոնք հնարավոր կլինի վերացնել առանց նախագծային փոփոխությունների: