Ցանկացած ուտելիք իր ժամն ունի

Ժամանակակից մարդն այսօր առավել շատ է ուշադրություն դարձնում իր սննդակարգին՝ բարձրացնելով սննդի որակը: Սակայն առողջ սննդակարգի բոլոր կանոններին հետևելը մի փոքր բարդ է:

Առավոտյան սուրճ ըմպելն անիմաստ է: Հետազոտությունները ցույց են տվել, որ արթնանալուց հետո մեկ ժամվա ընթացքում օրգանիզմն արտադրում է կորտիզոլ: Եթե մարդը սուրճ է խմում արթնանալուց անմիջապես հետո, օրգանիզմը սկսում է ավելի քիչ կորտիզոլ արտադրել: Շատ կարևոր է, որ սուրճը չխանգարի բնական կենսական ռիթմի պահպանմանը: Անհրաժեշտ է մի փոքր սպասել, այնուհետև վայելել սուրճը: Բացի այդ, անհրաժեշտ է չչարաշահել այդ ըմպելիքը, ինչպես նաև չըմպել այն երեկոյան ժամերին՝ անքնություն չունենալու համար:

Մարդկանց մեծ մասը սիրում է երկար աշխատանքային օրվանից հետո ուտել սուշի կամ բրինձ պարունակող հնդկական ուտեստներ, սակայն դա լավ միտք չէ: Բրինձը պարունակում է բարդ ածխաջրեր, որոնք շատ դանդաղ են մարսվում: Մի կողմից այդպիսի ուտելիքը շատ էներգիա է տալիս, սակայն, մյուս կողմից, այն շատ կալորիական է և կարող է հանգեցնել քաշի ավելացման:

Ճաշը բրինձ ուտելու լավագույն ժամանակն է: Այն կապահովի արդյունավետ օրվա համար անհրաժեշտ էներգիա:

Միսը սպիտակուցների և В խմբի վիտամինների աղբյուր է, սակայն նրա օգտագործումն առավոտյան ժամերին կարող է շատ ծանր լինել նոր արթնացած օրգանիզմի համար: Դժվարամարս լինելու պատճառով խորհուրդ չի տրվում ուտել նաև երեկոյան: Սպիտակուցի անհրաժեշտ քանակությունը ստանալու համար միս կարելի է օգտագործել ցերեկվա ժամերին:

Ինչ վերաբերում է ընկուզեղենին, ապա դա օգտակար ճարպերի և կալորիաների հիանալի աղբյուր է, սակայն պետք չէ ուտել երեկոյան, քանի որ մարսելը որոշակի ժամանակ կպահանջի: Ընդհանուր առմամբ, ընկուզեղենն օգտակար է օրգանիզմի համար. նպաստում է սրտի առողջացմանը, կարգավորում խոլեստերինի մակարդակը, նպաստում քաշի նվազեցմանը և մաշկի ու մազերի գեղեցկությանը: Դա կարելի է ուտել առավոտյան և, որպես խորտիկ, ուտելիքների արանքում:

Խորհուրդ չի տրվում պանիր ուտել երեկոյան ժամերին: Այն դժվար է մարսվում և կարող է առաջացնել անհանգստություն և խանգարել քունը:

Իսկ նախաճաշին պանիրն օրգանիզմի համար դառնում է այդքան անհրաժեշտ կալցիումի աղբյուր՝ նպաստելով մկանների աճին և ոսկորների առողջությանը:

Խնձորը ևս ճիշտ է ուտել առավոտյան, քանի որ այն պարունակում է թթու, որը նպաստում է հաստ աղիքի աշխատանքին: Երեկոյան ժամերին այն ուտելիս թթուն կարող է կուտակվել ստամոքսում:

Յոգուրտ անհրաժեշտ է ուտել սննդի հիմնական ընդունումից հետո 1–2 ժավա ընթացքում, որպեսզի նրա մեջ պարունակվող կաթնային թթուն չխանգարի նյութափոխանակությանը: Քնելուց առաջ յոգուրտի ոչ մեծ չափաբաժինը ևս լավ տարբերակ է: Այն օրգանիզմը հարստացնում է սպիտակուցներով և նպաստում մկանների զարգացմանը: