Վանեցյանն ասել էր, որ վարչապետի որոշումները ոչ թե քննարկվում են, այլ կատարվում են. նրա հեռանալը պետք է լիներ նմանատիպ. Մակունց

«Իմ գնահատմամբ՝ բավական հաջողված այց է,  բոլորովին այլ հարթակ է տեղափոխվում Հայաստան-սփյուռք հարաբերակցությունը,  և չկա գումարի ակնկալիքով Սփյուռքի հետ շփվելու նախապայման, կա արժեքային հարթակում հարցեր քննարկել: Վստահ եմ՝ շատերը ուշադիր են եղել՝ Կալիֆոռնիայի նահանգում հանդիպումները, նահանգապետի հանդիպումները բոլորովին մոտ չեն այն մարդաշատությանը, որը տեղի է ունեցել վարչապետի հետ հանդիպմանը, ընթացք է, այնպես որ, սա ևս մեծ ցուցիչ է»,- «Հեռանկար»-ի տաղավարում Արամ Աբրահամյանի հետ զրույցում ասել է ԱԺ «Իմ քայլը» խմբակցության ղեկավար Լիլիթ Մակունցը:

Նա անդրադարձել է հաղորդավարի այն հարցին, թե մարդաշատ հանդիպումների ժամանակ դրական խոսքեր են հնչում, իսկ ասուլիսի ընթացքում՝ առավել սուր հարցադրումներ, ինչպես դա տեղի ունեցավ վարչապետի ասուլիսի ժամանակ:

«Կախված է այն բանից, թե ինչի վրա ենք շեշտադրումն անում»,- ասել է Մակունցը:

Արամ Աբրահամյանը հետաքրքրվել է ԱԱԾ նախկին պետի հեռացման մասին վարչապետի հայտարարությամբ, սակայն Մակունցը նշել է, որ ամեն ինչ ասվել է, իսկ իր կարծիքն այդ մասին հետևյալն է.

«Ես կարծում եմ, որ հատկապես ուժային կառույցների պարագայում պաշտոնից պետք է հեռանալ անաղմուկ, այս համատեքստում հիշեցնեմ պարոն Վանեցյանի արած մի հարցադրում, որտեղ նշել էր. «վարչապետի որոշումները ոչ թե քննարկվում են, այլ կատարվում են», և նա արձագանքել էր որպես սպա, և ես կարծում եմ, որ նրա՝ որպես սպա պաշտոնից հեռանալու արձագանքը պետք է լիներ նմանատիպ»:

Իսկ արդյո՞ք ՀՀ վարչապետը գերագույն հրամանատար է, այս հարցի վերաբերյալ խմբակցության ղեկավարի կարծիքն այն է, որ մի կողմից շեշտվում է՝ ՀՀ-ն գտնվում է պատերազմական վիճակում, մյուս կողմից, թե խաղաղություն է, ինքը այդ տիրույթ մտնել չի ցանկանում: «Ես շեշտադրում արեցի պարոն Վանեցյանին՝ որպես սպայի խոսքի և կուզեմ այդ տիրույթում մնալ»,- ասել է նա:

Ինչ վերաբերում է եկեղեցականների մասին գնահատականներին, այն մեկնաբանում է այսպես.

«Վարչապետը, խոսելով եկեղեցու անկախության մասին, արձանագրել էր, որ կառավարությունը կարևորում է դատական իշխանության անկախությունը, չորրորդ իշխանության անկախությունը, և մեր վերաբերմունքը այդպիսին է ժողովրդավարական ինստիտուտների, այդ թվում՝ եկեղեցու նկատմամբ, ինչը ամրագրված է Սահմանադրությամբ: Շատ կարևոր շեշտադրում էր, վարչապետը նկատի էր ունեցել, որ այդ վերաբերմունքը երբեմն առանձին անձինք դիտարկում են որպես թուլություն, և միտում կա ոչ թե ուժեղացմանն ուղղված գործողություններ անել, այլ թուլացման»:

Իսկ հարցին՝ կան եկեղեցականներ, որ ուզում են քանդել պետության հիմքերը, պատասխանել է, որ նման տեղեկություն չունի, իսկ առավել մանրամասն կարող է մեկնաբանել կառավարությունը: