Իսրայելը ևս համագործակցության հայտ է ներկայացրել ԵԱՏՄ

Եվրասիական բարձրագույն խորհրդի ընդլայնված կազմով նիստից և առևտրի համաձայնագրեր կնքելուց հետո ՀՀ վարչապետ Նիկոլ Փաշինյանը ամփոփիչ խոսքում նշեց, որ ԵԱՏՄ հաջորդ նիստը անցկացվելու է դեկտեմբերին, Սանկտ Պետերբուրգում:

ՀՀ վարչապետին, ԵՏՀ կոլեգիայի նախագահ Տիգրան Սարգսյանին և Սինգապուրի վարչապետ Լի Սյեն Լունին լրագրողները 3 հարց տալու հնարավորություն ունեին: Հարցերից մեկը վերաբերում էր ստորագրված համաձայնագրերին և Հայաստան-Իրան, ԵԱՏՄ-Իրան հարաբերություններին՝ հաշվի առնելով, որ Իրանի հետ միայն Հայաստանն ունի սահման:

Իսկ Տիգրան Սարգսյանն անդրադարձավ Եվրասիական տնտեսական միության և Սինգապուրի միջև ստորագրված ազատ առևտրի մասին համաձայնագրին

«Իհարկե, այս համաձայնագիրը նոր հնարավորությունն է բացում և´ Իրանի, և´ Հայաստանի բիզնեսի համար: Մենք այս ամենը տեսնում ենք ոչ միայն Հայաստան-Իրան հարաբերությունների համատեքստում, այլև ԵԱՏՄ և Իրան հարաբերություններում: Ե´վ Իրանն է մեծ շուկա, և´ ԵԱՏՄ-ն է մեծ շուկա: Եվ այստեղ շատ հնարավորություններ կան, որոնք պետք է օգտագործվեն: Հույս ունենք, որ այս ամենից հետո մենք կկարողանանք մեր բիզնեսներն առաջ մղել, որպեսզի կարողանանք ավելի լավ օգտագործել այս բոլոր հնարավորությունները: Իհարկե, մենք հույս ունենք զարգացնել Հայաստանի տարանցիկ ներուժը: Մենք հիմա իրականացնում ենք շատ կարևոր նախագծեր: Ես վստահ եմ, որ այդ ամենի արդյունքում առևտրատնտեսական հարաբերությունները ԵԱՏՄ-ի և Իրանի միջև կակտիվանան և այդ համատեքստում կակտիվանա նաև Հայաստանի և Իրանի առևտրատնտեսական հարաբերությունները»:

Իսկ Տիգրան Սարգսյանը պատասխանեց  Եվրասիական տնտեսական միության և Սինգապուրի միջև ստորագրված ազատ առևտրի մասին համաձայնագրին կարևորությանը վերաբերող հարցին.

«Մենք մշակում ենք նոր մոտեցում և այդ մոտեցման էությունն այն է, որ մենք ընդլայնում ենք սահմանները: Ներդրումների և ծառայությունների հարցն այսоր գտնվում է ազգային իշխանությունների իրավասության մեջ: Բայց նաև պարզ է, որ մեր գործընկերների, այս դեպքում` Սինգապուրի համար, հարմարավետ պայմաններ ստեղծել է պետք, որ իրեն հարմարավետ զգա ընդհանուր տնտեսական միջավայրում: Շատ կարևոր է, որ մենք այս փորձը տարածենք նաև ուրիշ երկրների վրա:

Այս պահին մենք հայտ ունենք Իսրայելից, և մեր Իսրայելի գործընկերները ևս առաջարկում են, որ այդ համաձայնագիրը լինի համալիր փաստաթուղթ, այսինքն` խոսքը չլինի միայն սակագների մասին, այսինքն` ապրանքների ազատ տեղափոխման, այլև որպեսզի այդ համաձայնագիրը ներառի ներդրումների և ծառայությունների բաժին, ճիշտ այն ձևաչափով, որով մենք այսօր իրականացնում ենք Սինգապուրի հետ: Մենք գտնում ենք, որ սա լավ օրինակ է: Սինգապուրն առաջին երկիրն է, բայց մենք մտադիր ենք այս փորձը շարունակել»: