«Նա դիմել է որպես մասնավոր անձ, հետագայում տեղեկացել եմ, որ քրեական գործ չի հարուցվել, և Անանյանը բողոքարկել է։ Եվ երրորդ հիմքն ասեմ․ կխնդրեի, որ լրատվամիջոցները չարծարծեին, գործով վկա է առողջապահության նախարար Արսեն Թորոսյանը։ Ուռուցքաբանության ազգային կենտրոնի տնօրենը քեռուս որդին է, բայց ազատվել է աշխատանքից»:
Դավիթ Սանասարյանը, ինքնաբացարկի միջնորդության հիմքերի մասին դիրքորոշում հայտնելիս, հայտարարեց.
«Ավելի քան վեց ամիս առաջ իմ դեմ սկսեց իրականացվել ապօրինի հետապնդում ԱԱԾ-ի քննչականի անվան տակ, որից հետո դատախազությունը հանցակից եղավ այդ պրոցեսին, կոչ եմ անում, որ դուք մասնակից չդառնաք»։
Դավիթ Բալայանն ընդհատեց նրա խոսքը.
«Ինձ պետք չէ կոչ անել, պետք չէ, որ Դուք պիտակավորում կպցնեք։ Ես խնդրում եմ՝ Դուք դիրքորոշում հայտնեք»։
Սանասարյանը շարունակեց․
«Հույս եմ հայտնում, որ կընթանա դատապրոցեսը, Ձեր մասին օբյեկտիվ գնահատական եմ լսել»։
Սանասարյանի պաշտպանները դատարանին միջնորդեցին վերացնել հարկադրանքի միջոցը, որը հանգեցրել է նրա՝ ՀՀ Պետական վերահսկողական ծառայության պետի լիազորությունները դադարեցնելուն: Մեղադրող դատախազ Գևորգ Սարգսյանը գտավ, որ միջնորդությունը ենթակա է մերժման.
«Պաշտոնով պայմանավորված՝ նա ունի որոշակի ազդեցություն»:
Ըստ դատախազի՝ Սանասարյանի կողմից գործի նյութերն ու առարկաները կեղծելու կամ թաքցնելու հավանականություն է առկա:
Մյուս ամբաստանյալների պաշտպաններն էլ միջնորդեցին քրեական գործից առանձնացնել իրենց պաշտպանյալների մասը և անցկացնել արագացված դատաքննություն, քանի որ մյուս ամբաստանյալներն ընդունել են իրենց մեղքը: Պետական մեղադրողը կրկին առարկեց` նկատելով, որ մեղադրանքը փոխկապակցված է բոլոր ամբաստանյալների դեպքում:
Դատարանը մերժեց այս միջնորդությունը ևս:
Հիշեցնենք` ըստ մեղադրանքի` Դավիթ Սանասարյանը, հանդիսանալով ՀՀ պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, կարգապահական տույժի ենթարկելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:
Ըստ մեղադրանքի՝ Սամվել Ադյանը Գևորգ Խաչատրյանի հետ նախնական համաձայնությամբ, 2018-2019թթ. ընթացքում ապօրինի կերպով միջամտել են վերահսկվող օբյեկտներ հանդիսացող ՀՀ առողջապահության նախարարության, «Սուրբ Գրիգոր Լուսավորիչ» և «Վանաձոր» բժշկական կենտրոնների կարիքների համար անհրաժեշտ բժշկական սարքավորումների ձեռքբերման նպատակով կազմակերպված գնման ընթացակարգերին` պարտադրելով փոփոխել ինչպես ավտոկլավի տեխնիկական բնութագիրը, այնպես էլ հեմոդիալիզի սարքերի շահագործման փաստաթղթերով նախատեսված դիալիզատորների տեխնիկական բնութագրերը և կազմել բժշկական կենտրոնների իրական կարիքներից և սարքերի շահագործման փաստաթղթերից չբխող նոր տեխնիկական բնութագրեր՝ նպատակ ունենալով հայտարարված մրցույթներում ապահովել իրենց հետ փոխկապակցված «Զորաշեն» ՍՊ ընկերության հաղթանակը:
Ընդ որում, գնման գործընթացներին մասնակցող ծառայողների կողմից ապօրինի պահանջները կատարելուն ընդդիմանալու դեպքում, ՀՀ պետական վերահսկողական ծառայության պաշտոնատար անձինք սպառնացել կամ փաստացի նախաձեռնել են ուսումնասիրություններ:
Տարոն Ավետիսյանին մեղադրանք է առաջադրվել այն բանի համար, որ նա, «Զորաշեն» ՍՊ ընկերության տնօրեն Հայկ Կարապետյանի կողմից տրված լիազորագրերով ստանձնելով ընկերության փաստացի ղեկավարումը և հանդիսանալով ՀՀ պետական վերահսկողական ծառայության գնումների գործընթացների վերահսկողության վարչության պետի ժամանակավոր պաշտոնակատար Սամվել Ադյանի մտերիմ ընկերը, վերջինիս և նույն վարչության գլխավոր մասնագետի պաշտոնակատար Գևորգ Խաչատրյանի հետ նախնական համաձայնությամբ՝ միջոցներ և տեղեկություններ տրամադրելու, խոչընդոտները վերացնելու եղանակով, օժանդակել է նրանց կողմից պաշտոնեական դիրքը չարաշահելուն։
Դատական հաջորդ նիստը նշանակվեց նոյեմբերի 27-ին:
