Ի՞նչ պայմաններում է կայանալու Թրամփ-Էրդողան հանդիպումը

Ի՞նչ պայմաններում է կայանալու Թուրքիայի նախագահ Ռեջեփ Թայիփ Էրդողանի հանդիպումը ԱՄՆ նախագահ Դոնալդ Թրամփի հետ: Սա նրանց առաջին հանդիպումն է Սիրիայի հյուսիսում ռազմական գործողությունների ավարտից հետո, ուստի այն առանցքային հարցերից մեկն է լինելու: Նույն կարևորության հարցերի շարքում է S-400 զենիթահրթիռային համակարգերի հարցը: ԱՄՆ-ում ձգտում են կանխել դրանց շահագործումը: Ուստի այս հարցերը առանցքային են լինելու նախագահների հանդիպման ժամանակ:

ԱՄՆ Կոնգրեսում Հայոց ցեղասպանության մասին բանաձևի ընդունումից հետո Թուրքիայում բարձրացած աղմուկից հետո թե´ թուրքական, թե´ ամերիկյան լրատվամիջոցները չէին բացառում, որ Էրդողանի այցը Միացյալ նահանգներ կարող էր չկայանալ: Բայց անցյալ շաբաթ երկու կողմն էլ հաստատեցին, որ այն տեղի կունենա: Երեկ երեկոյան Էրդողանը Վաշինգտոն է ժամանել կնոջ ու կառավարական մեծ պատվիրակության ուղեկցությամբ: Պատվիրակության ներկայացուցչական կազմն արդեն հուշում է, որ հարցերի բավական մեծ շրջանակ է քննարկվելու:

Էրդողանի՝ Վաշինգտոն ոտք դնելու և Սպիտակ տան ղեկավարի հետ հանդիպման նախօրյակին «Վաշինգտոն Փոստ» թերթը գրեց մի նամակի մասին, որը, ըստ պարբերականի, նախագահ Թրամփը Էրդողանին է ուղարկել. դրանում ԱՄՆ նախագահը թուրք գործընկերոջն առաջարկել է 100 մլրդ դոլար առևտրային գործարք։ Սպիտակ տունը պնդում է՝ S-400-ները չշահագործել, որպեսզի դրանք չկարողանան հասանելիություն ունենալ ամերիկյան F-35 կործանիչների հաղորդակցության ու պաշտպանական միջոցներին։

Այդ դեպքում Անկարան կարող է վերադառնալ բազմաֆունկցիոնալ F-35 կործանիչների ստեղծման ծրագիր և խուսափել պատժամիջոցներից։ Ուստի, ամերիկյան լրատվամիջոցները գրեցին, որ Թրամփ-Էրդողան հանդիպման առանցքային հարցերից մեկը հենց դա է:

Այն, որ Թուրքիայի նախագահը ԱՄՆ է մեկնում Սիրիայի հյուսիսում ռազմական գործողությունների ավարտից հետո, նշանակում է, որ նրանց քննարկման օրակարգում նաև այդ հարցն է ընդգրկված: Դեռ այցից առաջ թուրքական լրատվամիջոցները գրել էին, որ Թուրքիայի նախագահը իր հետ ԱՄՆ է տանում երկու կարևոր ծրար: Դրանից մեկը Խաղաղության ակունք օպերացիային վերաբերող Թրամփի նամակն է, մյուսում փաստաթղթեր են Սիրիայի հյուսիսի քրդական ուժերի առաջնորդ՝ Մազլում Քոբանիի մասին:

Այն, որ այցը կայանում է Հայոց ցեղասպանության բանաձևի ընդունումից հետո, հուշում է, որ այդ հարցը ևս քննարկման օրակարգում կլինի:

Սրան զուգահեռ՝ Սիրիայի հյուսիսում իրականացված գործողությունների ֆոնին Կոնգրեսը նաև պատժամիջոցներ ընդունեց Թուրքիայի նկատմամբ: Սրանք ևս վկայում են, որ ԱՄՆ-ն ու Թուրքիան իրենց հարաբերություններում հեշտ շրջան չեն ապրում: Բայց թե´ ԱՄՆ-ում, թե´ Թուրքիայում կարծում են, որ ՆԱՏՕ-ական գործընկերները հակված են ամեն կերպ բարելավել հարաբերությունները: