Ուսադիր կրողները մեկը մյուսի դեմ երբեք ցուցմունք չեն տվել. Նինա Կարապետյանց

«Դա համարվել է ուսադրի պատիվ, իրենք շատ վատ են պատկերացրել՝ ինչ է ուսադրի պատիվը։ Հետագայում նույն ձև հատուկ քննչական ծառայությունում քննիչների  կողմից գործը գնացել է գործի չբացահայտման ուղղությամբ, դատախազությունում նույն կերպ են համարել են, որ չբացահայտելը ուսադրի պատվի ցուցանիշ է»,- խոսելով իրավապահ համակարգում խոշտանգումների մասին՝ ասել է իրավապաշտպան Նինա Կարապետյանցը:

Տարիներ շարունակ խոշտանգման դեպքերի մասին խոսում են իրավապաշտպանները, փաստաբանները, մեղադրյալներն ու ամբաստանյալները: Այդ ահազանգերը  միշտ մնացել են անարձագանք, «որովհետև այն համակարգի աշխատողները, որտեղ բարձրաձայնվել են այդ խնդիրների մասին, եղել են այն քրեական մշակույթի կրողները, որի մասին մենք խոսում ենք»,- նշել են իրավապաշտպաները: Իսկ քննարկման թեման նոյեմբերի 21-ին համացանցում տարածված տեսանյութն է, որում հստակ երևում է, թե ինչպես ոստիկանները ցուցմունք ստանալու նպատակով հակագազերով ու ոստիկանական մահակներով բռնություն են կիրառում քաղաքացու նկատմամբ:

«Հելսինկյան ասոցիացիա» հասարակական կազմակերպության նախագահ, իրավապաշտպան Նինա Կարապետյանցն ասել է, որ տարիներ շարունակ խոշտանգումներ չեն գրանցվել, բայց իրականում խոշտանգման փաստի առիթով նյութեր են նախապատրաստվել, քրեական գործ է հարուցվել, որը հետագայում կարճվել է՝ համարելով, որ բավարար ապացույցներ հնարավոր չէ հավաքել։ Նրա պնդմամբ՝ բողոք ներկայացնող անձը կարող էր անգամ քրեական պատասխանատվության ենթարկվել սուտ մատնության համար։

«Խոշտանգման գործով բողոք ներկայացնելու ժամանակ ասում էին՝ ի՞նչ եք բանի հետևից ընկել, Աստված կպատժի։ Այսինքն՝ իրենց ամբողջ հույսը Աստվածն էր, ոչ թե օրենքն ու իրավունքը։ Ասում էր՝ հո դուք «գործ տվող» չեք, ես որտեղից գործ տվող ՔԿ-ի աշխատող ոստիկան գտնեմ, որ ձեր բերած ապացույցները հիմնավորի։ Հեղափոխության տապալումը հնարավոր է լինելու այս համակարգերի միջոցով, որովհետև այս համակարգը վերջին այն ապաստանն է, որտեղ հանցավոր ռեժիմը, ունենալով այսպիսի ապացույցներ, ստիպելու է համակարգի աշխատողները անեն այն, ինչ ուզում են։ Ոչ մեկը չի ուզում՝ գործեր բացվեն, որովհետև իրենցից յուրաքանչյուրը՝ հատուկենտ բացառություններով, կարող է քրեական պատասխանատվության ենթարկվել»,- ավելացրեց նա։

«Եթե հաշվենք՝ Հայաստանում քանի գործ է հարուցվել, սա խոսում է պետության ձախողման մասին, և այդ ուղղությամբ քայլեր չեն ձեռնարկվում։ Սա եզակի դեպք չէ, պատկերացրեք, թե որքան տարածված է, որ հասարակությունը իմանում է։ Նման մարդիկ համակարգից պետք է հեռացվեն, չպետք է համակարգին մոտ թողնել»,- նկատել է ՔԿՀ-ներում հասարակական վերահսկողություն իրականացնողը՝ հասարակական դիտորդների խմբի անդամ Ռոբերտ Ռևազյանը: Նա ասել է  նաև, որ մինչ այժմ խոշտանգումների գործով ՄԻԵԴ-ը 12 վճիռ է պատրաստում Հայաստանի դեմ, իսկ Հայաստանում չկա ոչ մի հարուցված քրեական գործ, առավել ևս՝ պատժված որևէ մեկը»,- ասել է  Կարապետյանցը: