ԱԺ-ում քննարկվել է ԴԱՀԿ օրենքում փոփոխություններ կատարելու մասին նախագիծը

ԱԺ-ում քննարկվել է դատական ակտերի մասին օրենքում փոփոխություններ և լրացումներ կատարելու մասին նախագիծը: Արդարադատության նախարարի տեղակալ Արթուր Հովհաննիսյանը, ներկայացնելով նախագիծը, նշեց, որ այն չափազանց կարևոր է և բավականին շատ փոփոխություններ կամ բարեփոխումներ է նախատեսում հատկապես դատական ակտերի հարկադիր կատարման համակարգում: 

«Որպես ի կատարումն վարչապետի հանձնարարականի՝ հնարավորինս սահմանափակել հարկադիր կատարողի հայեցողական լիազորությունները: Առաջին փոփոխությունը՝ հստակ ժամկետ սահմանել հարկադիր կատարողի համար կոնկրետ կատարողական վարույթով որոշումներ կայացնելու համար: Սահմանվել է 3 օր ժամկետ ներկայիս 2 ամսվա փոխարեն:

Երկրորդ՝ հստակ սահմանվել է հայցի ապահովման միջոցի կիրառման ընթացակարգերը, մասնավորապես սահմանվել է գույքի այն հերթականությունը, ըստ որի, հարկադիր կատարողը կարող է որպես հայցի ապահովման միջոց արգելանք դնել անձի գույքի վրա:

Այսօր, երբ դատարանն արգելանք է դնում գույքի կամ դրամական միջոցների վրա, հարկադիր կատարման ծառայությունը արգելանք է դնում գույքի և դրամական միջոցների վրա և շատ դեպքերում տնտեսվարողը, ունենալով համապատասխան գույք, ավելի մեծ գնով, քան հայցագինն է, սահմանափակում է դնում ֆինանսական միջոցների վրա և տնտեսվարողը հետագա գործունեությունը չի կարողանում իրականացնել: Արգելանքը ամբողջ դատավարության ընթացքում պահպանվում է: Դատը կարող է տարիներով տևել, տնտեսվարողը չի կարողանում տնօրինել իր ֆինանսական միջոցները և կարող է ֆինանսական կրախի գնալ և սնանկանալ»,- ասել է Արթուր Հովհաննիսյանը:

Օրինագծով նախատեսվում է հայցի ապահովման միջոց կիրառել ըստ հետևյալ հերթականության՝ առաջինը՝ անշարժ գույք, որից հետո արտադրության մեջ անմիջականորեն չներառված հիմնական միջոցներ, եթե չի բավարարում, ապա անավարտ արտադրանքի, պատրաստի արտադրանքի, շարժական գույքի և, եթե էլի չի բավարարում, ապա նոր միայն ֆինանսական միջոցների վրա:

Հաջորդ փոփոխությամբ նախատեսվում է գույքի բռնագանձման վարույթում, եթե մինչ այդ արդեն իսկ համապատասխան գույք է արգելադրված եղել դատական գործընթացի ժամանակ և հիմա վճռի կատարման փուլն է, հարկադիր կատարողն ունի ագելադրված գույք, ապա բռնագանձումը պետք է կատարվի 15 օրում և ոչ թե ներկայումս սահմանված 2 ամսում:

«Նշանակում է դատական ակտի կատարումն ավելի արագ կլինի, ինչը ոչ միայն տնտեսվարողի համար է լավ, այլև Հայաստանի դուինգ բիզնեսի գործակցով ՀՀ դիրքերն էականորեն կբարելավվեն այս փոփոխությամբ»,- նշել է Արթուր Հովհաննիսյանը:

 Պատգամավորները նաև հարցեր են ուղղել արդարադատության նախարարի տեղակալին: