Մահակով ցուցմունք կորզելու դեպքի հետքերով. SHANTNEWS.am-ի անդրադարձը

Նոյեմբերի 21-ին համացանցում հայտնված «Հայրենի ոստիկանները հակագազով և մահակով ցուցմունք են կորզում» վերտառությամբ տեսանյութի հրապարակումից հետո դեռ որևէ ոստիկանի մեղադրանք չի առաջադրվել. միայն Ճամբարակի բաժնի պետ Նարեկ Սիմոնյանի լիազորություններն են դադարեցվել: Այս իրավիճակի վերաբերյալ իրենց վրդովմունքն են հայտնել իրավապաշտպաններն ու տուժողի իրավահաջորդը նախօրեին հրավիրված մամուլի ասուլիսի ժամանակ: Նրանք կարծում են, որ տեսանյութն արդեն բավարար հիմք էր դրա համար, իսկ ի՞նչ քայլեր են կատարել մինչ այժմ իրավապահ մարմինները:

Տեսանյութը նկարահանվել է ավելի քան 10 տարի առաջ՝ 2008թ. ոստիկանության բաժանմունքներից մեկում: Այստեղ հստակ երևում են, թե ինչպես են ոստիկանները փորձում քաղաքացուց ցուցմունք կորզել: Ներքին հետաքննությամբ պարզվել է նաև այդ գործողությունները կատարող անձանց ինքնությունը: Տուժողի ինքնությունը ևս հայտնի է, նրան բերման են ենթարկել գողության մեղադրանքով: Տեսանյութը, ըստ իրավապաշտպանների ու տուժողի հարազատների, կարճ դրվագ է այն երեք օրերի գործողություններից, որ կատարել են ոստիկանները նրա նկատմամբ:

Տուժողն այսօր ևս անազատության մեջ է: Մեկ այլ մեղադրանքով է դատապարտվել: Տուժողի առողջական վիճակը խոշտանգումից հետո կտրուկ վատացել է, վստահեցրեց նրա ազգականը: Ըստ նրա՝ տուժողը ներկայում հոգեբանական ծանր վիճակում է, վերապրում է տեղի ունեցածը, բայց նրան հոգեբանական աջակցություն չի ցուցաբերվում: Ոչ թե կատարված գործողությունների, այլ աչքի առջև հստակ ապացույց ունենալու առումով է խոշտանգման այս դեպքը բացառիկ, կարծում է իրավապաշտպան Նինա Կարապետյանցը: Նրա համոզմամբ՝ տեսանյութն էլ բավարար էր այնտեղ երևացող 4 ոստիկանների, այս ամենը նկարահանող անձի և փոխկապակցված այլ անձանց մեղադրանք առաջադրելու համար:

Ի՞նչ գործողություններ են իրականացվել մինչ օրս համապատասխան մարմինների կողմից: Սկանդալային տեսանյութը հրապարակվելուց անմիջապես հետո Մարդու իրավունքների պաշտպան Արման Թաթոյանն արձագանքեց, որ այս տեսանյութի կապակցությամբ պետք է անմիջապես նախաձեռնվի քրեական վարույթ։

«Ստուգողական բոլոր գործողությունները պետք է կատարվեն բացառապես ՀՀ Քրեական դատավարության օրենսգրքով նախատեսված ընթացակարգի շրջանակում։ Առավոտյան իմ ստորագրությամբ համապատասխան պաշտոնական գրություն կուղարկվի քրեական հետապնդման մարմնին։ Ընթացքը Մարդու իրավունքների պաշտպանի իրավասության առավելագույն սահմաններում կլինի իմ ուշադրության ներքո»,- ասաց նա:

Ոստիկանապետի պաշտոնակատար Արման Սարգսյանի հանձնարարությամբ՝ ոստիկանության ներքին անվտանգության վարչությունում ստուգումներ իրականացվեցին, Հատուկ քննչական ծառայությունը ևս իրազեկեց ձեռնարկված միջոցառումների մասին: Կատարված աշխատանքների արդյունքում պարզ դարձավ քաղաքացու նկատմամբ խոշտանգում իրականացրած անձանց ինքնությունը: Ոստիկանությունը հայտնեց՝ նրանցից երկուսը նախկին ծառայողներ են, մեկը՝ Ճամբարակի բաժնի պետը, որի լիազորությունները դադարեցվել են: Այս մասին ոստիկանությունը պարզաբանում տարածեց.

«Ոստիկանության ներքին անվտանգության վարչությունում իրականացվող ծառայողական քննության շրջանակներում տեղեկություններ են ձեռք բերվել տեսանյութում երևացող անձանցից երեքի ինքնության վերաբերյալ։ Նրանցից մեկի լիազորությունները կասեցվել են, իսկ երկուսը ոստիկանության նախկին ծառայողներ են։ Ծառայողական քննությամբ ձեռք բերված փաստական տվյալների վերլուծությամբ պարզվել է, որ տեսագրությունն արվել է շուրջ տասը տարի առաջ, քանի որ հիշյալ աշխատակիցները նույն ստորաբաժանումում՝ ոստիկանության Արաբկիրի բաժնում, համատեղ ծառայել են այդ ժամանակ։ Երեք անձանցից երկուսն արդեն հրավիրվել են ոստիկանության ներքին անվտանգության վարչություն։ Ձեռնարկվում են միջոցառումներ դեպքին առնչվող մյուս անձանց ինքնությունը պարզելու ուղղությամբ։ Ծառայողական քննությամբ ձեռք բերված բոլոր տվյալները փոխանցվել են Հատուկ քննչական ծառայություն»:

Հատուկ քննչական ծառայությունում նախաքննություն է ընթանում: Մամուլի ասուլիսի մասնակիցներին այլ մանրամասներ հայտնի չէին: ՀՔԾ-ից հայտնել են, որ մանրամասներ չեն կարող հաղորդել, տեղեկացրել են, որ քննչական գործողությունները ակտիվորեն իրականացվում են, հայտնի է տուժողի ինքնությունը, դեպքի տարեթիվը: Այդ տվյալները, սակայն հրապարակել դեռ չեն կարող:

Իսկ արդյո՞ք հիմքեր կան ոստիկանների նկատմամբ մեղադրանք առաջադրելու, հարցին տուժողի իրավահաջորդներն առանց երկար մտածելու են պատասխանում. տեսանյութն արդեն իսկ ծանրակշիռ հիմք է: Փաստաբան Արա Ղարագյոզյանը հայտնեց, որ տեսաձայնագրությունը նկարվել է, որ գողություն կատարող ենթադրյալ ընտանիքին հետագայում ցուցադրեն, որ տան գողությունը բացահայտված է, ու որ ասեն՝ տեսեք՝ ինչ օրն են գցում:

Իրավապաշտպան Նինա Կարապետյանցն էլ նկատեց՝ ՀՔԾ-ն ասում է՝ արդյունավետ աշխատանք է, բայց ինքը չի զարմանում:

«Նման գործերով նորմալ բան է, ձևական սկսում են, մի երկու հոգու հարցաքննում են ու էնքան են քնեցնում, որ տարիներով տուժող կողմը հոգնի ու դադարեցնի»,- ասաց նա:

Նախորդ 20 տարիներին խոշտանգումների վերաբերյալ տասնյակ փաստերով քաղաքացիները բողոքներ են ներկայացրել, սակայն դրանցից միայն 2-ն են մտել դատարան, որոնք էլ անբավարար ապացույցների հիմքով կարճվել են, նշում են իրավապաշտպանները: Այս պարագայում դեռ 2015-ից ապացույցներ են եղել: Երբ խոշտանգումների կանխարգելման կոմիտեն ուսումնասիրություններ է կատարել, հայտնաբերել է տեսանյութում առկա հակագազը:

Ասուլիսին ներկա տուժողի հարազատը` Մերի Գրիգորյանը հայտարարեց, որ պատրաստ են ցանկացած գնով հասնել արդարության: Իրավապաշտպանները հիշեցին դեպքեր, երբ անգամ դատավորները նորմալ են համարել ցուցմունք կորզելու համար մեղադրյալին ապտակելը, նման պայմաններում արդյունավետ քննություն ակնկալել դժվարացան, իսկ տուժողի իրավահաջորդը իր խնդրանքն ուղղեց Հանրապետության վարչապետին ու նախագահին, որ իրենց ուշադրության կենտրոնում պահեն հետաքննության ընթացքը: