«Կանայք հանուն զարգացման» ՀԿ-ն ընդլայնում է գործունեությունը Շիրակի մարզի գյուղերում

Ինչպես ու ինչ նպատակային ծրագրեր է հնարավոր իրականացնել գյուղական համայնքներում, որը կբերի տարածքային ինքնուրույն զարգացման։ 3 տարի է՝ այս ուղղությամբ են ընթանում «Կանայք հանուն զարգացման» կազմակերպության աշխատանքները Շիրակի մարզի գյուղերում: Ընտրել են 8 համայնքներ, որոնցում 38 ծրագիր է ներդրվել՝ հիմնականում սոցիալական ուղղվածության, որին վերջին մեկ տարում գումարվել է բիզնես բաղադրիչը: Անուշավան, Արփենի, Թորոսգյուղ, Լանջիկ, Լեռնակերտ, Հողմիկ, Մեղրաշատ, Ցողամարգ. այս գյուղերը հանդիսանում են բազմաթիվ ծրագրերի շահառուները:

Շիրակի մարզի սահմանամերձ ու տասնյակ խնդիրներով ծանրաբեռնված շատ համայնքներից առայժմ ընդամենը ութն է «Կանայք հանուն զարգացման» կազմակերպության ծրագրերից օգտվում։ Սոցիալական, համայնքային պրոբլեմներ լուծող ծրագրեր ներդնելիս կարևորվում է գյուղերից համաֆինանսավորումը, ինչպես նաև դրամահավաքությունը: Սա, ըստ ծրագրի պատասխանատուների, մեծացնում է համայնքի բնակչի պատասխանատվությունն ու հաշվետվողականությունը ծրագրերի հանդեպ։ «Կանայք հանուն զարգացման» ՀԿ նախագահ Գոհար Մարկոսյանի խոսքերով՝ ամենամեծ դժվարությունը համայնքին համախմբելն ու միավորելն է 1 գաղափարի շուրջ: Նա վստահ ասում է, որ այն ժամանակ, երբ համայնքի խնդիրը դառնա բնակչինը, լուծումն ինքն իրեն կգա:

Շիրակի մարզպետ Տիգրան Պետրոսյանն էլ դարձյալ շեշտում է՝ մարզը զարգացման մեծ ներուժ ունի, պարզապես այն իրացնել է պետք: Նա ևս մեկ անգամ առանձնացնում է մարզի առանձնահատկությունները, այդ թվում՝ զբոսաշրջային: Իսկ գյուղատնտեսական ներուժը փորձում են օգտագործել առայժմ փոքր բիզնես ծրագրերով: «Ռազմավարական զարգացման գործակալության» Գյումրիի գրասենյակի ղեկավար Արտաշես Նիկոլյանն էլ նշում է, որ եղած բիզնես գաղափարներից ընտրում են այնպիսիները, որոնք կկարողանան շարունակականություն ապահովել: Փոքր բիզնես ծրագրերը, որոնք դրամաշնորհային են, պատասխանատուները համարում են ավելի կենսունակ և ընդլայնման հնարավորություններով: Այդպիսի 5 ծրագիր մարզի գյուղերում գործում է:

Փոքր գումարի դրամաշնորհին նույնչափով էլ անհատ է ֆինանս ներդնում: Առաջին քայլ անողները դժգոհ չեն: Մարզի Արփենի գյուղի բնակիչ Գոհար Գևորգյանը 100 քառակուսի մետր մակերեսով ջերմոց է հիմնել, որտեղ լոլիկ, վարունգ ու պղպեղ է աճեցնում, ասում է՝ գոհ է հատկապես վարունգի բերքից, որը գյուղում էլ վաճառել է ու եկամուտ ստացել:

Իսկ Մեղրաշատի բնակիչ Կարեն Ոսկանյանը 6 մեղվաընտանիք է գնել ու մեղրի արտադրությամբ է զբաղվում, 2 մեղվաընտանիք էլ ավելացրել է, մտադիր է էլի ավելացնել: Հաջորդ տարի փոքր տնտեսությունները կընդլայնվեն սեփական միջոցների հաշվին, իսկ կազմակերպությունը նախատեսում է ավելացնել շահառու գյուղերի ցանկը, ծրագրում կընդգրկվեն նաև Սարապատ խոշորացված համայնքի գյուղերը: Առաջնահերթություն կտրվի նոր տեխնոլոգիաներով բիզնես գաղափարներին: Գյուղատնտեսությունը ռիսկային է, բայց համեմատաբար շահութաբեր: Մասնագետների կարծիքն անփոփոխ է, իսկ Շիրակի մարզում դրանց արդյունավետությունը գնահատելու համար երկար է պետք սպասել, ինչպես նաև մեծ ներդրումներ են հարկավոր: