Կրկին դեպի տեղամասեր. ի՞նչ հարցերի է «Այո» կամ «Ոչ» ասել ՀՀ քաղաքացին

Հայաստանը պատրաստվում է սահմանադրական փոփոխությունների հանրաքվեին: SHANTNEWS.am-ն առանձնացրել է՝ մինչ օրս քանի հանրաքվե է անցկացվել Հայաստանում:

2003թ. մայիսի 25 խորհրդարանական ընտրությունների քվեարկությանը զուգահեռ անցկացվեց սահմանադրական փոփոխությունների հանրաքվե:

Հայաստանում սահմանադրական հանրաքվե անցկացվեց նաև 2005 թվականի նոյեմբերի 27-ին։ Հանրաքվեով ՀՀ Սահմանադրության մեջ կատարվում էին մի շարք փոփոխություններ, որոնց աջակցում էր միջազգային հանրությունը։ Պաշտոնապես եղել է ընտրողների բարձր մասնակցություն, և ճնշող մեծամասնությունը հանդես է եկել փոփոխություններ կատարելու օգտին։

Սակայն ընդդիմությունն ու դիտորդները հայտարարել են, որ հանրաքվեի անցկացման ժամանակ թույլ են տրվել լուրջ խախտումներ։

2015թ. մայիսի 17-ին Լոռի, Սյունիք և Տավուշ մարզերի մի շարք համայնքների տեղական հանրաքվեներ անցկացվեցին:

Լոռու մարզի բնակիչները պատասխանեցին հետևյալ հարցին.

«Համաձա՞յն եք, որ Թումանյանի, Մարցի, Քարինջի, Լորուտի, Շամուտի, Աթանի, Ահնիձորի համայնքները միավորվեն՝ Թումանյանի համայնք անվանմամբ, Թումանյանի համայնքի կենտրոնով, Թումանյան, Քոբերի կայարան, Մարց, Քարինջ, Լորուտ, Շամուտ, Աթան, Ահնիձոր բնակավայրերով»:

Սյունիքի մարզի բնակիչներին հարց ուղղվեց.

«Համաձա՞յն եք, որ Շինուհայրի, Տաթևի, Հալիձորի, Հարժիսի, Սվարանցի, Խոտի, Տանձատափի, Քաշունիի համայնքները միավորվեն՝ Տաթևի համայնք անվանմամբ, Շինուհայրի համայնքի կենտրոնով, Շինուհայր, Տաթև, Հալիձոր, Հարժիս, Սվարանց, Խոտ, Տանձատափ, Քաշունի բնակավայրերով»:

Տավուշցիներին ուղղվեց հետևյալ հարցը.

«Համաձա՞յն եք, որ Դիլիջանի, Հաղարծնի, Թեղուտի, Գոշի, Աղավնավանքի, Խաչարձանի, Հովքի համայնքները միավորվեն՝ Դիլիջանի համայնք անվանմամբ, Դիլիջանի համայնքի կենտրոնով, Դիլիջան, Հաղարծին, Թեղուտ, Գոշ, Աղավնավանք, Խաչարձան, Ճերմակավան, Գեղատափ, Հովք բնակավայրերով»:

ՀՀ երրորդ նախագահ Սերժ Սարգսյանը 2015թ. հոկտեմբերի 8-ին հրամանագիր ստորագրեց ՀՀ Սահմանադրության փոփոխությունների հանրաքվե նշանակելու մասին: Հրամանագրով՝ ՀՀ Սահմանադրության փոփոխությունների հանրաքվեն նշանակվեց 2015 թվականի դեկտեմբերի 6-ին: Հանրաքվեին մասնակցելու իրավունք ունեցող 2 566 998 քաղաքացիներից քվեարկությանը մասնակցեց 1 302 613-ը: Սահմանադրական փոփոխություններին «Այո» ասաց քվեարկության մասնակիցներից 825 521-ը, «Ոչ»՝ 421 568-ը:

2020թ. փետրվարի 6-ին Ազգային ժողովում ձայների 0 կողմ, 36 դեմ, 87 ձեռնպահ հարաբերակցությամբ մերժվեց իշխող քաղաքական ուժի հեղինակած՝ Սահմանադրության փոփոխությունների նախագիծը: ԱԺ կանոնակարգ օրենքով սահմանված կարգով նախաձեռնողների ներկայացուցչին հնարավորություն տրվեց ներկայացնել հարցը հանրաքվեի դնելու որոշումը: Այն ընդունվեց ձայների 88 կողմ, 15 դեմ, 0 ձեռնպահ հարաբերակցությամբ:

ՀՀ նախագահ Արմեն Սարգսյանը փետրվարի 9-ին հրամանագիր ստորագրեց Հայաստանի Հանրապետության Սահմանադրության փոփոխությունների հանրաքվե նշանակելու մասին: Նախագահի հրամանագրով՝ Սահմանադրության փոփոխությունների հանրաքվեն կանցկացվի ապրիլի 5-ին: