Մարալիկի առողջության կենտրոնում կորոնավիրուսով վարակման նոր դեպքեր են գրանցվել. քաղաքում խստացված ռեժիմով հսկողություն է

Մարալիկի առողջության կենտրոնի կորոնավիրուսով վարակված բուժաշխատողների թիվը հասել է 18-ի։ Այս մասին այսօր լրագրողների հետ զրույցում ասել է Շիրակի մարզպետ Տիգրան Պետրոսյանը։

Հիշեցնենք, որ օրեր առաջ Մարալիկի առողջության կենտրոնի մանկաբարձագինեկոլոգիական բաժանմունքի աշխատակցի մոտ կորոնավիրուսի թեստը դրական էր եղել, որին հաջորդել էր առողջության կենտրոնի ևս 20 աշխատակցի թեստավորումը։ Արդյունքում կորոնավիրուս էր հաստատվել նրանցից 9-ի մոտ։

Դրան հաջորդել էր Հիվանդությունների վերահսկման և կանխարգելման կենտրոնի որոշումը՝ թեստավորել առողջության կենտրոնի բոլոր՝ շուրջ 70 աշխատակցին: Թեստավորման պատասխանները հայտնի են դարձել երեկ ուշ երեկոյան:

«Նրանցից 8-ի մոտ դրական էր պատասխանը, ինչը նշանակում է, որ Մարալիկում ունեցանք այս պահին 18 դրական դեպք, ինչը Մարալիկ և Ձորակապ գյուղերում տեղաշարժի հետ կապված հարց է առաջացնում»,- SHANTNEWS-ին ասել է Շիրակի մարզպետ Տիգրան Պետրոսյանը:

Մարալիկի առողջության կենտրոնի 18 բուժաշխատող Գյումրիի ինֆեկցիոն հիվանդանոցում է, մյուսներին պարտադիր մեկուսացման պահանջ է ներկայացվել: Առողջության կենտրոնում, որտեղ գործում էր առաջնային բուժօգնության օղակը, ծննդաբերական բաժանմունքը և շտապօգնությունը, բուժծառայությունների մատուցումը ժամանակավորապես դադարեցնելու որոշում է կայացվել:

Շտապօգնության ծառայությունը Անիի տարածաշրջանում ապահովում են Գյումրիի և Արթիկի բրիգադները:

«Հիվանդանոցի տարածքը, փողոցները, բազմաբնակարան շենքերի մուտքերը, բոլոր այս տարածքներն այսօր ախտահանվել են: Մարալիկում մարդկանց տեղաշարժը սահմանափակվել է»,- տեղեկացրել է Անի համայնքի ղեկավարը:

Մարալիկում ուժեղացված հսկողություն են իրականացնում ոստիկանական կարգախմբերը: Անի համայնքը ներառում է Մարալիկ քաղաքը և ևս 16 բնակավայր: Այդ գյուղերից Մարալիկ գալ խուսափում են: Մարալիկի հարևան Ձորակապ գյուղի մեկուսացման հարցը ևս պարետատանը քննարկվում է:

Մարալիկ ելումուտն արգելելը, Շիրակի մարզպետի խոսքով, փոքր-ինչ դժվար է, քանի որ Երևան-Գյումրի մայրուղու մի հատվածը, «Հյուսիս-Հարավի» շինարարությամբ պայմանավորված, անցնում է Մարալիկի ու Ձորակապի տարածքով: Մարալիկում այժմ խստացված ռեժիմով հսկողություն է:

«Մարալիկում խստացված ռեժիմով է հերթապահությունը: Խստացված, այսինքն՝ շատ ավելի մեծ թվով ոստիկանական ուժեր են այնտեղ հերթապահում: Բնակիչներն էլ ըմբռնումով են մոտեցել, և տեղաշարժը բուն բնակավայրում ցածր է»,- ասել է Տիգրան Պետրոսյանը:

Ընդհանուր առմամբ, Շիրակի մարզում կորոնավիրուսով վարակվածության 37 դեպք է գրանցվել հիվանդության տարածման օրվանից: Նմուշառումներ կատարելու իրավունք են ստացել Գյումրիի բոլոր բուժհաստատությունները:

Երեկ, ըստ Շիրակի մարզպետի, ևս մեկ թեստի դրական պատասխան է ստացվել պոլիկլինիկայում կատարված նմուշառումից: Շիրակի մարզի հաստատված դեպքերով պացիենտները Գյումրիի ինֆեկցիոն հիվանդանոցում են: Գյումրիի հյուրանոցներից մեկը, որը վերածվել է մեկուսարանի, ազատ տեղեր ունի: Սկզբում այդտեղ էին տեղափոխվել «Գյումրի» բժշկական կենտրոնի 29 բուժաշխատողները, որոնք համարվում են Մարալիկի առաջնային դեպքի կոնտակտավորներ: Այսօր նրանց մեկուսացման ժամկետը լրանում է: Նրանք թեստավորում են անցնելու: Բացասական արդյունքի դեպքում բուժաշխատողները մեկուսացումից դուրս կգան։