Գյումրիի հյուրանոցներում և հյուրատներում ամրագրումները չեղարկվել են

Այս տարի Հայաստանի բնակիչները ամառային հանգիստը կկազմակերպեն հիմնականում ներքին զբոսաշրջության հաշվին: Տուրիստական ընկերությունների այս կանխատեսումները պայմանավորված են համավարակով ու արտակարգ դրությամբ, երբ օդային ու ցամաքային հաղորդակցության ուղիները փակ են, իսկ զբոսաշրջության միակ տարբերակը երկրի տարբեր տեսարժան վայրեր այցելությունն է:

Մինչ Գյումրին կընդունի հյուրերի հարևան մարզերից ու մայրաքաղաքից, հյուրանոցներն ու հյուրատները հաշվարկում են վնասները, որոնք կրել են մարտ, ապրիլ, մայիս ամիսներին ամրագրումների չեղարկումների համար: Օտարերկրացի զբոսաշրջիկները, որոնք ամիսներ առաջ էին համարներ ամրագրել իրենց ամառային հանգիստը Գյումրիում անցկացնելու համար, հրաժարվել են ամրագրումներից:

Պարապուրդի ընթացքում հյուրատների ու հյուրանոցների աշխատակիցները պետական աջակցության ծրագրերից են օգտվել: Որպես բիզնես ուղղություն՝ հյուրանոցներին ու հյուրատներին վարկեր են նաև առաջարկվում, բայց դրանցից օգտվել չեն շտապում, քանի դեռ անորոշ է, թե երբ ու ինչքան զբոսաշրջիկներ կկարողանան ընդունել:

«Մեր աշխատողները փոխհատուցում են ստացել 8-րդ ծրագրի շրջանակներում՝ 68 հազար դրամ: 3 ամիս պարապուրդում ենք եղել և 3 ամսվա համար փոխհատուցումը կազմել է 68 հազար դրամ: Մեր պարագայում միակ ծրագիրը, որին համապատասխանում ենք, վարկային միջոցներն են 2 տարի արտոնյալ պայմաններում, երրորդ տարին՝ տոկոսով: Դա տալիս են հարկեր վճարելու, աշխատավարձ վճարելու, կոմունալ վճարների համար: Սովորաբար, տուրիստական ընկերությունների հետ աշխատելիս ամրագրումները արվում են 1 տարի առաջ, այսինքն՝ 2019թ. մենք գիտեինք, թե 2020-ին ինչքան տուրիստներ ենք հյուրընկալելու: Իսկ ամրագրումների չեղարկումները հիմնականում տեղի ունեցան վերջին մի քանի ամիսներին, և ամենավատն այն է, որ կա անորոշություն: Տուրիստական ընկերությունները չգիտեն, թե մինչև երբ չեղարկեն ամրագրումները»,- SHANTNEWS.am-ին ասել է Գյումրիի հյուրանոցային համալիրներից մեկի տնօրեն Վարդան Սրտաշյանը:

Համավարակը նպաստելու է ներքին տուրիզմի զարգացմանը: Սա տուրիստական ընկերությունների ու էքսկուրսավարների կանխատեսումն է: Ըստ այդմ էլ, տուր ուղղությունները մշակում են ներքին տուրիզմի համար: Անհատ էքսկուրսավար Հովհաննես Ֆրանգուլյանը քաղաքի պատմական ու տեսարժան վայրերից օնլայն տուրեր է կազմակերպում, որոնք նախատեսված են և Հայաստանի և արտերկրի զբոսաշրջիկների համար:

Փոքր ակտիվությունը ներքին տուրիզմով հետաքրքրվածների հաշվին է: Գյումրին շարունակում է հետաքրքիր ու պահանջված մնալ: Պատմական ժառանգությունը, փողոցները և մարդիկ զբոսաշրջային պոտենցիալն են, որի զարգացումը սկսվեց անցած տարի ու իր հետ բերեց զբոսաշրջային ենթակառուցվածքների զարգացում Գյումրիում:

«Սահմանափակումների մեղմացումից հետո արդեն նկատվում է ակտիվություն: Այդ ակտիվության ցուցանիշները մեծ չեն, բայց լավատեսական երանգով ասենք, որ սայլը տեղից շարժվել է: Բոլոր տուրիստական ընկերությունները 2020 թվականը սկսում են զրոյից: Ճգնաժամը հաղթահարելուց հետո շարունակելու ենք գնալ դեպի թրենդային ուղղություն: Ամեն ինչ արվում է, որ Շիրակը ներկայացվի որպես թրենդային ուղղություններից մեկը: Ամենալավ կողմն այն է, որ քիչ բացահայտված է: Մարդիկ հոգնել են ավանդական ուղղություններից և ուզում են գալ նոր Շիրակ»,- SHANTNEWS.am-ի հետ զրույցում ասել է տուրիստական ընկերության ղեկավար Լիզա Գասպարյանը:

Գյումրիի հյուրատներում ու հյուրանոցներում պատրաստ են ընդունել հյուրերի Հայաստանի այլ մարզերից ու մայրաքաղաքից: Նշում են՝ հիմա առավել մեծ ուշադրություն են դարձնում զբոսաշրջային սպասարկման որակին:

Փոքր-ինչ ավելի բարդ է այս ոլորտում ներդրումների շարունակականությունը, բայց առանձին դեպքերում ու մասնավորապես հյուրատնային բիզնեսում ներդրում կատարելու մտքից չհրաժարվածներ կան: