Աշնանային նստաշրջանում իրենց մտքի գոհարներով աչքի ընկած պատգամավորները

Քաղաքական սրացումների, բուռն զարգացումների, լեզվակռվի, հակադարձումների ու անջատված խոսափողների տեսակետից 6-րդ գումարման Ազգային ժողովը, ի տարբերություն նախորդների, առայժմ այնքան էլ աչքի չի ընկնում:

Ու թեև խորհրդարանի կազմն էականորեն փոխվել է, Ազգային ժողովում կան նոր ու երիտասարդ դեմքեր, հիմնական խաղացողները շարունակում են մնալ հնաբնակները, որոնք իրենց ակտիվությամբ ու ճարտասանությամբ պահում են «քաղաքական դրայվը» խորհրդարանում:

Փորձել ենք առանձնացնել 6-րդ գումարման 2-րդ նստաշրջանում իրենց քաղաքական խոսքով առավել աչքի ընկած պատգամավորներին:

1. ՆԻԿՈԼ ՓԱՇԻՆՅԱՆ 

Իր սուր խոսքով հայտնի «Ելք» խմբակցության ղեկավարն այս նստաշրջանում ևս աչքի ընկավ մի շարք արտահայտություններով: Ամենահիշարժաններից մեկը «Չկա լիմոն, մանդարին, դատապարտեմ այսպիսի նոր տարին» արտահայտությունն էր:

Նստաշրջանի վերջին օրը Փաշինյանը 7 անգամ կրկնեց ««Ելք» խմբակցությունը 20 րոպե ընդմիջում է վերցնում» արտահայտությունը՝ այդ կերպ մի քանի ժամ ձգձգելով արտահերթ նիստի վերջին քվեարկությունները: Հանրապետականների նյարդերն այս անգամ տեղի չտվեցին: 

Նստաշրջանի ընթացքում Փաշինյանը նաև մասնակցեց Գեղամյան-Փաշինյան բռնցքամարտի փակ առաջնությանը: «Կռիվ-ղալմաղալի» պատճառը, ըստ Գեղամյանի, Փաշինյանի լեզուն էր, որը «Ելք» խմբակցության նախաձեռնությամբ հրավիրած «ԵԱՏՄ-ից դուրս գալու վերաբերյալ» լսումների ժամանակ գեղամյանական ոճով ասել էր, թե «հեսա ռուսները կգան, մեզ կմորթեն, էս ինչ էք խոսում …», հետո նաև լիագումար նիստում Գեղամյանին հիշեցրել վերջինիս կոմունիստական անցյալը՝ խորհուրդ տալով ոչ թե պատմության դասեր տալ, այլ պատմություն սովորել ու ավելացրել, թե «գրքեր կտամ կկարդաք, մի քիչ կրթական ցենզը թող ձեր բարձրանա», վերջում էլ ավելացրել. «Թան էլ չէ, փրթած մածուն ձեզ»:

 2. ԱՐՏԱՇԵՍ ԳԵՂԱՄՅԱՆ 

Այս նստաշրջանում բացահայտվեց ՀՀԿ խմբակցության անդամ, «Ազգային միաբանություն» կուսակցության ղեկավար Արտաշես Գեղամյանի մարզական անցյալը, վերջինս պնդեց՝ Փաշինյանի հետ միայն տղամարդկային խոսակցություն է ունեցել ու նրա վրա չի հարձակվել՝ ավելացնելով, թե «եթե ես որևէ մեկի վրա բռունցքներով հարձակվեմ, նա կհայտնվի հիվանդանոցում, քանի որ ես 3.5 տարի բռնցքամարտով եմ զբաղվել, նման բան չի եղել»: 

3. ՆԱԻՐԱ ԶՈՀՐԱԲՅԱՆ 

Խորհրդարանում իր քաղաքական սուր ելույթներով աչքի ընկավ նաև «Ծառուկյան» խմբակցության անդամ Նաիրա Զոհրաբյանը: Վերջինս իր խոսքը սիրում է համեմել «սղացնել», « փուչիկներ» ու նմանատիպ այլ արտահայտություններով:

Դեկտեմբերի 6-ի ելույթը ամենահիշարժաններից մեկն էր, երբ նա հայտարարեց , որ կոռուպցիան շարունակում է իր հաղթարշավը, իսկ նախկին վարչապետ Տիգրան Սարգսյանի ղեկավարած կառավարությունն էլ բնորոշեց «չգիտես՝ նրանք կառավարության անդա՞մ էին, շամա՞ն, թե՞ թուղթուգիր անող: Ասում էին՝ չի կարելի խոսել ճգնաժամի մասին, որ ճգնաժամը մեր երկիրը շրջանցի: Նման մանկապատանեկան հայտարարությունները, իհարկե, բերեցին նրան, որ այսօր երկիրը կանգնած է լրջագույն տնտեսական կոլապսի առաջ»:

Իսկ դեկտեմբերի 14-ին, անդրադառնալով միլիոնատեր պաշտոնյաների հայտարարագրերին, հայտարարեց.

«Որին հարցնում ես, ասում է՝ իմ հարստությունը հալալ քրտինքով է, էսքան հալալ քրտինք էս երկրում որտեղի՞ց, էդ էլ որևէ կերպ չենք կարողանում պարզել: Էդպես չի լինում, էն հայտնի անեկդոտը նորից հիշեցի՝ էդ որ սաղդ սուրբ եք, էս եկեղեցու խաչը ո՞վ գողացավ»: 

4. ԳԵՎՈՐԳ ՊԵՏՐՈՍՅԱՆ 

6-րդ գումարման խորհրդարանի նոր դեմքերից «ծագող աստղ» կարելի է անվանել «Ծառուկյան» խմբակցության անդամ Գևորգ Պետրոսյանին: Վերջինս նստաշրջանի ընթացքում հայտնի դարձավ հումորով համեմված իր սուր ելույթներով: 

Տպավորիչ ու հիշարժան էին Պետաիրավական հարցերի մշտական հանձնաժողովում տեղի ունեցած  մի շարք քննարկումներում պատգամավորի ունեցած ելույթները, որոնք մեծ մասամբ ավարտվում էին հանձնաժողովում ծագած սուր բանավեճով: 

 Գևորգ Պետրոսյանի մտքի գոհարներից է «Ազգային ժողովը սիրահարների այգի չի, որ իրար սեր խոստովանենք» արտահայտությունը: 

5 ՀԱԿՈԲ ՀԱԿՈԲՅԱՆ-ԽՈՍՐՈՎ ՀԱՐՈՒԹՅՈՒՆՅԱՆ

Փորձառու քաղաքական գործիչներ Հակոբ Հակոբյանն ու Խոսրով Հարությունյանն այս նստաշրջանի այն պատգամավորներից էին, ովքեր հայտնվեցին համացանցային սուր քննարկումների թիրախում: Պատճառը նրանց արած արտահայտություններին էին թանկացումների, միս ու կարագ գնել-չգնելու վերաբերյալ: 

Առաջինը թիրախում հայտնվեց ԱԺ առողջապահության և սոցիալական հարցերի մշտական հանձնաժողովի նախագահ Հակոբ Հակոբյանը, որը հայտարարեց, որ «աղքատներին թանկացումը չի սպառնում, քանի որ աղքատ մարդկանց մոտ սովորություն կա խուսափել թանկացած կամ թանկ ապրանք գնելուց»:

Ըստ Հակոբ Հակոբյանի՝ աղքատը «թանկացումներից առաջ էլ միս չէր կարող գնել, թանկացումներից հետո էլ չի գնի» :

ԱԺ տնտեսական հարցերի մշտական հանձնաժողովի ղեկավարն էլ, փորձելով հարթել գործընկերոջ ասածը, կարտոֆիլի օրինակը բերեց` ասելով հետևյալը. «Պատկերացրե՛ք ընտանիք, որը միայն կարտոֆիլ է օգտագործում: Հիմա, եթե միսը թանկ է կամ էժան, միևնույն է, նա գումար չունի միս առնելու: Նա շարունակելու է կարտոֆիլ օգտագործել»:

Արդյունքում նա էլ հայտնվեց թիրախում, չնայած օրեր անց, պատասխանելով լրագրողների հարցերին, ընդգծեց, որ «կարտոֆիլ լավ էլ ուտում եմ»:

 6. ՍԵՅՐԱՆ ՍԱՐՈՅԱՆ 

ՀՀԿ խմբակցության անդամ, գեներալ Սեյրան Սարոյանը խորհրդարանի թերևս ամենակոլորիտային պատգամավորն է: Առավել ակտիվ է միջանցքներում, քիչ է խոսում դահլիճում, բայց, երբ խոսում է, միանգամից հայտնվում է համացանցի ու հասարակության ուշադրության կենտրոնում: 

«Որ ամոթ ունենան էդ թանկացնողները, չեն թանկացնի։ Գետինը մտնեն, էդքան հարստանալ պետք չի էլի, օլիգարխ չէ, ինչ ուզում է լինի»,- խորհրդարանի միջանցքում լրագրողների հետ ունեցած ճեպազրույցի ժամանակ Սեյրան Սարոյանի այս հայտարարությունը եկավ լրացնելու նստաշրջանի ավարտին դահլիճում ունեցած ելույթին:

Նա կոչ արեց խորհրդարանական խմբակցություններին Նոր տարուց առաջ չկռվել, «շուն ու կատվի նման իրարից չբաժանվել», ինչպես նաև հորդորեց գործընկերներին, թե «ում ձեռ ինչ կա, բաժանեք ժողովրդին, բուդը մինակ չուտեք, թե չէ լավ չի ըլնի, կառտոլով Նոր տարի չենք անելու»:

7. ՍԱՄՎԵԼ ԱԼԵՔՍԱՆՅԱՆ 

Դահլիճում ընդհանրապես չի խոսում, միջանցքում աշխատում է չընկնել լրագրողների «ճանկը», բայց խոսելիս դառնում է օրվա քննարկումների թեման:

Սամվել Ալեքսանյանի վերջին թարմ «բոցերից» մեկը «տունը էրեխեքին դասեր եմ տալիս, ոնց անեն բիզնես» արտահայտությունն է: Թե ինչու մյուսների մոտ բիզնես անել չի ստացվում, Ալեքսանյանը մի պատասխան ունի. «Որովհետև իմ դասերին չեն մասնակցում»: 

                                                                                                        Պատրաստեց Արմեն Մխիթարյանը