Այս քրեական գործը ԱԱԾ-ում ապօրինի կարգով է քննվում. Երեմ Սարգսյան

Նիստը հետաձգվեց, որովհետև մի քանի ժամ ակտիվ աշխատում էինք: Իրականում բոլորս էլ արդեն հոգնել էինք: Ծավալը դեռևս բավականին մեծ է, որպեսզի շարունակենք: Դրա համար միջնորդություն եղավ, որպեսզի հետաձգվի, առավոտյան՝ ժ. 10.30 շարունակենք: Այս մասին ասաց ԲՀԿ առաջնորդ Գագիկ Ծառուկյանի փաստաբան Երեմ Սարգսյանը՝ խոսելով Գագիկ Ծառուկյանին կալանավորելու միջնորդության քննության հետաձգման մասին:

Լրագրողներից մեկի դիտարկմանը, թե 72-ժամյա սահմանափակումը չկար, փաստաբանը ասաց՝ չկար, քանի որ Գագիկ Ծառուկյանն ազատության մեջ է: Փաստաբանը հայտնեց, որ ինքնաբացարկի միջնորդությունը դատարանը մերժել է, որոշումը դեռևս չի տվել:

«Որոշումը տալուց հետո կծանոթանանք: Դրա վերաբերյալ դիրքորոշում կարտահայտենք: Մենք այսօր փորձեցինք հիմնավորել, վստահ եմ, որ հիմնավորել ենք, որ այս քրեական գործը Ազգային անվտանգության ծառայությունում ապօրինի կարգով է քննվում որովհետև Քրեական դատավարության օրենսգիրքը շատ հստակ սահմանում է, թե կոնկրետ որ քրեական գործերը նախաքննական որ մարմինները պետք է քննեն:

Այն հոդվածը, որով հարուցվել է քրգործը ԱԱԾ-ում, սա ՀՔԾ-ին ենթակա գործ է: Դատախազն իրավունք չունի փոխել նախաքննական մարմիններին: Այստեղ առաջին պահից սկսած ապօրինի է եղել, հետևաբար հետագա բոլոր գործողությունները ապօրինի են: Սա առաջին փաստարկն է, որ ներկայացրել ենք, դատարանը պետք է իր որոշմամբ անդրադառնա:

Լուրջ փաստարկներ ենք ներկայացրել, հիմնավորել դատարանին, որ այստեղ քաղաքական գործընթացներ են տեղի ունենում, այլ ոչ թե իրավական»,- ասաց Սարգսյանը:

Նանաև հայտնեց, որ այն փաստաթղթերը, որ հայտնաբերվել է, դրվել է հիմքում, հայտնաբերվել է 2019թ. փետրվարի 5-ին: Փետրվարի 6-ին կոնկրետ անձի հարցաքննության ժամանակ հարց է տրվել, որ այս փաստաթղթերից տպավորություն կա, որ ընտրողների ձայներ են գնվել, ի՞նչ կասեք դրա մասին:

«Այդ ցուցմունքի հարցին պատասխանը չի հնչել և 4 ամիս՝ մինչև Ծառուկյանի հայտարարությունը՝ հունիսի 5-ի, երբ քննադատեց կառավարությանը, այդ պահից սկսած վերհիշեցին, որ նման հանգամանք կա և որոշեցին նույն անձին նորից հարցաքննել»,- հավելեց փաստաբանը՝ նշելով, որ նոր փաստական տվյալ չեն ստացել:

«Նույն փաստաթուղթը ամսի 10-ին զննում են ու քրեական գործ են հարուցում»,- ընդգծեց փատաբանը: