Քննարկում պարեկային ծառայության ներդրման վերաբերյալ

Այսօր ոստիկանության պարեկային ծառայության ներդրման հետ կապված հարցերին վերաբերող քննարկում է կազմակերպվել: Ինչպես հայտնի է, ոստիկանության բարեփոխումների շրջանակում Հայաստանում պարեկապահակային ծառայությունների և ճանապարհային ոստիկանության փոխարեն ներդրվում է պարեկային ծառայություն:

Այն նախատեսվում է ներդնել երկու փուլով: Առաջին փուլով գործարկվելու է Երևանում մինչև 2021 թվականի առաջին եռամսյակը, այնուհետև ամբողջ հանրապետությունում՝ մինչև 2022 թվականի առաջին եռամսյակը:

«Հասարակությունը օբյեկտիվորեն շատ լուրջ ակնկալիքներ ունի նաև ոստիկանությունից: Հասարակությունն ակնկալում է, որ այն, ինչը հեղափոխության ժամանակ վանկարկվում էր, թե «ոստիկանը մերն է», այդ վանկարկումներին կփոխանցվի բովանդակային, ինստիտուցիոնալ, խորքայի միս ու արյուն: Սա մենք, ըստ էության, տեսնում ենք պարեկային ծառայության հիմնադրման կոնցեպտում: Ոստիկանը բոլոր առումներով պետք է դառնա օրինապահ քաղաքացու ընկերը, բարեկամը, ով խնդիրների դեպքում առաջինն օգնության հասնողը կլինի և ում քաղաքացին կդիմի խնդիրների դեպքում»,- ասել է  «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը՝ հավելելով, որ հիմա ոստիկանը որպես ընկեր չի ընկալվում:

Իոաննիսյանը ճանապարհային ոստիկանությունից է օրինակ բերել, երբ վարորդները մեկը մյուսին զգուշացնում են ոստիկան տեսնելիս՝ լուսարձակների միջոցով: Ըստ Իոաննիսյանի՝ սա նրա արդյունքը չէ, որ վատ հասարակություն ունենք, այլ նրա, որ վարորդների նպատակները տարբերվում են ՃՈ-ի նպատակներից:

ՃՈ-ն ընկալվում է որպես զուտ տուգանվող մարմին, պլան կատարող: Եթե ընկալումն այդպիսին չլինի, մարդիկ  մտածեն, որ ոստիկանը հենց վարորդի շահերի համար է ծառայություն իրականացնում, այդ դեպքում շատ հնարավոր է, որ վարորդը ոչ թե մյուս վարորդին, այլ հենց ոստիկանին «իշմար» տա՝ կարգախախտի մասին ասելու համար:

Արդարադատության նախարարի տեղակալ Քրիստինե Գրիգորյանը ևս մեկ անգամ խոսել է այն մասին, թե ինչ նպատակ է հետապնդվում պարեկային ծառայությունը ներդրելով:

«Պարեկային ծառայության ներդրմամբ մի քանի  խնդիր ենք ցանկանում լուծել: Առաջինը, ըստ էության, փոփոխության մասին է: Պետք է դառնա ոստիկանության մյուս ծառայությունների բարելավման լոկոմոտիվը: Հեռու ենք այն մտքից, որ ոչնչից ենք ինչ-որ բան  ստեղծում»,- ասել է փոխնախարարը՝ հավելելով, որ խնդիր է դրված հանրային վստահությունը բարձրացնելու, ոստիկանության աշխատանքը մարդակենտրոն դարձնելու:

Հիշեցնենք, որ ըստ նախատեսվածի, նոր կառույցում ծառայության կարող են անցնել 18-35 տարեկան զինվորական ծառայություն անցած և միջնակարգ կրթություն ունեցող քաղաքացիները համապատասխան պատրաստվածություն անցնելուց հետո:

Պարեկային ծառայության ծառայողների նվազագույն աշխատավարձը կկազմի 320 հազար դրամ: Նրանց համար նախատեսվում են նաև սոցիալական երաշխիքներ։ Պարեկային ծառայողների համալրումը տեղի է ունենալու բացառապես բաց մրցույթով, ծառայողների ընտրության և նրանց 5-ամսյա ծրագրով վերապատրաստման կրթական ծրագիր իրականացնելու արդյունքում:

Պարեկային ծառայությունն ունենալու է նոր համազգեստ, զենքի հատուկ միջոցների, տրանսպորտային միջոցների, տեխնիկական սարքավորումների լրիվ նոր հագեցվածություն:

Երևանում ծառայության ներդրման համար կծախսվի շուրջ 4 մլրդ դրամ: Հատկանշական է, որ այս բարեփոխումը նաև Հայաստան-ԵՄ Համապարփակ և ընդլայնված գործընկերության համաձայնագրի պահանջներից է: