Արվեստը հանուն հաղթանակի․ Գյումրեցի երիտասարդ նկարիչներն իրենց ստեղծագործությունների ցուցահանդես-վաճառք են կազմակերպել

Նկարիչների պայքարն արվեստով է: Այս կարգախոսով առաջնագծին օգնելու նախաձեռնությամբ են հանդես գալիս Գեղարվեստի պետական ակադեմիայի Գյումրիի մասնաճյուղի ուսանողները:

Նրանք իրենց աշխատանքները ներկայացրել են ցուցահադես-վաճառքի, իսկ ստացված հասույթն ամբողջությամբ ուղղելու են «Մենք ենք, մեր սահմանները. բոլորս Արցախի համար» համազգային դրամահավաքին: 40 ուսանողներ 50-ից ավելի գեղանկարներ ու գրաֆիկական աշխատանքներ են վաճառքի հանել, այդ թվում՝ այս օրերին ծնված, հաղթական ու խաղաղության կոչով աշխատանքներ:

Գեղարվեստի պետական ակադեմիայի Գյումրիի մասանաճյուղի ցուցասրահում ուսանողները ներկայացրել են վերջին ամիսների իրենց ստեղծագործությունները: Գեղանկարներ, գրաֆիկական աշխատանքներ, որոնք արվել են ամառային պրակտիկայի ընթացքում ու պատրաստվում էին մեծ ցուցահանդեսի սեպտեմբերի վերջին: Ցուցահանդեսի ժամկետները չխախտվեցին, բայց ցուցադրության նպատակը փոխվեց: Ուսանողների աշխատանքներն ամփոփող ցուցահանդեսը վերածվեց ցուցահանդես-վաճառքի, որի հասույթն ուղղվելու է «Հայաստան» համահայկական հիմնադրամին:

Գրաֆիկական աշխատանքների թվում «Հաղթելու ենք» անունը ստացած շարքն է: Հեղինակը՝ գեղարվեստի ակադեմիայի Գյումրիի մասնաճյուղի մագիստրատուրայի ուսանող Ասյա Ղանդիլյանը, արտահայտել է զինվորի հաղթական ոգին, նրանց վերադարձի սպասումն ու խաղաղության ձգտումը:

«Այս գործերով փորձել եմ սփոփել սպասողներին՝ ծնողներին, քույրերին, ինչու ոչ, նաև ընկերուհիներին: Իմ աշխատանքները խորհրդանշում են զինվորներին, որոնք ոչ միայն  տղամարդիկ են, այլև կանայք, ովքեր այս օրերին հերոսաբար կռվում են»,- SHANTNEWS-ի հետ զրույցում նշել է նկարչուհի Ասյա Ղանդիլյանը:

Գեղանկարներում գերակշռում են Գյումրիի ու Շիրակի մարզի տեսարժան վայրերը, բնանկարները: Դրանց ամեն օր նորերն են ավելանում: Ուսանողները, շրջանավարտները, դասախոսները բարեգործական արշավ են ձեռնարկել, ցանկություն են հայտնել իրենց ստեղծագործությունները վաճառել` առաջնագծում կանգնած զինվորին օգնելու համար:

«Այսօր, առավել քան երբևէ, պետք է ամեն մեկն իր մասնագիտությունում զբաղվի իր գործով: Առավել ևս մշակույթի գործիչները: Մենք պետք է կրողը լինենք դարավոր մշակույթի, որովհետև սա ոչ միայն հողի, այլև մշակույթի պատերազմ է: 50-ից ավելի աշխատանքներ են հիմա ներկայացված, բայց այսօրվանից սկսած՝ շարունակական բնույթ է կրելու: Մեր շրջանավարտները, դասախոսները, ավելի ավագ սերնդի ներկայացուցիչները ևս ցանկություն են հայտնել իրենց աշխատանքների ցուցահադես-վաճառք կազմակերպելու համար»,- SHANTNEWS-ին ասել է Գեղարվեստի պետական ակադեմիայի Գյումրիի մասնաճյուղի տնօրեն Վահագն Ղուկասյանը:

Ցուցահանդես-վաճառքի ներկայացված նկարների գնացուցակ են կազմել: Յուրաքանչյուր աշխատանք խորհրդանշական արժեքով է վաճառվում, որը ոչ այնքան արվեստի գործի իրական գինն է արտահայտում, որքան շատ ու շուտ բանակին օգնելու ցանկությունը:

Այսօր ցուցահանդես-վաճառքի սկիզբն ազդարարվեց: Իսկ վաճառքը, որպես այդպիսին, տեղի է ունենալու համացանցով: Սոցիալական էջերում տարբեր արվեստագետներ իրենց ստեղծագործություններ են վաճառքի ներկայացրել հանուն հաղթանակի: Հանուն նրա, որ հաջորդ տարի երիտասաարդ նկարիչների պլեները Արցախում անցկացվի: