Արցախում զորավարժություններ են անցկացվել

Հյուսիսային ուղղությամբ գործող միավորումներից մեկի 2018 թվականի պատրաստության պլանի համաձայն՝ հունիսի 18-ից 22-ը անց է կացվել երկաստիճան հրամանատարաշտաբային զորավարժություն: Այստեղ շոշափված տեսական խնդիրները, մտահղացումներն ու հրամանատարների որոշումները արտացոլվել են զորամասերից մեկի հետ անցկացված մարտական հրաձգությամբ գումարտակային մարտավարական զորավարժության ընթացքում: Այս մասին հայտնում է ԱՀ ՊՆ մամուլի ծառայությունը:

Ըստ հաղորդագրության՝ զորախաղերի ամբողջ ընթացքին հետևել ու զորավարժության մասնակիցներին մեթոդաբակնական ցուցումներ է տվել ԱՀ ՊՆ, ՊԲ հրամանատար, գեներալ-լեյտենանտ Լևոն Մնացականյանը: Զեկավարման կետերում հրամկազմի գործողությունները վերահսկելուց բացի, նա եղել է նաև կրակային դիրքերում և հենց տեղում ստուգել է պայմանական մարզադաշտում, ըստ մարտակարգերի, տեղակայված ստորաբաժանումների համապատասխանությունը՝ ներկայացվող պահանջներին:

Մինչ զորավարժությունների մեկնարկը՝ միավորման հրամանատարը ներկայացրել է ստեղծված պայմանական մարտական իրադրությունը, զեկուցել իրականացված միջոցառումների և ընդունված որոշումների մասին, կատարել տեղագրական ու մարտավարական կողմնորոշում:
«Տիգրանակերտ» զորավարժարանում պայմանական մարտական գործողությունները մեկնարկել են հակարծակի հարձակմամբ: Յուրայիններին հաջողվել է կասեցնել հակառակորդի առաջխաղացումը, վարել պաշտպանական մարտ ու անցնել հակագրոհի՝ զբաղեցնելով առավել նպաստավոր բնագծեր ու վերականգնելով կորցրած դրությունը:

Հաղորդվում է, որ Զորավարժությունների ընթացքում առաջ քաշած իրավիճակները առավելագույնս մոտեցված են մարտական պայմաններին ու արտացոլում են կոնկրետ տվյալ տարածաշրջանի զորամասերի ու ստորաբաժանումների իրական խնդիրները:
Պայմանական մարտադաշտում հակառակորդը կիրառում էր ավիացիա և հրթիռահրետանային միջոցներ, հրանետանային համակարգեր, հերթապահ ուժերից բացի նաև դիվերսիոն-հետախուզական և դեսանտային խմբեր:

Վերջիններիս հակազդելու համար բանակի ստորաբաժանումները կիրառել են մի շարք նոր զինատեսակներ և արդի տեխնիկական միջոցներ, որոնք գրագետ ընտրված մարտավարության, հմուտ ղեկավարման և անձնակազմի բարձր մարտական պատրաստականության շնորհիվ ապահովել են ակնկալվող դրական արդյունքները:

Երկաստիճան հրամանատարաշտաբային, իսկ ապա նաև մարտական հրաձգությամբ ուղեկցվող գումարտակային մարտավարական զորավարժությունը լիովին իրացրել է նախանշված ուսումնական նպատակները:

Զորավարժության ավարտին իմի են բերվել արդյունքները, վերլուծվել և ընդհանրացվել իրականացված բոլոր միջոցառումները և ըստ այդմ մասնակից հրամանատարներին, շտաբներին ու զորային մյուս կառույցներին առաջադրվել խնդիրներ` հետագա աշխատանքների կազմակերպման վերաբերյալ: